Matie 11

Ɲuna Nsaŋ Vana-yinaa ɲuna-o a diom Yeesu soo-o

(Luke 7.18-35)

1Yeesu ciiyo kaandeŋaa ndɔa sɔɔn mun dimullo, mó faŋan le kɔlan vannda pɛɛkoo a sɔɛi Hala-e dimio o kobila va o tàndá kon nin-ndan nin.

2Nduyɛ, Nsaŋ lo o kaasoo, mó tuɛi a dɛnnda Krista lan o kɔɔ. Mó viam kaandeŋaa ndɔa le kɔlan ɲunaa aa: 3«Mò va maa nɔm co vana naa n tuei tɔ́ɔ́ le hunɔɔ-o ni, baa o bɛnda mì n cum vana celen?» 4Mí Yeesu mulul nda aa: «La kɔ dimul Nsaŋ dɛnnda niaa co tueyɔɔ lan a la niaa co cɔu lan: 5vanaa sumɛiya co cɔu, vanaa bɛvɛiya co cɔnɔnndo mà va kelaa, vanaa nàà siaŋaa co siongɔɔ, vanaa nila baŋulɛiya co tueyɔɔ, vanvílɛ́iya co muungoo yoomu, Yoongu Kɛndɔɔ co vanaa bala fondoa tiiyalanndo. 6Dɛnɛ kɛndɔɔ co le vana kon, o delnin o lapɔw nin le dɛnɛ nuu loo.»

7Tuma kaandeŋaa Nsaŋ-nda va kɔnndan-ndo, mí Yeesu mulin sɔɛi o vannda lo a Nsaŋ o kɔɔ aa: «Yɛɛ niáà kɔɛ yɛ tofaa o lɛŋnde vesɛilen nin? Vɛ̀ɛ̀ kpɛ̀ndɛ̀le hoeiye va hiiloo len niáà kɔɛ tofaa ni? 8Kɛ yɛɛ niaa kɔ cɔ yɛ? Mò va maa langbanɔ vownun volɔɔla cuɛinannda sɔvɛlan-ndo ni? Kɛ o cɛila masaa nin vanaa vownun volɔɔla sɔvɛlan-nda co ni. 9Yɛɛ niáà kɔɛ yɛ niko tofaa? Bàà vana-tɛɛngaa-diom Hala-o ni? I co niaa dimul, hiovɔɔ bɛɛ vana-tɛɛngaa-diom Hala-o coo. 10Kani a ndu Nsaŋ o kɔɔ o co o sɛvaa ni aa: ‹I co kiila nuu vomɔɔ nɔm laci, mò toosial pɔɔ nɔm nɛiyo.› 11Mì dimul niaa toɲaa, o vanaa vanlaandua velu-a tɛɛn, vana-vana yɔŋnun maa ndu Nsaŋ Vana-yinaa le. Kɛ nduyɛ, vana hiow dɔɔnanndo o masale halataala len nin-ndo hiow ndu. 12Cɔn o paale Nsaŋ Vana-yinaa len háá hau, vannda co masale halataala len cɔlɔbaa, nduyɛ vanaa kɔlvesɛiya co len hiɔlɔ̀ɔ́ ni. 13Kani vanaa-tɛɛngaa-diom Hala-a kpow a tɔŋndo tɛɛnguu diom Hala-o a ndi o kɔɔ háá o telen Nsaŋ-ndo. 14Te la yeema pɛ le sɔɛi ken bilaa biyɔɔ, mɛɛ ndu Nsaŋ co Elii niaa tuei kon tɔ́ɔ́ le hunɔɔ-o ni. 15Vana nɔ pɛ nilan, mɛɛ ndú tueí!

16A nɛ̀ɛ̀ ya tuu yɛnin vanndacieea vaalio ho? A co ko kpen a cuaambɔa co icali o luŋ, mà va caaŋaa ndaa veeloo-a, 17má va dimio aa:

‹N hɔŋ sɛ̀ŋnden, kɛ la yi le.

N soli condun biision, kɛ la ceŋ te.›

18Kani Nsaŋ hin, o ve dio le, o ve kolɔɔ le, mí vannda dimi aa: ‹Ɲina vɔɔndo co ndu nin ni.› 19Mí Po vanacieo hun, mó va dioo a kolɔɔ, mí vannda va dimio aa: ‹Hoo ndu vana lepuloo a vana kólaa mamɔiyo o co ni. Caaŋoo vanaa biyaa mulua a vanaa lahakia o co ni.› Kɛ o dɛnnda Kɔlkaloo co tosaa lan nin vannda sinà ni maa Kɔlkalu kalaa sandu.»

Kobila kɛɛ le laalanndo lan

(Luke 10.13-15)

20O kon kɔɔli, mí Yeesu kanalan kobila o tosa dɛnnda kaamaala bɔɔ-bɔɔ nin-ndan, kani kobila lan la mangalan te. Mó dimi aa: 21«Dɛnɛ palaa co le nɔm, nɔm Korasin! Dɛnɛ palaa co le nɔm, nɔm Bɛtsaida! Kani te dɛnnda kaamaala tosan o niaa lo lan láà tosan pɛ Tir a Sidɔn, maa o co lɛhau le ndáà vownun nin volɔɔla biisilan, mì ndáà deli o loolio nin, mì ndáà mangalan te. 22Lelan mì dimul niaa, paale kialaa iyamalen, sɔɛi niɛi hiawnin ikalu a sɔɛi vannda Tir a haa Sidɔn. 23Nɔm Kapɛrnaum yɛ, a helnin pá háá o halataala? Kɛì-kɛì bɛɛ! A sɔlanin tuisio háá ciee-piɔ́m. Kani te dɛnnda kaamaala tosan o nɔm ndo lan láà tosan pɛ lɔ́ɔ́ kon Sodɔm, maa kobi kon ndóò va vɔ hau. 24Lelan mì dimul niaa, paale kialaa iyamalen, sɔɛi niɛi hiawnin ikalu a sɔɛi Sodɔm-nde.»

La hun o Yeesu lo mì la sɔla pɛngio

(Luke 10.21-22)

25O telen kon, mí Yeesu soaa, mó dimi aa: «Pua, nɔm co Vana bɛndoo o halataala a o lɛŋnden coo-o, i mel nɔm balika, le tùú n vin vanaa dɛnɛ sinaa a vanaa kɔlkalua sɔɔn mun, má cɔm cuaambɔa mun-ndo. 26A toɲa, Pua, i mel nɔm balika le tùú n cɛl mí i yɔŋnun lende-o.

27Fuɲa nuu yɔngu ya ɲɔɔn kpow. Vana-vana sina Poo le, te o co Fuɲaa le. Vana-vana sina vɛlɛ Fuɲaa le, te o co Poo a vana Poo yeema le Fuɲa ndɔ cɔmndo-o le.

28Niaa volɔɔlan la co o lebol mì la va o sangaa nin-nda kpow, la hun o ya lo, mì ke niaa pɛngio. 29La siilun volɔɔla nilan, mì la sɔla pɛɛku nuu, kani vana vi kɔllo-o a vana tuisianndo ya co ni, la sɔlanin pɛngio o kɔlta niaalan nin. 30Kani volɔɔla nilan la lusul te, bɔndii nuu connun fefele.»

Currently Selected:

Matie 11: BKG

Highlight

Copy

Compare