Tɔŋ lasálàá 8
8
VANAA-SOLIA-LASÁLÀÁ TASEA SƆLA PƆLAA
Aarɔn nda poaa ndɔa hɛlin le sálàlan solio
1Paale pilɛ, mí Mɛlɛka soaa o Moise lo, mó dimul ndu aa: 2«Veelu Aarɔn nda poaa ndɔa, ma cua volɔɔla solia lasálàlan, cuɛima pɔlan, naw tova co le sálà co le hakio sɔlaa malɔɔ-o, saa kóndóa ŋiɔnda a kambɛi bulu toosian a lɛvɛn too co nin-ndo, 3ma cuungiaa vɛlɛ sɛ́lɔ́ɔ́ kpow o cɛi-kola-toandaa-labɔɔŋianndo sondoo.» 4Mí Moise tosa mɛɛ Mɛlɛka dimul ndu yɛ, mó cuungiaa sɛ́lɔ́ɔ́ kpow o cɛi-kola-toandaa-labɔɔŋianndo sondoo. 5Mó dimul nda aa: «Ɲɛ Mɛlɛka dimul naa le tosaa-o co hoo ni.» 6Mí Moise veelu Aarɔn nda poaa ndɔa, mó pulu nda a mɛnndan. 7Mó vow Aarɔn doma lebɛngoo, mó yii ndu yáwlen, mó vow ndu doma bɛndoo, mó vow ndu doma ifalenndo lecoo, mó yii yáwve o doma ifalen kon coo, 8mó handu ndu doma-lapow-iyamaa o takpa, mó vow urim a tumim o yifɔla doma-lapow-iyama kon nin. 9Mó vow ndu mɔsil vilɛiyo o lebol, mó handu pɛngɛi n'sianiei o mɔsil kon laci, tomasele diandaa co kon ni, mó va kpafii mɛɛ Mɛlɛka dimul ndu Moise le tosaa yɛ.
10O kon kɔɔli, mí Moise cua cuɛima va le pɔlaa-an, mó pɔla Calta Mɛlɛka lan a ɲɛm va lenin-ndon kpow, mó dindi mun, 11mó vesul cuɛiyan bɛmbɛ leŋɔmmɛw o fonda-loamaa-lasálàá, mó pɔla ndu a ɲɛm-laandun diandan ndɔn kpow, a fɛngɛ bɛndoo a tum fɛngɛ kon cal coo-o le ɲɛm mun siinguuo teengen le baala Mɛlɛka-o. 12O kon kɔɔli, mó tala Aarɔn cuɛima pɔlan o lebol, mó pɔla ndu le ndu siinguuo teengen le baala Mɛlɛka-o. 13Mí Moise veelu vɛlɛ poaa Aarɔn-nda, mó vow nda domala lebɛngulan, mó yii nda yáwve, mó vow nda mɔsilta solia lasálàlan mɛɛ Mɛlɛka dimul ndu le tosaa yɛ kpafii.
14O kon kɔɔli, mí Moise sɔɔnguu naw tova va le sálà co le hakio sɔlaa malɔɔ-o, mí Aarɔn nda poaa ndɔa handu balan naw tova kon o lebol. 15Mí Moise kialu ndu bololan, mó cua kooma ndɔan, mó vow suei lenin, mó suu o kpɛ̀ɛ́n fonda-loamaa-lasálàá, mó balu man suiyo pindo, mó cuiŋi matɔ̀an o fonda-loamaa-lasálà kon bɛngu, mó dindi ndu le baala Mɛlɛka-o, le faleŋun sálà co le hakio sɔlaa malɔɔ-on tosaa lecoo. 16Mó cua cuɛima kumbu pulon-ndan kpow, bungɛi hiow naŋɔɔ o yemnde nin-nde, kɔlkelen miunndon a cuɛima kumbu mun-ndan, mó loam ɲɛm mun kpow o fonda-loamaa-lasálàá coo. 17Visin tɔ̀un naw kon, yáw ndɔɔ, a ɲɛm va ndu o dembe-on kpow, mó loam mun a yinnden o dɔ́ɔ́ngɔ́ɔ̀ kɔɔli, mí Moise tosa falenndon mɛɛ Mɛlɛka cɔm ndu yɛ kpafii.
18O kon kɔɔli, mó hun a saa kóndó va le sálà loamaa solio-o, mí Aarɔn nda poaa ndɔa handu balan saa kóndó kon o lebol, 19mí Moise kialu ndu bololan, mó fasaŋiaa kooma ndɔan o kpengun fonda-loamaa-lasálàá coo kpow. 20Mó siaŋ cɔlu kon, mó kilikili ndu, mó loam bollen, visin bɛɛnndon a visin macuɛiyon. 21Mó tɔaa pulon a bɛngulan o mɛnndan nin, mó loam saa kóndó kon kpow o fonda-loamaa-lasálàá coo. Ndu yɔŋnun sálà loamaa cun kɛndɛ ŋɔɛ o yin le ya Mɛlɛka-o ni. Mí Moise tosa falenndon mɛɛ Mɛlɛka cɔm ndu yɛ kpafii.
