Matie 13

Tale vana saŋaa n'mallo

(Marke 4.1-9, Luke 8.4-8)

1Paale len, mí Yeesu fula cɛinin, mó kɔ cal o dalaa kɔngɔ. 2Vannda lo hunɔɔ sɛ́lɔ́ɔ́ o ndu lo tei, mó can, mó luɛi o dɛ̀ndɔ̀ɔ́ nin, mó cal. Mí sɛ́lɛ́ bɛndu kon sim o kɔngɔɔ coo. 3Mó viaw sɔɛi o nda lo lándán o talelan nin, mó va dimio aa: «Paale pilɛ, mí langbanɔɔ pum can le maalon saŋɔɔ. 4Telen o va saŋɔɔ-o, mí kullon pum deli o nɛiyo demullo, mí yowva toal, má dia mun. 5Mí n'pum deli o powtan nin, nɛɛ puulu bɔɔ ve le-a. Mí n keleŋa vulɔɔ, kani puulu bɔɔ ve lon te. 6Kɛ mɛɛ paalen le fula, mí n ɲɔfɔliaa, mí n vesa, kani puundun ve le. 7Mí n'tiŋ deli o yɔɔn nin, mí yɔɔn hindu, mí n mial mun. 8Mí n'pum deli o lɛŋnde kɛndɛlen, mí n koam, mí yasalan lapum la koam kullon kɛmɛ, lapum belaŋɔmpum, lapum yɛ beleyaa. 9Vana nɔ pɛ nilan, mɛɛ ndu tueí!»

Le kɔlɔ Yeesu soaa o talelan nin-ndo

(Marke 4.10-12, Luke 8.9-10)

10Mí kaandennda sɔɔnguu Yeesu ikɛi, má ɲuna ndu aa: «Le yɛɛ n soaa yɛ o vannda lo o talelan nin?» 11Mí Yeesu mulul nda aa: «Niaa, la sɔla sinapɛngoo le dɛnnda viannanndan bilaa biyɔɔ a masale halataala len o kɔɔ, kɛ nda sɔla sinapɛngu vaa lende le. 12Kani vana nɔnin o ba-o sɔlanin cɔɔloo mo kui ndu o ba taw. Kɛ vana nɔ o ba loo ndu, hali o pɔmbɔ co ndu o ba-o hialunnin ndu. 13Lelan ya soaa o nda lo o talelan nin ni, kani a co tofaa, kɛ a co cɔ le, a co tueyɔɔ, kɛ a co bila biyɔɔ le. 14O kon mí sɔɛi Esai vana-tɛɛngaa-diom Hala-o dimi-e peelun nda coo aa:

‹La tuɛinin ɲɛkɛndɛi, kɛ la biinin bila le,

la tofanin ɲɛkɛndɛi, kɛ la cinin te.

15Kani kɔlta vannda ha la laasian,

a cii nilan baŋulɔn, má kinda hɔltan,

yɔŋii nda cɔ a lahɔl, mà tuei a lani,

mà bii bila a kɔlta ndalan,

mà mangalan, o kon mì singi nda.›

16Kɛ niaa, dɛnɛ kɛndɔɔ co le niaa! Kani hɔlta niaalan la co cɔu, nila niaalan la co tueyɔɔ. 17I co niaa toɲaa dimul, vanaa-tɛɛngaa-diom Hala-a a vanaa sandaa bɔɔ-bɔɔ ndáà yeema mì ndáà ce ɲɛ niaa co cɔu-vo, kɛ a cí le, mì ndáà tuei ɲɛ niaa co tueyɔɔ-o, kɛ a tuí le.»

Yeesu tɛɛsiaa tale vana saŋaa n'smallo

(Marke 4.13-20, Luke 8.11-15)

18«Lelan niaa, la yaŋ nilan, mì la tuei kɔlɔ tale vana saŋaa n'mallo ho. 19Kulun deli o nɛiyo demullo-on, mun co vanaa tuɛi sɔɛi masale Hala len, a bii ndi bila le-a ni. Vana vɔɔndo hin pɛ, o soli nda sɔɛi saŋnun ken nda o lakɔl-le o lakɔl. 20Kulun deli o powtan nin-ndon, mun co tɔɔmasele vana tuei sɔɛi Hala-e, mó cɛl ndi fɔ́ɔ́fɔ̀, a ɲaaloo-o ni, 21kɛ ndu pila nɔ n'puundu le. Vana cɛl sɔɛi le telen bingi-o o co ni. Kɛ te dɛnɛ palaa, te kon te yɛle tolaalen le komal ndu dɔ́ɔ́ pɛ le sɔɛi Hala-i ken, o mal nɛiyo. 22Kulun deli o yɔɔn nin-ndon, mun co tɔɔmasele vana tuei sɔɛi Hala-e, kɛ mí buulannda ceenndan a yeemɛi bolofaa hialu fondaa ndu o kɔl kpede-o ni. O kon sɔɛi Hala-i co ndu o kɔl-le kum te. 23Kulun deli yɛ o lɛŋnde kɛndɛlen-ndon, mun co tɔɔmasele vana tuei sɔɛi Hala-e, mó bii ndi bila-o ni. Vana kon ndu nɔla mò kom, mì yasala ndɔlan lapum la soli kullon kɛmɛ, lapum kullon belaŋɔmpum, lapum yɛ kullon beleyaa.»

