Matie 15

Pɛɛkoo a naamula fuɲaa-mamaa mɛi lan o kɔɔ

(Marke 7.1-13)

1Paale pilɛ, mí Faliisia a vanaa pɛɛkaa latɔŋnda can Yerusalɛm, má hun o Yeesu lo, má ɲuna ndu aa: 2«Le kɔlɔ yɛɛ kaandeŋaa nɔmnda co yɛ naamula fuɲaa naa mamaa tɛɛmbuuo? Kani a pulù balan le ɲɛdiaa dioo mɛɛ naamu naa co yɛ le.» 3Mó muli aa: «Niaa yɛ, le yɛɛ niaa co yɛ tɔŋ Hala-o tɛɛmbuuo le naamu niaa? 4Kani Hala dimi aa: ‹Biilu fuɲa nɔm a kala nɔm›, mó dimi vɛlɛ aa: ‹Vana dimi pɛ diomnde vɔɔnnden a fuɲa ndɔ, te kon te a kala ndɔ, o bɛnda mò sɔla piɔ́mndo›. 5Kɛ niaa, la co dimio maa hali mi vana dimul fuɲa ndɔ, te kon te kala ndɔ-o aa: ‹Ɲɛ yáà kenin nɔm le nɔm malaa-o, ndu ya tuu le Hala sálàá solullo ni›. 6Vana kon nɔ mako le fuɲa ndɔ, te kon te kala ndɔɔ bɛɛlen ke le. Lende niaa co sɔɛi Hala-e malɔɔ ni le naamu niaa. 7Niaa vanaa muuluannda ha, a niaa o kɔɔ kpeekpei Esai soo ni aa:

8‹A n'cɔcɔ vannda ha co ya biiloo ni,

kɛ kɔlta ndalan la co bɔɔ ya levil.

9Kaannde fondolen fúú nda co o diola nilan ni,

mà pɛɛku vannda sɔɔn nda pila co tosaa-on.›»

Ɲɛm nɔɔliaa vanacieo-von

(Marke 7.14-23)

10O kon kɔɔli, mí Yeesu veelu sɛ́lɔ́ɔ́, mó dimul nda aa: «La yaŋ nilan mì la bii bila. 11O co ɲɛ luɛì vanacieo o sondo-o le nɔɔliaa ndu le. Kɛ ɲɛ fulà ndu o sondo-o, ndu nɔɔliaa vana ni.» 12O kon mí kaandennda sɔɔnguu Yeesu ikɛi, má ɲuna ndu aa: «A sina pá maa sɔɔn n dimi mun-ndon tɛɛmbuu Faliisia kɔltan?» 13Mó muli aa: «Yɔm oo yɔm Fuɲa ni co o halataala-o tol te, ndu sungunnin. 14Lelan la mɛi nda lon, vanaa sumɛyaa co kɔlan a vanaa sumɛyaa celen-nda nda co ni. Te vana sumɛiyo see yɛ pɛ vana sumɛiyo tindaa, nda ŋiɔn kpow a kɔ del o soondo nin.» 15Mí Piɛr cua sɔɛi, mó dimul ndu aa: «Tɛɛsial naa kɔlɔ tale kon.» 16Mí Yeesu dimi aa: «Mò va maa niaa bɛɛ la kindu lakɔl te? 17La sina le maa ɲɛ-ɲɛ luɛi pɛ o sondo, o tol o dembe, o kon kɔɔli o kɔ fula nɛɛ vana sɔndan-nda le? 18Kɛ o kɔllo nin ɲɛ fula o sondo-o can ni, nduyɛ, ndu nɔɔliaa vanacieo ni. 19Kani o kɔllo nin yiyannda vɔɔnndan, yeemɛi diyaa n'vanndacie-e, tiɔmɔɔ, suundaa, vuilen, seile lakafalen timbio a vannda diolan tɛɛmbuuo fula ni. 20Mun nɔɔliaa vanacieo ni, kɛ kɛɔ balan pulɔɔ o ɲɛdiaa dioo, kon nɔɔliaa vana le.»

