Tɔŋ lasálàá 14
14
Mɛɛ vana nàà siaŋaa bɛnda mò dindin yɛ
1Mí Mɛlɛka soaa o Moise lo, mó dimul ndu aa: 2«Falenndon co mun le dindin vana nàà siaŋaa ni: te a hin pɛ a ndu o vana-solia-lasálàá lo, 3vana-solia-lasálàá fula o dɔ́ɔ́ngɔ́ɔ̀ kɔɔli le ndu mɛɛndianndo. Te o ce pɛ maa vana nɔ kon nàà kon-ndo sengu a nàà ndɔɔ, 4o dimi aa le dindin ndɔɔ, a bɛnda mà hin a yovaa kiyɛiya nda ŋiɔn, yovaa dendu Mɛlɛka o hɔl-la pɛɛn, a pɛngɛi yɔm sɛɛdre, a kola nda yin yinɔɔ siaŋa vólotótoo-o a bil hisɔp. 5O kon, vana-solia-lasálàá dimi le yow tasoo bololan kiolɔɔ o kpɛɛnɛi puuluei coo, i mɛmma peean ma co mapiaa nin-nde. 6O kon, o cua yow lo o kiyɛiyo-o, pɛngɛi yɔm sɛɛdre, kola nda yin yinɔɔ siaŋa vólotótoo-o a bil hisɔp, o pɔɔla ɲɛm mun a yow kiyɛiyo latulu o kooma yow nda kelu bololan o kpɛɛnɛi mɛmma peean ma co nin-nde coo-o. 7O cii pɛ, o vesul vana co dindinndo a nàà kon-ndo a man bɛmbɔɔ leŋɔmmɛw, o dimi aa vana diandaa vana kon co ni. O mal yow kiyɛi kon kɔnndan o yondo bɛndoo nin levil pɔ́-pɔ́. 8O kon, vana co dindinndo-o tɔɔ volɔɔla ndɔla cuɛinanndan, o sendi yiiŋii o nɔ nɛɛ-nɛɛ ka-e, o pulun a mɛnndan cɛ́kɛ́lɛ́, o dendu Mɛlɛka o hɔl. Te kon cuu pɛ, o muungu o dɔ́ɔ́ngɔ́ɔ̀ nin, kɛ o bɛnda mò tosa palɛi ndii ŋɔmmɛw o luei o cɛi-kola-toandaa ndɔɔ nin te. 9O paale ŋɔmmɛwndɔlen coo, o sendi yiiŋii ndɔɛi lebol-le, siɛye, yiiŋii lakoongoi, a yiinde ndu lekɔɔ kpow. O kon kɔɔli, o tɔɔ volɔɔla ndɔla cuɛinanndan, o pulun a mɛnndan, o siŋnun vana diandaa. 10O paale ŋɔmaandɔlen, o bii saa kóndóa téndéa nɔ lenamta le-a nda ŋiɔn, saa téndé laandu nɔ lenamta loo, o nɔ vɔsio pilɛ-o, kpeyan vɔɔcan a cuɛiyan-ndo kiloo leŋɔmahiɔɔlu, a cuɛiyan litili táláá. 11O kon, vana-solia-lasálà vanin sɔɔn mun toosiaa-o simi vana co dindinndo-o a ɲɛm o hin le sálàá solio-on kpow Mɛlɛka o hɔl, o cɛi-kola-toandaa-labɔɔŋianndo sondoo. 12O kon, vana-solia-lasálàá cua saa kóndó téndóó o pilɛ, o soli ndu sálà bɛɛndiaa isɔɔ a cuɛima litili táláma o yɔngu-an, o tosa faleŋii vana heelu ɲɔɔ coo le Mɛlɛka ndu cɔmndo-e. 13Kon cuu pɛ, o kelu saa téndé kalaa bololan o fonda nda kialu cɔlua co le sálà co le hakio sɔlaa malɔɔ-o-a a cɔlua co le sálà loamaa-a bololan-nda, nɛɛ diandaa pum. Kani cɔlu sálà bɛɛndiaa isɔɔ a cɔlu sálà co le hakio sɔlaa