Tale bil vɔɔndo

24Mí Yeesu dimul nda vɛlɛ tale celen aa: «Masale halataala len le co maa langbanɔ saŋ malun kɛndɔn o ciɛi ndɔɛi nin-ndo. 25Kɛ telen vannda va o lɔan-ndo, mí yaamɔɔ ndɔɔ kɔ saŋ bil vɔɔndo o malun ndɔn mun nin, mó kɔannun. 26Telen malun kɛndɛn o saŋ-ndon vil mi n koam-ndo, mí bil vɔɔn kon bɛɛ vul. 27Mí vanaa baalaa vana iciɛɔ hun dimul ndu vana iciɛɔ aa: ‹Fallo, o co malun kɛndɔn te n saŋ o ciɛi nɔmnde nin te? Kɛ kuɛɛ bil vɔɔndo ho ndu fula yɛ niko kpeekpei?› 28Mó mulul nda aa: ‹Yaamɔɔ tosa ken ni.› Má ɲuna ndu aa: ‹A yeema mì n kɔ hɔɔnuu ndu?› 29Mó mulul nda aa: ‹Ɛ-ɛ, yɔŋii niaa lo o ndu sungɔɔ mì la sungu a maalon latulu. 30La mal lende mò sul latulu vellaa-velle háá o telen koavaa. Te kovɔɔ tiiya pɛ, i dimulnin vanaa koavaa mà sungu fɔlɔn bil vɔɔn kalaa, mà yiw ndu kpɔŋndan le ndu lomɔɔ, o kon à mɔɔsiaa niko maalon, a vow mun o konda.›»

Tale kulii mutarde

(Marke 4.30-32, Luke 13.18-19)

31Mí Yeesu dimul nda vɛlɛ tale celen aa: «Masale halataala len le co ko kpen a kulii mutarde, i vanndo pum cua mó tɔal o nakɔ ndɔɔ nin-nde. 32Ndi hiow dɔɔnanndo o kullon kpow tɛɛn ni. Kɛ ndíì vulɔɔ, mí i hiaw tɔlɔɔla va o nakɔ kon nin-ndan kpow bandei, mí i siŋnun yɔm bɛndu-bɛndoo, mí yowva coocoo a hun tangul o lɛvun ndɔn.»

Tale lɛvɛnndo

(Luke 13.20-21)

33Mí Yeesu dimul nda vɛlɛ tale celen aa: «Masale halataala len le co ko vɛlɛ kpen a lɛvɛnndo, o vanalanɔɔ pum cua mó vow o kpeyan kilo leyáá-o nin-ndo. Mí lɛvɛn kon tosa mí kpeyan kon kpow hindu hindɔɔ pila.»

Le kɔlɔ Yeesu va sɔɔn dimio o talelan nin-ndo

(Marke 4.33-34)

34Sɔɔn mun kpow, o talelan nin Yeesu dimul vannda mun ni, ndóò dimul nda isɔɔ-sɔɔ mí ndóò kɛɛ taloo vow lenin te, 35haliko mi sɔɛi vana-tɛɛngaa-diom Hala-o ndóò dimi-e ndíì peelun aa:

«I kumbinin sondoo mì soo o talelan nin,

mì soo a dɛnnda viannannda co

kabi ceendo cɔwnun ndan o kɔɔ.»

Kɔlɔ tale bil vɔɔndo

36O kon mí Yeesu faŋan nɛɛ sɛ́lɔ́ɔ́ va-a, mó luɛi cɛinin. Mí kaandeŋaa ndɔa sɔɔnguu ndu ikɛi, má dimul ndu aa: «Tɛɛsial naa tale bil vɔɔn nda saŋ o ciɛi nin-ndo.» 37Mó mulul nda aa: «Vana saŋ malun kɛndɔn-ndo, ndu co Po vanacieo ni. 38Ciɛi, ndi co ceendo ni. Malun kɛndɔn, mun co vanaa co masale halataala len cɛlɔɔ-a ni. Bil vɔɔndo yɛ, ndu co buɛyaa Vana vɔɔndo ni. 39Yaamɔɔ saŋ ndu-o, ndu co masa ɲinaa vɔɔnda ni. Telen kovɔɔ, ndu co mɛɛlula ceendo ni. Vanaa koavaa, nda co mɛlɛkaa ni. 40Nduyɛ, mɛɛ vana suingi bil vɔɔndo le ndu malɔɔ o yin nuaa yɛ, lende koni mɛɛlula ceendo la vanin ni. 41Po vanacieo viamnin mɛlɛkaa ndɔa, mà hun suingi vanaa co caanda lueiyo o pɔwlan nin-nda a vanaa tosaa dɛnnda vɔɔnda, 42mà viow nda o tóndó leyinndo nin, nɛɛ caŋndan a ciŋndon sɔmndo vanin-nda. 43O telen kon, vanaa sandaa vanin tengaa maa lepala o masale Fuɲa nda len nin. Vana nɔ pɛ nilan, mɛɛ ndu tueí!»

Bolofaa co o vianaa-o

44«Masale halataala len le co vɛlɛ ko kpen maa bolofaa co o vianaa yondoo pum nin-ndo. Vanndo saalɔnndo ndu, mó cɔɔlu ndu vionɔɔ. O lo ɲaale kon dɔwnɔnndo tei, mó pisi ɲɛm ndɔn kpow, mó kɔ piandu yondo kon.

45Masale halataala len le co ko vɛlɛ kpen a yulanɔ co kela yɔɔvala báà kalalan-ndo. 46Mɛɛ o komal o pilɛ, mó kɔ piisuu ɲɛm ndɔn kpow, mó piandu yɔɔva kon.»

Tale yala yɔɔyaa

47«Masale halataala len le co ko vɛlɛ kpen a yala yɔɔyaa nda vuu o dalaa nin, mó kɔandu suvaa súú-súù ka-o. 48Mɛɛ o pɛ, má nan ndu o kɔngɔ. Má cal, má hɛli a kɛndɛa, má vow kan o kayalan nin, má viaw a vɔɔnda. 49Lende koni o vanin o ceendo mɛɛlulan ni. Mɛlɛkaa kɔanin mà kɔ soli vanaa vɔɔnda vanaa sandaa tɛɛn, 50mà viow nda o tóndó leyinndo nin, nɛɛ caŋndan a ciŋndon sɔmndo vanin-nda.»

Bolofaa sɛnɛiyo a bolofaa paandoo

51Mí Yeesu ɲuna nda aa: «La bii pá mun kpow bila?» Má mulul ndu aa: «Oi!» 52Mó dimul nda aa: «Lelan vana sɛvaa latɔŋ kɛ́-kɛ̀ sɔla pɛ pɛɛkoo a masale halataala len o kɔɔ, ndu vel simlacinɔ cɛi soli sɔɔn sɛnɛiyon a n'paandon o bolofaa ndɔɔ nin-ndo.»

A kɛɛ Yeesu Nasarɛt

(Marke 6.1-6, Luke 4.16-30)

53Yeesu ciiyo talelan ndan dimio kpow, mó faŋan. 54Mó kɔa o lɛŋnde ndɔlen nin, mó kandu vannda pɛɛkoo o cɛila lekaanndan nin, mí kɔndɔfillo bii nda. Má va dimio aa: «Kuɛɛ o fula yɛ a kɔlkaloo ho a á kaamaala o co lan tosaa lan? 55O co macoaa po langbanɔ cuaa layindɔɔ ho le? O co kala ndɔ le co Mari le? O co macoaa pɔmbɔa ndɔa le co Nsaki, Yosɛf, Simɔn a Yude le? 56Yemaa ndɔa co macoaa naa tɛɛn kpede le? Kuɛɛ ndu fula yɛ nin a kpaayaa ho?» 57Ken kpeekpei yɔŋ ni a laalan ndu le. Kɛ mí Yeesu dimul nda aa: «Vana-tɛɛngaa-diom Hala-o fola biiloo nɛɛ-nɛɛ celen te, fɔ o lɛŋnde ndɔlen nin a o ndu lo cɛinin.» 58Le laalan nda lepɛŋndo, Yeesu tosa dɛnnda kaamaala bɔɔ lon te.

Currently Selected:

Matie 13: BKG

Highlight

Copy

Compare