Tɔŋ lasálàá 23
23
Kafolan o lɛŋnde Israɛl-ten nin
1Mí Mɛlɛka soaa o Moise lo, mó dimul ndu aa: 2«Soo o Israɛlla lo ma dimul nda aa:
‹O palɛi diandɛi pum coo, la bɛnda mì la cuungiaa Israɛlla kpow nɛɛ pilɛ, mà tosa duɲɛi bɛnduei le ya Mɛlɛka biiloo. Duɲan bɛndun mun co mun ni:
Kafo paale pɛngiaa
3La nɔ palɛi ndii ŋɔmpum o lɔ́ɔ́ bɛngu le baalala niaalan kpow tosaa, kɛ paale ŋɔmmɛwndɔlen, paale pɛngiaalen le co ni. Paale len ya hɛli mí toosiaa le pɛngio ni. La bɛnda mì la cuungian le bɔŋan diandaa tosaa le ya biiloo. Fonda oo fonda niaa va pɛ icali, la bɛnda mì la tosa ɲinkon baala oo baala le, paale pɛngiaalen le co len le ya Mɛlɛka ni. La bɛnda mì la bii paale len.
4Kafola tɔ̀la niaa bɛnda le tosaa le ya Mɛlɛka biiloo lan la co lan ni, la bɛnda mì la cuungian kpow o paale diandaale hɛlin-nden coo mì la tosa kafoo:
Kafo-hiavaa-coo a kafo bulu toosian a lɛvɛn too
5Te paangii tasei tiiya pɛ palɛi tɔ́ a ihiɔɔlu, la tosa kafo-hiavaa-coo a paale delaalen le ya Mɛlɛka biiloo.
6Te la tosa pɛ kafo kon icɔllo, diimandɔɔ la kandu kafo bulu toosian a lɛvɛn too tosaa le ya Mɛlɛka. Kandɔɔ paale len háá palɛi ndii ŋɔmmɛw, bulu niaa vanin dioo-o bɛnda mò toosian a lɛvɛnndo le. 7Te paale tasele len le tiiya pɛ, la cuungian le ya Mɛlɛka biiloo. La tósà ɲinkon baala niaa tosà paandu-o le. 8Lepalaa-lepala, la bɛnda mì la va sálàá lomɔɔ o yin le ya Mɛlɛka háá palɛi ndii ŋɔmmɛw. O paale ŋɔmmɛwndɔlen coo, la cuungian vɛlɛ le ya Mɛlɛka biiloo. La tósà ɲinkon baala niaa tosà paandu-o le.›»
Kafo tumbu tasoo
9Mí Mɛlɛka soaa vɛlɛ o Moise lo, mó dimul ndu aa: 10«Soo o Israɛlla lo ma dimul nda aa:
‹Te la tiiya pɛ o lɛŋnde ya yɔngu niaa len nin, mì la kɔ va ciɛɔn niaan kovɔɔ, tumbu tase niaa co yii-o, la cua ndu, la yoo vana-solia-lasálàá. 11O kon, kafo paale pɛngiaa cuu pɛ, diimandɔɔ vana-solia-lasálàá tosa falennde, o heelu tumbu kon coo ya Mɛlɛka o hɔl le ya ndu cɔmndo, haliko mi cɛl ndu. 12Paale pilɛle niaa heelunin tumbu kon coo ya o hɔl le ya ndu cɔmndo len, la solul-la vɛlɛ sálà loamaa a saa téndé nɔ vɔsio o pilɛ-o, saa kon bɛnda mò nɔ lenamta le. 13O kon kɔɔli, la soli vɛlɛ kpeyan vɔɔcan a cuɛiyan-ndo kiloo leŋɔmpum, le ndu lomɔɔ mì tuei cun kɛndɛ kumii ndɔɛi. Mì la hin vɛlɛ a mɔiyan litilio o pilɛ a tálá. 14Háá mì paale niaa co ya Mɛlɛka sálà kon solul-ten le tiiya, la bɛnda mì la de ɲɛ-ɲɛ o ɲɛm niaa koawnin-ndon nin te, o va bulu, o va yasala toaŋaa, o va kulun sɛnɛi. Fonda oo fonda niaa va pɛ icali, la bɛnda mì la bii silaa ho le fɛɛn a fɛɛn.