malɔɔ-o, le vana-solia-lasálàá nda co ni, ɲɛ diandaa-diandaa kɛsin le nda-o co kon ni. 14O kon, vana-solia-lasálàá cua kooma cɔlu co le sálà bɛɛndiaa isɔɔ-o-an, o sui man o nile tiilannde ba kɛndɛle vana kon coo, o suei bɛndui ba ndɔ kɛndɛi coo, a o suei bɛndui bɛngu ndɔ ba kɛndɛi coo. 15O cii pɛ tosa lende, ndu vana-solia-lasálàá pila cua cuɛiyan, o talan man o ba mɛl ndɔɔ nin. 16O kon, o yin suei ba kɛndɛi ndɔɛi o cuɛima o talan man o ba mɛllo nin-ndan nin, o vesul man bɛmbɛ leŋɔmmɛw Mɛlɛka o hɔl. 17O cii pɛ kon, o sui cuɛima tɔ̀ma lo ndu o ba-an o nile tiilannde ba kɛndɛle vana co kon dindinndo-o coo, o suu ndu man vɛlɛ o suei bɛndui ba kɛndɛi a o suei bɛndui bɛngu ba kɛndɛi, o kooma cɔlu sálà bɛɛndiaa isɔɔ coo. Kani o falun mun koni o suu kooma saa téndé yɔngun le sálà bɛɛndiaa isɔɔ solio-o ni. 18Vana-solia-lasálàá cii pɛ kon kpede tosa, o tala cuɛima tɔ̀ma lonin o ba ndɔ kɔllo nin-ndan vana kon o lebol. O kon, o tosal ndu faleŋii dindiannde Mɛlɛka o hɔl. 19O kon kɔɔli, o soli sálà co le hakio sɔlaa malɔɔ-o, o tosa vɛlɛ faleŋii dindiannde le vana yeema le dindinndo-o, haliko mo dendu Mɛlɛka o hɔl. O cii pɛ, o kelu cɔlu co le sálà loamaa solio-o bololan, 20o lom ndu kpede a kpeyanndo latulu o fonda-loamaa-lasálàá coo, o tosa vɛlɛ faleŋii dindiannde ndu coo. O kon, vana kon dendu.»
Mɛɛ vana bala fondo nàà siaŋaa bii-o bɛnda le dindinndo Mɛlɛka o hɔl-lɛ
21«Te vana bɛnda le dindinndo a nàà siaŋaa-o va pɛ vana bala fondoo, mò nɔ se le cɔwviaala kelun-ndan sɔlaa le, o bii saa téndóó ndu pilɛ le sálà bɛɛndiaa isɔɔ solio, haliko mi vana-solia-lasálàá heelu ndu coo, mò tosa falennde, mò yɔngu Mɛlɛka sálà kon le dindin ndɔɔ, a kpeyan vɔɔcan a cuɛiyan-ndo kiloo leyàá a cuɛiyan litili táláá. 22O kon, o bii vɛlɛ piinda nda ŋiɔn a kangboa nda ŋiɔn, mɛɛ o nɔ seo yɛ. Yovaa kan, o pilɛ le sálà co le hakio sɔlaa malɔɔ-o solio, o pilɔɔ le sálà loamaa solio. 23O paale ŋɔmaandɔlen coo, o yoo vana-solia-lasálàá ɲɛm mun o cɛi-kola-toandaa-labɔɔŋianndo sondoo Mɛlɛka o hɔl le dindin ndɔɔ. 24O kon, vana-solia-lasálàá cua saa téndé co le sálà bɛɛndiaa isɔɔ-o a cuɛiyan, o tosa faleŋii vana heelu ɲɔɔ coo le Mɛlɛka ndu cɔmndo-e, o cɔm ndu ɲɛm mun. 25O cii pɛ, o kelu saa téndóó bololan, o haw koovan, o sui man o nile tiilannde ba kɛndɛle vana kon coo, o suu man vɛlɛ o suei bɛndui ba kɛndɛ ndɔɔ a o suei bɛndui bɛngu ba kɛndɛ ndɔɔ coo. 26O tala cuɛiyan o ba mɛl ndɔɔ nin, 27o yin suei ba kɛndɛi lenin, o vesul man bɛmbɛ leŋɔmmɛw Mɛlɛka o hɔl. 28O kon o tala man ɲɛ-pɔmbɔ o nile tiilannde ba kɛndɛle vana kon nin, o suu man o suei bɛndui ba kɛndɛi ndɔɛi a o suei bɛndui bɛngu ba kɛndɛi ndɔɛi coo, o kooma saa téndé co le sálà bɛɛndiaa isɔɔ-o-an coo. Kani o falun mun o suu kooma man ni. 29O kon o tala cuɛima tɔ̀ma lonin ndu o ba kɔllo-an vana kon o lebol, o tosa faleŋii dindiannde Mɛlɛka o hɔl le vana kon. 30O kon vana-solia-lasálàá cua vɛlɛ piindo o pilɛ, te kon te kangboo o pilɛ, mɛɛ vana kon nɔ seo yɛ, 31o soli o pilɛ sálà co le hakio sɔlaa malɔɔ-o, o soli o pilɔɔ sálà loamaa a kpeyanndo latulu. O kon kɔɔli, o tosa vana kon faleŋii dindiannde coo Mɛlɛka o hɔl. 32Silalan la co lan le dindin vana bala fondo nàà siaŋaa bii-o ni.»
Sɔŋnda fula o cɛiyo lan
33Mí Mɛlɛka soaa o Moise nda Aarɔn ndo, mó dimul nda aa: 34«Telen niaa tiiyanin o lɛŋnde Kanaan-nden nin-ndo, lɛŋnde ya yɔngu niaa len, te la ce pɛ mì soli sɔŋ velan a yullo-o o cɛiyo pum o lɛŋnde niaale sɛnɛile len nin, 35vana cɛi kon bɛnda mò kɔ dimul vana-solia-lasálàá sɔɛi ken aa: ‹I saalun sɔŋndo pum o cɛi nuu maa yul.› 36O kon vana-solia-lasálàá yɔngu diomndo, a soli ɲɛ-ɲɛ co o cɛi kon nin telen pá mì ndu pila tiiya lon le sɔŋ kon mɛɛndianndo. Taa yunga pɛ cɛi kon lende, mɛɛ ɲɛ-ɲɛ vanin cɛinin, o síŋnunnin ɲɛ nɔɔlɛi le. A cii pɛ ɲɛlan soli kpede, vana-solia-lasálàá luɛi niko cɛinin le ndu mɛɛndianndo. 37Te o mɛɛndian pɛ, mo ce maa sɔŋ kalaa buuluu tɛɛngun co tiŋ maa peele kiyɛi, te kon te n'siaŋa-on o cìì cɛiyo, mì tɛɛngun mun va n'toawnanndon, 38o fula cɛi kalaa nin. O sim pɛ o kèédei coo, o kinda dioo le palɛi ndii ŋɔmmɛw. 39O paale ŋɔmmɛwndɔlen coo, vana-solia-lasálà kon muungu vɛlɛ lon le sɔŋ kon mɛɛndianndo. Te o ce pɛ maa sɔŋ kalaa cɔɔlu pɛngɛlan o cìì cɛi kon coo, 40o yɔngu diomndo, a bɛŋi powta sɔŋ kon pilan-ndan, a soli lan o cìì cɛiyo. A soli pɛ lan, a kɔ viow lan o kobio kɔɔli polon, nɛɛ nɔɔlɛiya pum. 41O kon kɔɔli, vana-solia-lasálàá sɛɛluu cìì cɛiyo lenin kpow, a kɔ hulu puulu kon o kobio kɔɔli polon, nɛɛ nɔɔlɛiya pum. 42Kon cuu pɛ, a cua powta celen, a mingi handɔɔ o fonda powta tasela sɔŋndo pilan-ndan la va-o, a linda vɛlɛ puulu celen a mingi cɛiyo yikpa. 43Taa cii pɛ tosa lende kpow, mì sɔŋndo muungu vɛlɛ mò fula, 44vana-solia-lasálàá muungu vɛlɛ o kɔ mɛɛndian. Te o ce pɛ maa sɔŋndo cɔɔlu vɛlɛ fula mó pɛngɛlan o cìì cɛiyo, mɛɛ yul vɔɔn-vɔɔndo co kon ni. Le hee, cɛi nɔɔlɛiyo cɛi kon co ni. 45Cɛi kon bɛnda mò piɔl vɔ́-vɔ́, kandɔɔ a powta nda cɔw ndu lan, a yɔmii nda tangul ndu-e, kɔ bii a puulu nda yikpa ndu-o, ɲɛm mun kpow n bɛnda mì n viownun o kobio kɔɔli polon, nɛɛ nɔɔlɛiya pum. 46Vana-vana luɛi pɛ o cɛi vaa lende nin telen o co o kindaa-o, vana kon lonin o nɔɔlɛiyo háá icɔllo. 47Vana-vana hini pɛ cɛi kon nin, o bɛnda mò tɔɔ volɔɔla ndɔla cuɛinanndan. Vana-vana de vɛlɛ pɛ ɲɛdiaa lenin, o bɛnda mò tɔɔ volɔɔla ndɔla cuɛinanndan. 48Kɛ te vana-solia-lasálàá muungu pɛ le cɛiyo cɔɔloo mɛɛndianndo, mo ce maa sɔŋndo fula lɛ fula celen o yikpa sɛnɛi kon coo le, o dimi maa cɛi diandaa cɛi kon co ni. Kani sɔŋndo faŋan few.
49Le faleŋun dindia cɛiyon tosaa, vana-solia-lasálàá bɛnda mò bii yowva nda ŋiɔn, pɛngɛi yɔm sɛɛdre, kola nda yin yinɔɔ siaŋa vólotótoo-o a bil hisɔp. 50Mò kelu yow tasoo bololan o kpɛɛnɛi puuluei coo, i mɛmma peean ma co mapiaa nin-nde. 51O kon kɔɔli, o cua vɛlɛ pɛngɛi yɔm sɛɛdre, bil hisɔp, kola nda yin yinɔɔ siaŋa vólotótoo-o a yow lo o kiyɛi-yo, o pɔɔla ɲɛm mun kpede, o yin mun o kooma yow o kelu bololan o mɛmma peean coo-o nin. O kon, o vesul kooma man bɛmbɔɔ leŋɔmmɛw o cɛi kon. 52Te o tosa pɛ lende, mɛɛ o dindi cɛi va kon o nɔɔlɛiyo-o a kooma yowvo, a mɛmma peean, a yow kiyɛiyo, a pɛngɛi yɔm sɛɛdre, a bil hisɔp a á kola nda yin yinɔɔ siaŋa vólotótoo-o. 53O kon, o mal yow kiyɛiyo kɔnndan yondo bɛndoo nin levil pɔ́-pɔ́. Kon cuu pɛ, o tosa faleŋii dindiannde, cɛi kon muungu o diandaa Mɛlɛka o hɔl.
54Tɔŋndo co hoo le nààla siaŋala súúla yɛ́-yɛ́la fula vana o yáwvo coo lan, le tɛɛnndan, 55-56le kpukpon, le tafion, le sɔŋnda fula vana lekɔɔ lan a le sɔŋnda fula o volɔɔla cuɛinanndan coo a o cɛilan coo lan ni. 57Tɔŋndo ho nɔla mò mala niaa le sinaa te vanacieo, te kon te volɔɔ celen co o diandaa, te kon te o nɔɔlɛiyo Mɛlɛka o hɔl.»
Currently Selected:
Tɔŋ lasálàá 14: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
