Malasi 3
3
1«Má cè ya kiila nuu vomɔɔ! Ndu co ya pemalen bulio laci ni. Maalii niaa co nuwviaa-o co cɔnɔn o lepilɔɔ, mò kɔ luɛi o cɛi ndɔ biilaa nin, kiila niaa co cumndo-o co hunɔɔ kpema nuu yii a niaa. La nua vɔ ndu hunɔɔ! Mɛlɛka-Nɔ-Kpaayaa-Kpow-vo co sɔɛi nuaa ni. 2Nɛ̀ɛ́-nɛ̀ yulu yɛnin paale o hunnin-nden? Nɛ̀ɛ́-nɛ̀ lo yɛnin isisi lɔ́ɔ́ o fulanin ceen-ndo? Kani maa yinnde teengiaa cilinnde len o vanin ni. Maa sɛmma vana tɔaa volɔɔlan-ndan o co ni. 3O calnin mɛɛ vana teengiaa volion le mun dindio-o cal-lɛ, mò dindi poaa Levii-a. O dindinin nda mɛ̀ɛ́-mɛ̀ɛ́ vana dindi sianion a volin humbon nuaa yɛ. O kon, mà va Mɛlɛka sálàlan solullo mɛɛ o kelun o tɔŋndo nin yɛ. 4Mɛlɛka cɛlnin sálàla Yudaa a sálàla Yerusalɛmnda mɛɛ o va tosanndo paandu o vɔsila hiow lan nin yɛ. 5I sɔɔnguunin niaa ikɛi le yamɛi kiolɔɔ, i keleŋanin mì kɔ tɛndal vanaa viamaa yavaa a vanaa suundɛiya seilen. I tɛndalnin vanaa mɛɛnian mɛɛniannda fondolan-nda seilen, mì tɛndal vɛlɛ vanaa kɛɛ le sala vanaa baalaa yɔngoo-a seilen. Nda koni kuunan ɲɛm vííya a ɲɛm vanlaandua piandaa ndaa vi-a coo ni. Nda kan koni yii mialla dúmbú le nda palaa ni. A nɔ isiòòn a ya le. Ya Mɛlɛka-Nɔ-Kpaayaa-Kpow-vo dimi lende ni.»
Le muungoo Mɛlɛka o ibuŋ
6«Ya Mɛlɛka, i yɛlɛman te. Niaa niaa, cuavaa Yakɔb-a tuŋ niaa co ni. 7Kaandɔɔ o paale fuɲaa niaa mamaa, la mal silala nilan. La cɛl le lan biyɔɔ le few. La muungu ya o ibuŋ mì ya bɛɛ mulul niaa hɔlla. Ya Mɛlɛka-Nɔ-Kpaayaa-Kpow-vo dimi lende ni. Kɛ la co dimio aa: ‹Vɛɛ nɛ naa n muungu yɛ nɔm o ibuŋ.› 8Vɛ̀ɛ̀ vanaciee yoomaa nɔla pá mò hui Hala? Kani la co ya huiyo mí la va ɲunaa aa: ‹Vɛɛ nɛ naa n co yɛ nɔm huiyo?› O o-tɔ́ndɔlan nin a o ɲɛm-kéan nin. La co yɔngu mɛɛ o bɛnda yɛ le. 9Niaa vanaa co icali o lɛŋnden-nden kpow coo-a, danga bɛndoo co le niaa, le hui niaa co ya-o. 10La hun a o-tɔ́ndɔla niaalan kpow o cɛi mandaa bolofaa nin, haliko mi baloo va o ya lo cɛinin. La tɔɔndan-ndɔ hau ya lende, mì la tofa, te i kumbilnin niaa diola pɔmbɔla co o halataala lan, mì tuisi niaa duaa bɛndu-bɛndu hiow ɲɔɔn kpow-vo coo le. Ya Mɛlɛka-Nɔ-Kpaayaa-Kpow-vo dimi lende ni. 11I ciilunin niaa sóónɔa tɛɛmbuu tɔlɔɔlan-nda. À tɛɛmbuu lɛnin nakɔla niaalan te, rɛsɛŋun niaan pɛngi lɛnin komɔɔ le. Ya Mɛlɛka-Nɔ-Kpaayaa-Kpow-vo dimi lende ni. 12Vanaa-mangalaa-isɔɔa kpow veelunin niaa aa vanaa dɛnɛ yelelal-a. Kani lɛŋnde niaalen nden le vanin lɛŋnde ɲɛm kɛndɛlen. Ya Mɛlɛka-Nɔ-Kpaayaa-Kpow-vo dimi lende ni.›»