22O kon kɔɔli, mó hun a saa kóndó diinndɔɔ, saa kóndó va le sálà kandaa baala Mɛlɛka-o solio-o pɛɛn. Mí Aarɔn nda poaa ndɔa handu balan saa kóndó kon o lebol. 23Mí Moise kialu ndu bololan, mó cua kooma ndɔan, mó vow man o nile tiilannde ba kɛndɛle Aarɔn-nden nin, mó suu ndu man o suei bɛndui ba ndɔ kɛndɔɔ a o suei bɛndui bɛngu ba ndɔ kɛndɔɔ. 24Mí Moise sɔɔnguu vɛlɛ poaa Aarɔn-nda, mó vow koovan o nila ndala tiilannda ba kɛndɛlan nin, mó suu nda man o suon ndan bɛndun bɛngula ba kɛndɛlan. Mó fasaŋiaa kooma tɔ̀an o kpengun fonda-loamaa-lasálàá coo kpow. 25Mó cua vɛlɛ cuɛima cɔlu kon, puile ndɔlen, cuɛima kumbu pulon-ndan a bungɛi hiow naŋɔɔ o yemnde nin-nde, kɔlkelen miunndon a cuɛima kumbu mun-ndan, a lɔlu ba kɛndɔɔ, 26mó cua dɛɛ toaŋaa toosian a lɛvɛn too, o toŋnun a cuɛiyan-ndo, a dɛɛ toaŋaa o pilɛ o kambɛi bulu toosian a lɛvɛn too va nin-ndo nin, kambɛi va Mɛlɛka o hɔl-lo pɛɛn, mó kɛsi lan o visin macuɛiyon coo a o lɔlu ba kɛndɔɔ coo. 27Mó cua ɲɛm mun kpow, mó yɔngu Aarɔn nda poaa ndɔa, mó cɔm nda faleŋii vana heelu ɲɔɔ coo le Mɛlɛka ndu cɔmndo-e. O kon mí nda tosa faleŋii ken, má cɔm Mɛlɛka ɲɛm mun. 28Mɛɛ nda cii cɔm, mí Moise bii nda ɲɛm mun o ba, mó loam mun o fonda-loamaa-lasálàá coo, o sálà loamaa coo. Sálà kon co sálà kandaa baalaa ni, o ŋɔa kpúlúká o yinnden nin-ndo, o Mɛlɛka tuɛi cun mì ɲɔɔ hɛnan ndu-o pɛɛn. 29Mí Moise cua kɔŋɔ saa kóndó va le sálà kandaa baala Mɛlɛka-o-o, mó tosa faleŋii vana heelu ɲɔɔ coo le Mɛlɛka ndu cɔmndo-e. Mí kɔŋɔ kon yɔngun Moise mɛɛ Mɛlɛka dimul ndu le tosaa yɛ.
30Mí Moise cua cuɛima va le pɔlaa-an a kooma va o fonda-loamaa-lasálàá coo-an, mó fasaŋiaa man Aarɔn coo a o volɔɔla va ndu lekɔɔ lan coo, mó fasaŋiaa man vɛlɛ poaa Aarɔn-nda coo a o volɔɔla va nda lekɔɔ lan coo. Lende Aarɔn nda poaa ndɔa, a volɔɔla va nda lekɔɔ lan kpow sɔla pɔlaa ni.
31Mí Moise dimul Aarɔn a poaa ndɔa aa: «La yáw vision o cɛi-kola-toandaa-labɔɔŋianndo sondoo. Lon niaa dianin mun a bulu co o kambɛi sálà kandaa baala Mɛlɛka-o nin-ndo ni. Maa mɛɛ ya dimi yɛ, Aarɔn nda poaa ndɔa dianin mun ni. 32Ɲɛ tɔ̀ co lo o visin mun a o bulu kon nin-ndo, la lom ndu o yin kpúlúká. 33O palɛi ndii ŋɔmmɛw bɛngu, la bɛnda mì la faŋan o cɛi-kola-toandaa-labɔɔŋianndo sondoo le, háá mì palɛi kelun ken le bɛɛndianndo le baalaa niaa kandɔɔ-e i cuu few. Kani fɔ mì palɛi tosan ndii ŋɔmmɛw malan niaa cuu bɛɛndian le baalaa kandɔɔ. 34Dɛnɛ tosan hoo hau-vo, Mɛlɛka pila dimi le tosaa lende ni, haliko mi la sɔla hakio malɔɔ le hakila niaalan. 35O palɛi ŋɔmmɛw-ve he bɛngu kpede, la bɛnda mì la lo o cɛi-kola-toandaa-labɔɔŋianndo sondoo paalen a ɲumndan, mì la bii sɔɛi Mɛlɛka-e yɔŋii niaa vu. Kon dimulun ya le tosaa ni.»
36Mí Aarɔn nda poaa ndɔa tosa ɲɛ-ɲɛ Mɛlɛka dimul nda le tosaa, o Moise tɛɛngul nda-o.
Currently Selected:
Tɔŋ lasálàá 8: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
