Matie 20

Tale vanaa baalaa

1«Masale halataala len le velan a dɛnɛ vana bɛndu cɛiyo pum, o fula idiiyo púŋ le vanvalla yɔɔ o nakɔ n'rɛsɛn ndɔɔ nin-ndo. 2Má cɛlan nda ndaa le nda salaa volii támái i pilɛ le paalen. Mó yaa nda o nakɔ ndɔɔ nin. 3O lɛɛlɛ ŋɔmahiɔɔlundɔɔ, mó fula, mó saalun a pum o ifal, a ve ɲɛ-ɲɛ tosa le. 4Mó dimul nda aa: ‹Niaa bɛɛ la kɔ tosa vallo o nakɔ nuu nin, dɔ́ɔ́ i ke niaa sala bɛnda-o.› 5Má kɔa. A paalen o pol, mó fula vɛlɛ. A lɛɛlɛ yàándɔɔ o kon kɔɔli, mó tosa vɛlɛ ɲɛ pilɛ kon. 6A lɛɛlɛ ŋuɛɛnundɔɔ, mó fula vɛlɛ, mó saalun a pum, a vannun isisi lon. Mó ɲuna nda aa: ‹Le yɛɛ niaa niinu yɛ hau nanu kpɛŋ, la tosa ɲɛ-ɲɛ le?› 7Má mulul ndu aa: ‹Vana-vana cue naa le baala le.› Mó dimul nda aa: ‹Mɛɛ niaa bɛɛ la kɔ o nakɔ nuu nin.›

8Paalen delɔɔ, mí vana nakɔɔ dimul vana ndɔ mandaa bolofaa aa: ‹Veelu vanaa baalaa mà sala nda. A kandu pɛ a vanaa mɛɛlu lakɔ-a a kɔ mɛɛlu a vanaa tasea kɔɛ-a.› 9Mí vanaa kɔɛ a lɛɛlɛ ŋuɛɛnundɔɔ-a sɔla vana-vana volii támái i pilɛ. 10Mí vanaa tasea hun o kon kɔɔli, a va yiyanndo maa a hiawnin sɔlaa lende. Kɛ mí nda bɛɛ vana-vana sɔla volii táamái ndii pilɛ. 11Ndáà sɔlaa mun, má soaa sɔɔn pɔmbɔn a vana nakɔɔ. 12Má dimi aa: ‹Lɛɛlɔɔ ndu pilɛ kpé vanaa mɛɛlu haa hunɔɔ-a tosa vallo ni, a muungu naa ɲɛ pilɔɔ keo naa ndaa? Naa yɛ, nanu naa n niinu ni, hangullo niinu naa palaa kpɛŋ.› 13Mó mulul vana pilɛ o nda tɛɛn aa: ‹Caan nuu sei! I tosal nɔm lakafa le. Vɛ̀ɛ̀ o co le nɔm salaa volii támái i pilɛ le naa n cɛlan te? 14Bii sala nɔmndo mà kɔɛnnun. I yeema mì ke vana mɛɛlaa mɛɛ ya ke nɔm yɛ. 15Mò va maa i nɔ dí le ɲɛ ya yeema-o tosaa a ɲɛm nun te? Bàà te i tosa pɛ dɛnɛ kɛndɔɔ, ken luei nɔm paŋalaa o kɔl?› 16O kon kɔɔli, mí Yeesu dimi maa lelan, vanaa mɛɛlaa vanin vanaa tasea, mì vanaa tasea siŋnun vanaa mɛɛlaa.»

Yeesu soo vɛlɛ a piɔ́m ndɔɔ a á tendul ndɔɔ o kɔɔ

(Marke 10.32-34, Luke 18.31-34)

17Tuma Yeesu va helɔɔ Yerusalɛm-ndo, mó veelu kaandeŋaa ndɔa tɔ́ a à ŋiɔnda o fondaa pum, mó dimul nda nɛi-tɛɛn aa: 18«Má cè naa helɔɔ Yerusalɛm! À kɔ malnin Po vanacieo bolii vanaa-solia-lasálàá a vanaa pɛɛkaa latɔŋnda o ba, mà yaala ndu le piɔ́mndo sɔlaa. 19A malnin ndu vɛlɛ vanaa-mangalaa-isɔɔa o ba le ndu mamɔɔ, mà soŋ ndu, mà baŋ ndu o yɔm singafilaa coo. Kɛ mò tendul o paale yàándɔlen.»

Ɲɛ poaa Sebede-a ɲuna-o

(Marke 10.35-45, Luke 22.24-47)

20Paale pilɛ, mí kalaa poaa Sebede-a sɔɔnguu Yeesu ikɛi a poaa ndɔa, mó baŋ vulan ndu o labɛngunin le ndu sɔɛi pum ɲunaa. 21Mí Yeesu ɲuna ndu aa: «Yɛɛ nɛ n yeema yɛ?» Mó mulul ndu aa: «Cɛl mì poaa nia ŋiɔnda ha kɔ va icali nɔm ikɛi o masale nɔmnden nin, o pilɛ nɔm o ba kɛndɔɔ coo, o pilɔɔ nɔm o ba mɛllo coo.» 22Mí Yeesu mulul ndu aa: «La sínà ɲɛ niaa co piɛiyo-o le. La nɔla pá kolɔɔ a taala kólaa ya co kolɔ̀ɔ̀-o?» Má muli aa: «N nɔla!» 23O kon mó dimul nda aa: «Ì co toɲa maa la kolnin a taala kólaa nuu. Kɛ le calle ya o ba kɛndɔɔ coo a o ba mɛllo coo, o co ya le yɔngu vana fondala lan te, le vanaa Fuɲa nuu toosiaa lan-nda la co ni.»

24Kaandeŋaa tɔ́a tɔ̀a tueyɔɔ sɔɛi ken, má tambu kɔl a puapilɛa ŋiɔnda. 25Mí Yeesu veelu nda, mó dimul nda aa: «La sinà maa simlacia vanaa-mangalaa-isɔɔa-a co vanaa-mangalaa-isɔaa kan masalen tosaa coo a paa-kala, maa vanaa ndaa bɛndua bɛɛ a co nda kindilaa. 26Kɛ o co lende le i vanin niaa tɛɛn te. Vana-vana yeema pɛ le vaa vana bɛndoo niaa tɛɛn, ndu bɛnda mò siŋnun buɛi niaa. 27Vana-vana yeema pɛ le vaa vana tasoo niaa tɛɛn, ndu bɛnda mò siŋnun cɛ niaa. 28Lende Po vanacieo hin ni. O hín mì vana tosal ndu baala le, kɛ le vannda baalaa tosallo a le yoomu ndɔɔ yɔngoo le vanaa bɔɔ-bɔɔ baŋaa.»

Yeesu singi vanaa sumɛiya nda ŋiɔn

(Marke 10.46-52, Luke 18.35-43)

29Tuma nda va faŋanndo Yeriko-o, mí sɛ́lɛ́ bɛndoo del Yeesu kɔɔli. 30Vanaa sumɛiya pum a va icali o nɛiyo dangalaa nda ŋiɔn. Ndáà tueyɔɔ maa Yeesu co hiovɔɔ ni, má yonda aa: «Maalii, Po David-o, tuinun naa iɲíí!» 31Sɛ́lɔ́ɔ́ va nda yaalianndo haliko mi ndáà mei, kɛ má cɔɔlu yonda aa: «Maalii, Po David-o, tuinun naa iɲíí!» 32Mí Yeesu sim, mó veelu nda, mó dimul nda aa: «Yɛɛ niaa yeema yɛ mì tosal niaa?» 33Má dimul ndu aa: «Maalii, n yeema mì hɔltan la kumbin naa.» 34Mí ɲííye bii ndu a nda, mó pilan nda hɔltan. Fɔ́ɔ́fɔ̀, má ca, má del ndu kɔɔli.

Currently Selected:

Matie 20: BKG

Highlight

Copy

Compare