Vanalanɔ kanannɔɔ pum laalan Yeesu

(Marke 7.24-30)

21Mí Yeesu faŋan ndon, mó kɔa o lɛŋnde Tir a Sidɔn nden nin. 22Mí vanalanɔ Kanannɔ fula kpengii ken-ndo can yondaa aa: «Tuinun ya iɲíí Maalii, Po David-o. Ɲinaa co bɔɔ cua nuu saangiaa!» 23Kɛ Yeesu kuŋ te, o soli le. Mí kaandeŋaa ndɔa sɔɔnguu, má dimul ndu aa: «Dimul ndu mò muungu, o co bɔɔ hunɔɔ a yoondiaa naa kɔɔli.» 24Mí Yeesu muli aa: «O saa laasian fulaa o cɛi Israɛl-lo nin-nda lo daama ya sɔla vomɔɔ ni.»

25Kɛ mí cua kon hun baŋ vulan ndu o labɛngunin, mó dimul ndu aa: «Maalii, mala ya!» 26Mí Yeesu muli aa: «O niŋ mì vana cua ɲɛdiaa cuaambɔa, mì vana vowlu tunaa cuawva le.» 27Mí cuaa dimi aa: «Toɲaa ken co ni, Maalii. Kɛ nduyɛ, tunaa cuawva nɔla mà de kùún deli o tabali vana nda bɛndoo bɛngu-on.» 28O kon mí Yeesu mulul ndu aa: «Cuaa, laalan nɔmndo co o bɔɔ. Màá i tosalan nɔm mɛɛ n yeema yɛ!» Mí cua ndɔɔ siangu dɔ́ɔ́ telen kon kpafii.

Yeesu singi vanaa lanàá taw

29Mí Yeesu faŋan o tàndà kon nin, mó kɔa o dalaa Kalile kɔngɔ. Mó hel o pembei coo, mó kɔ cal lon. 30Mí sɛ́lɛ́ bɛndoo va hunɔɔ o ndu lo a namtaa, vanaa sumɛiya, boboa, vanaa falun vílɛ́iya a vanaa lanàà súú-súù ka. Má hun kɛsi nda ndu o labɛngunin, mó singi nda. 31Lɔ́ɔ́ sɛ́lɛ́ bɛndu kon ce boboa sɔɛi, vanaa falun vílɛ́iya siongɔɔ, namtaa kɔlan sakpo a vanaa sumɛiya cɔu-vo, mí kɔndɔfili bɛndoo bii nda, má candu Hala Israɛlla.

Yeesu dɔw vannda vàála hiɔɔlu balo

(Marke 8.1-10)

32Mí Yeesu veelu kaandeŋaa ndɔa, mó dimul nda aa: «Ɲííye co ya a sɛ́lɛ́ bɛndoo ho, kani o co nihau palɛi ndii yáá n co nanu naa ndaa, a nɔ yɛ ɲɛdiaa le. I yeema ma muungu a yiaan lende le, yɔŋii nda kei deli nɛi-tɛɛn.» 33Mí kaandennda ɲuna ndu aa: «Kuɛɛ naa n fula yɛnin a ɲɛdiaa o lɛŋnde veselɛilen nden nin le sɛ́lɛ́ bɛndoo ho kpow pimio?» 34Mí Yeesu ɲuna nda aa: «Vɛ̀ɛ̀ kpɛɛ niaa nɔ yɛ bululan?» Má mulul ndu aa: «Laŋɔmmɛw a suvaa pɔmbɔa ɲɛ-pɔmbɔ.» 35O kon, mó dimul vannda le calle lɛŋ. 36Mó cua bulula ŋɔmmɛwla lan a suvaa kan. Ndóò ciiyo balikaa malɔɔ, mó yimiyimi lan, mó yɔngu kaandeŋaa ndɔa lan, mí nda piɔw vannda lan. 37Mí nda kpow a dia, má pum. Má cɔwviaa bulula bingi-bingila lo lan, mí la pia kambɛilan tan ŋɔmmɛw. 38Vanaa de ɲɛdiaa kon-nda va vanpiaandua vàálan tan hiɔɔlu, a cɔm vanlaandua a cuaambɔa le. 39O kon kɔɔli, mó mal vannda le kɔlan o la nda lo, mó luɛi o dɛ̀ndɔ̀ɔ́ nin, mó kɔa o lɛŋnde Makadan-nden nin.

Currently Selected:

Matie 15: BKG

Highlight

Copy

Compare