Paale Mɛlɛka solinin sandii ndɔɛi ceen-nden
13Mí Mɛlɛka dimi aa: «La co ya sondoo heelɔnndo mì la muungu dimio aa: ‹Vɛ̀ɛ̀ naa n co yɛ nɔm sondoo heelɔnndo?› 14Nuaa niaa dimi ni aa: ‹Fondo fúú koni vana tosal Hala baalaa ni. Yɛɛ nɛ naa n sɔla yɛ o tɔŋ ndɔɔ biyɔɔ nin, mí n va kafola imɔnɔlan tosaa, haliko mi Mɛlɛka-Nɔ-Kpaayaa-Kpow-vo tuinun naa iɲíí? 15Nduyɛ, n co vanaa sondola kalaa cɔu o dɛnɛ kɛndɔɔ nin. Vanaa co kɔlvesɛiyo tosaa-a co dɛnɛ kɛndɔɔ sɔlaa taw. A co Hala tɔɔndanndo, kɛ ɲɛ-ɲɛ vɔɔn co nda yɔŋnɔn te.›
16O kon, mí vanaa nɔ siòòŋii Mɛlɛka-e-a dimulan vellaa-velle aa: ‹Se Mɛlɛka yaŋ nilan, mó tuɛi. O kon mí sɛbɔɔ sɛvan ndu o hɔl le loonɔnndo a sɔɛi ken, le vanaa nɔ siòòŋii Mɛlɛka-e, má va ndu bɛɛlen keo-va.› 17Mí Mɛlɛka-Nɔ-Kpaayaa-Kpow-vo dimi aa: ‹Vanaa nia nda vanin ni. Ya pila kpeekpei nɔnin nda ni. Paale ya cɔmnin kpaaya nuu len le tiiya pɛ, i tuinunnin nda iɲíí mɛɛ vana tuinun po nɔm co nɔm baalaa tosal-lo-o iɲíí nuaa yɛ. 18La canin vɛlɛ hiyanndo vana kɛndɔɔ nda vana kɔlvesɛiyo tɛɛn, vana co Hala baalaa tosallo-o nda vana co Hala baala tosal too tɛɛn. 19Kɛ telen pum co hunɔɔ tiiya, mì paalen le muungu maa leyin. Vanaa sondola kalaa a vanaa kɔlvesɛiya kpow vanin maa tɛw, mì paale len le lom nda. Hali puundon le mɛinin te, O co vɔ bɛɛ le lɛɛndon te. Ya Mɛlɛka-Nɔ-Kpaayaa-Kpow-vo dimi lende ni. 20Kɛ paale dɛnɛ sandaalen le co hunɔɔ siɔ le niaa vanaa nɔ siòòŋii nii-a, len le hunnin a siongɔɔ o tɛ́ngɛ́-tɛ́ngɛ́lan ndɔlan nin ni. La fulanin mì la huulu a ɲaaloo mɛɛ navaa téndéa huulu o hèéo nin a paale yɔngannden nuaa yɛ. 21La nɛwnin vanaa kɔlvesɛiya, mà muungu niaa o labɛngunin maa cundu. Lende ya tosanin o paale ya cɔmnin kpaaya nuu len ni. Ya Mɛlɛka-Nɔ-Kpaayaa-Kpow-vo dimi lende ni.›»
Muungu Elii-o
22«La loonun a ɲɛ Moise vana ni baalaa pɛɛku niaa-o, o ya yɔngu ndu Horɛb le cuavaa Israɛlla kpow-vo pɛɛn.
23Lelan, ya pila vimnin niaa vana-tɛɛngaa-diom Hala-o Elii lɔ́ɔ́ pá mì paale Mɛlɛka le len le hun tiiya, paale bɛndule lakɔndɔfilte dɛnɛ palaale len. 24O minginin fuɲaa kɔltan poaa ndaa coo, mò mingi poaa kɔltan fuɲaa coo. O kon, i tuisi lɛnin lɛŋnden dɛnɛ palaa coo mì dɔw len yɛɛvɛ le.›»
Currently Selected:
Malasi 3: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée