Tɔŋ lasálàá 21
21
Mɛɛ vanaa-solia-lasálàá bɛnda mà va Mɛlɛka o hɔl-lɛ
1Mí Mɛlɛka dimul Moise aa: «Dimul vanaa-solia-lasálàá, poaa Aarɔn-nda sɔɔn mun aa:
‹Vana-solia-lasálàá bɛnda mò siŋnun vana nɔɔlɛiyo Mɛlɛka o hɔl a dɛnɛ vana vílɛ́i co vanayɛi ndɔɛi-yo o kɔɔ le. 2Fɔ mì vana vílɛ́i kon va vanayɛi ndɔɛi kɛsɛ-kɛsɛi maa kala ndɔ, fuɲa ndɔ, po ndɔɔ, cua ndɔɔ, bɛ ndɔ, te kon te pɔmbɔ ndɔ. 3Te o nɔ vɛlɛ pɛ yema ndɔ laandu hiw-vɔ vanapɔnɔ kɔɔli loo, o nɔla mo siŋnun vana nɔɔlɛiyo le dɛnɛ ndɔɔ. Kani yema ndɔ kon ndóò luei-yɔ o yungu vanapɔnɔ celen nin te, o va vɔ o yungu ndɔɔ nin, nɛɛ nda velu ndu-a. 4Vana bɛndoo vana-solia-lasálàá co vanaa ndɔa tɛɛn ni, lelan o bɛnda mò nɔɔlian Mɛlɛka o hɔl te, yɔŋii o del kasi mò laasian.
5Vanaa-solia-lasálàá bɛnda mà sendin kàŋndan o lebol te, a bɛnda mà sendi kangbala ndalan te, a bɛnda vɛlɛ ma keŋnun vaasan lekɔɔ le. 6Vanaa-solia-lasálàá bɛnda mà va vanaa diandaa siŋnun teengen le ya Mɛlɛka baalaa tosallo-a, yɔŋii nda nɔɔliaa diola nilan. Kani nda hɛlin le ya sálàlan solullo mì la ŋɔɛ o yinnden nin ni, ɲɛdiaa nuu co yɛ kon ni. Lelan a bɛnda mà va vanaa diandaa siŋnun teengen le ya Mɛlɛka-a.
7Vana-solia-lasálàá bɛnda mò cua vanalanɔ suundɛiyo, te kon te vanalanɔ vanapɔnɔ celen laasiaa nin-ndo o nɔ̀u nin te. Ò cua vɛlɛ vanalanɔ pɔnɔ ndɔ kɛɛ-o o nɔ̀u nin te. Kani vana-solia-lasálàá bɛnda mò va vana diandaa siŋnun teengen le vali Mɛlɛka-o-o. 8Israɛlla kpow, la bɛnda mì la ce vanaa-solia-lasálàá maa vanaa diandaa nda co ya Mɛlɛka o hɔl ni. Kani nda co ya ɲɛdiaa niaa co ya yɔngoo-o tiiyallo ni. La cɔ nda maa vanaa diandaa nda co ni. Kani o diandaa ya Mɛlɛka co ni, ya hɛli Israɛlla le siŋnɔnndo yungu diandaa ni.
9Te cua vana-solia-lasálàá laasian pɛ o suundaa nin, mɛɛ fuɲa ndɔ o ke diola vɔɔnndan lende ni. Lelan, a bɛnda mà lom ndu a yinnden mò ŋɔɛ.
10Vana-solia-lasálà sɔla hɛlio le vaa bolle vanaa-solia-lasálàá kpow-vo, o nda tala cuɛima diandan o lebol o paale kafo kandaa baalalen coo le ndu pɔlaa-o, ó cuɛinun volɔɔla diandaalan le baala Mɛlɛka-o-o, o bɛnda mò puusian yiinde o lebol te. O bɛnda mò sɛɛsian volɔɔla cuɛinanndan lekɔɔ le biisio le. 11O bɛnda mò sɔɔnguu vana vílɛ́iyo ikɛi le. Hali fuɲa ndɔ, te kon te kala ndɔ vu bɛɛ, o bɛnda mò siŋnun vana nɔɔlɛiyo Mɛlɛka o hɔl le nda le. 12O bɛnda mò faŋan o Fonda-Diandaa nin mò fula o bɛ́ɛ̀ le, yɔŋii o nɔɔliaa cɛi ni diandaa. Kani o sɔla pɔlaa le baala nuu tosaa. Ya co Mɛlɛka ni.
13Bolle vanaa-solia-lasálàá va pɛ lanɔɔ yilɔɔ, o bɛnda mò yil vanalanɔ hiw vɔ vanapɔnɔ kɔɔli loo. 14O bɛnda mò cua vanlaandua ha o pilɛ o nɔ̀u nin te: vanalanɔ pɔnɔ ndɔ vi-o, vanalanɔ pɔnɔ ndɔ kɛɛ-o, vanalanɔ suunda nin-ndo. Kɛ o bɛnda mò yil vanalanɔ hiw vɔ vanapɔnɔ kɔɔli loo o nɔ̀u nin o vanayan ndɔn tɛɛn, 15yɔŋii o luei polale laasiɛilen o yungule ndɔlen nin. Ya co Mɛlɛka ni. Ya hɛli ndu ni mí dindi ndu le baala nuu.›»
Vanaa tambɛiya o polale vanaa-solia-lasálàá coo a bɛnda mà solul Mɛlɛka sálàá le
16Mí Mɛlɛka soaa o Moise lo, mó dimul ndu aa: 17«Soo o Aarɔn-ndo mà dimul ndu aa:
‹Kandɔɔ hau háá le fɛɛn a fɛɛn, vana-vana va pɛ namtanɔɔ o polale ndu Aarɔn-nden coo, vana kon bɛnda mò tiiyal Mɛlɛka ɲɛdiaa sálàá le. 18Namtaa kan co haa ni, á bɛnda mà sɔɔnguu lon te-a pɛɛn: vana sumɛiyo, vana bɛngu tambɛiyo, vana falei pilɛ hiow bandei a i pilɛi-yo, 19vana bɛngu yomɛiyo, te kon te vana congú yomɛiyo, 20vana ibuuvo, tungoo, vana itɛɛngɔɔ, vana ihuindo, vana lakàváá, vana nda tɛnda bosio-o. 21Vana-vana va pɛ namtanɔɔ o polale Aarɔn-nden coo, le fɛɛn a fɛɛn, o bɛnda mò sɔɔnguu o fonda-loamaa-lasálàá ikɛi le ya sálàá lumndo le. Le tùú o co namtanɔɔ-o, o bɛnda mò sɔɔnguu a ɲɛdiaa le Mɛlɛka ndu lumndo le. 22O tiwba mò de ɲɛm solin sálà le ya Mɛlɛka-on, o va ɲɛm dian diandaa-diandan, o va ɲɛm dian diandan. 23Kɛ le tùú o co namtanɔɔ-o, o bɛnda mò sɔɔnguu o kola-landaa co o Cɛi-Diandaa nin-ndo ikɛi le. O bɛnda vɛlɛ mo sɔɔnguu o fonda-loamaa-lasálàá ikɛi le, yɔŋii o nɔɔliaa fonda ni diandaa. Kani ya co Mɛlɛka ni, ya hɛli vanaa-solia-lasálàá ni mí dindi nda le baala nuu.›»
24Mí Moise tɛɛngul Aarɔn, poaa ndɔa a Israɛlla kpow sɔɔn mun.
Currently Selected:
Tɔŋ lasálàá 21: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