Kafo koavaa
15Te kafo paale pɛngiaa cuu pɛ, diimandɔ niaa solulnin ya Mɛlɛka sálàá a tumbu tase niaa heelunin coo ya o hɔl-lo-o, la kandu palɛi cɔmndo. O kon, la cɔm lɔ́ɔ́lan tan ŋɔmmɛw yɛngɛsɛɛ. 16O lɔ́ɔ́la lan nin, te kafo paale pɛngiaa co le lɔ́ɔ́ ŋɔmmɛwndɔɔ-o cuu pɛ, diimandɔɔ palɛi ciŋa beleŋuɛɛnu. O kon, la solul ya Mɛlɛka sálà sɛnɛiyo a ɲɛm vaan. 17La va pɛ cɔnɔnndo o laniaa lo, la hin a bululan latiɔn-tiɔn le ya sálà heelunnin coo ya o hɔl-lo solullo. La bɛnda mì la toosiaa buloo a kpeyanndo kiloo leyàá, mì la vow lɛvɛnndo lecoo, mì la lom. La bɛnda mì la toosial-la bulu kon a ɲɛm tasen niaa koawnin-ndon. 18O sálà niaa solinin kon a buloo-o kɔɔli, la bɛnda vɛlɛ mì la solul-la sálà loamaa a saa téndéa nɔ vɔsio pilɛ-a nda ŋɔmmɛw, a bɛnda mà nɔ lenamta le, a naw tovaa o pilɛ a á saa kóndóa nda ŋiɔn. O kon kɔɔli, mì la hin vɛlɛ a sálà kpeyanndo a á sálà mamɔi tìw a kon-ndo. Sálàla nda lum ya Mɛlɛka, mì ɲɔɔ hɛnan ya lan la co lan ni. 19O kon kɔɔli, la solul-la vɛlɛ sálà co le hakio sɔlaa malɔɔ-o a cuin toovio pilɛ, a saa téndéa nɔ nin vɔsio pilɛ-a nda ŋiɔn le sálà kɔlɲuloo solio. 20Vana-solia-lasálàá cua pɛ bulu nda toosiaa kon a tumbu tasoo-o, o heelu ndu coo, o tosa falennde ya o hɔl a cɔlua kan latulu, handɔɔ niko saa téndéa ŋiɔnda lecoo. Ɲɛm dindin le Mɛlɛka mí n siŋnun teengen-ndon co mun ni. N cuu pɛ dindin lende ya Mɛlɛka o hɔl, mì n siŋnun teengen, vana-solia-lasálàá cua mun le ndu pila. 21Paale pilɛle len, la bɛnda mì la cuungian le kaannden, la bɛnda mì la tosa ɲinkon baala niaa tosa paandu-o le. Fonda oo fonda niaa va pɛ icali, la bɛnda mì la bii silaa ho le fɛɛn a fɛɛn.
22Telen niaa vanin ciɛɔn niaan kovɔɔ-o, la bɛnda mì la kow mun háá o dangaltan te. Yasala vanin delio lan bɛɛ, la cɔwviaa lan te. La mel vanaa ikɔɔa a mialla ɲɛm mun. Ya co Mɛlɛka ni, Hala niaa pɛɛn.›»
Kafo hɔŋaa labuloo (kafo vɔsi sɛnɛiyo)
23Mí Mɛlɛka soaa o Moise lo, mó dimul ndu aa: 24«Soo o Israɛlla lo ma dimul nda aa:
‹Paale taselen o paangii ŋɔmmɛwndɔɛi nin, la bɛnda mì la ce len maa paale pɛngiaalen le co ni. La cɔ vɛlɛ paale len maa paale loonannden le co le niaa ni. La bɛnda mì la cuungian ɲinkon, mì la lisa ya taw-taw a bululan hɔŋndo. 25La tósà ɲinkon baala niaa tosà paandu-o le, kɛ mì la solul-la sálàlan, mì la lom ndan o yin.›»
Paale bɛndule malaa lahakilen
26Mí Mɛlɛka soaa o Moise lo, mó dimul ndu aa:
27«Paale bɛndule co le hakilan sɔlaa malɔɔ len#23.27 Le paale bɛndule co le hakilan sɔlaa malɔɔ len, tofa vɔ bolle 16 ndɔlen o sɛb Tɔŋ lasálàá ho nin. le co paale tɔ́ndɔlen o paangii ŋɔmmɛwndɔɛi nin ni. Paale len, la bɛnda mì la cuungian le ya Mɛlɛka biiloo, mì la bii sumndo, mì la solul-la sálàlan, mì la lom ndan o yin. 28Paale len, la tosa baala oo baala le, kani paale bɛndule malaa lahakilen le co len ni. Ɲinkon, à bɛnda mà tosa faleŋii malaa lahakiei niaa Israɛlla coo ya Mɛlɛka o hɔl, ya Hala niaa pɛɛn. 29Vana-vana kɛɛ pɛ ɲinkon le sumndo biyɔɔ, à bɛnda mà faŋa ndu Israɛlla tɛɛn few-few. 30Vana-vana tosa pɛ baalaa ɲinkon, ya pila Mɛlɛka co ndu ɲumi ni. 31La bɛnda mì la tosa baala súú-súù ɲinkon te. Fonda oo fonda niaa va pɛ icali, la bii silaa ho le fɛɛn a fɛɛn. 32Paale len kpow, paale pɛngiaalen le co le niaa ni, la tosa baala oo baala ɲinkon te. La bɛnda mì la bii sumndo, kandɔɔ o paale ŋɔmahiɔɔlundɔlen icɔllo, háá diimandɔɔ, la tosa baala oo baala le.»
Kafo lakùùo
33Mí Mɛlɛka soaa o Moise lo, mó dimul ndu aa: 34«Soo o Israɛlla lo ma dimul nda aa:
‹Paangii ŋɔmmɛwndɔɛi ciŋa pɛ palɛi tɔ́ a iŋuɛɛnu, la kandu ɲinkon kafo lakùùo tosaa le ya Mɛlɛka. Kandɔɔ paale len, háá palɛi ndii ŋɔmmɛw, kafo kon bɛnda mò va tosanndo. 35Paale taselen, la bɛnda mì la bɔɔŋian le ya biiloo. La tósà ɲinkon baala niaa tosà paandu-o le. 36O palɛi ŋɔmmɛvii ken nin, la bɛnda mì la va ya sálàlan solullo lepalaa-lepala, mì la va lan lomɔɔ o yin. Paale ŋɔmaandɔlen, la bɛnda mì la bɔɔŋian le ya biiloo, mì la lum ya sálàá o yin. La tósà ɲinkon baala niaa tosà paandu-o le.
37Duɲan bɛndun niaa bɛnda le tosaa le ya Mɛlɛka biiloo-on co mún ni. O duɲan mún coo, la bɛnda mì la cuungian le ya biiloo, a le ya sálàla loamaalan, sálàla ɲɛm-vaalan, sálàla kɔlɲululan a sálàla mamɔilan solullo. Paalee-paale niaa va pɛ sálàá solio, la tosa mɛɛ silaa yɔngun niaa le paale len yɛ. 38La bɛnda mì la solul-la sálàla lan, lan la cɔɔlun o sálàla niaa solul-la o paale pɛngiaalen coo lan, o ɲɛm ikɛndɔn, o sálàla niaa bàá yoolen o Mɛlɛka lo lan a o sálàla niaa solul Mɛlɛka a yeemɛi niɛi lan coo ni.
39Te paangii ŋɔmmɛwndɔɛi ciŋa pɛ palɛi tɔ́ a iŋuɛɛnu, mì la cii nin tɔlɔɔla niaalan kiɔndɔɔ a ciɛɔn niaan kovɔɔ o lɛŋnde len kpow nin, la kandu ɲinkon kafoo tosaa le ya Mɛlɛka. Kafo kalaa tosannin háá palɛi ndii ŋɔmmɛw. La tósà baalaa o paale taselen a o paale ŋɔmaandɔlen coo le. 40Paale tasele len le tiiya pɛ, la cua komɔɔla kɛndɛ-kɛndɛlan, la kelu siɔ̀ɔ́la vawlan, lɛvun yɔmii bɛndu-bɛnduei a yɔmii pɔmbɔɛi vul mì i tosa bɔɔlan o peelan kɔngɔ-e, la viow kponyoo ya Mɛlɛka o hɔl palɛi ndii ŋɔmmɛw. 41Vɔsi oo vɔsi, te paangii ŋɔmmɛwndɔɛi tiiya pɛ, la bɛnda mì la tosa kafoo ho háá palɛi ndii ŋɔmmɛw le ya Mɛlɛka biiloo. Kandɔɔ a niaa pila, kɔ bii a cuavaa niaa imamaa, la bii tɔŋndo ho le fɛɛn a fɛɛn. 42Niaa pilacieea Israɛl, la bɛnda mì la va o kùùlan bɛngu háá mì palɛi ŋɔmmɛvii ken i cuu, 43haliko mi cuavaa niaa imamaa hun sina fɛɛn maa o kùùlan bɛngu fuɲaa ndaa mamaa kei lɔan ni, telen ya Mɛlɛka soli nda o lɛŋnde Esipte len nin-ndo pɛɛn. Ya co Mɛlɛka ni, Hala niaa pɛɛn.›»
44Mɛɛ nuaa Moise tɛɛsial Israɛlla kafola ndáà bɛnda le tosaa le Mɛlɛka biiloo lan ni.
Currently Selected:
Tɔŋ lasálàá 23: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
