Osee 13
13
Nila kalulan a tambii Israɛlla
1«Te cuavaa-imamaa Efraim-nda ndáà va pɛ sɔɛi,
siòònde ndíì bii vannda kpow.
Langbaa kɛsun kálàá nda va Israɛl ni.
Kɛ má del kasi le sooluu
nda sooluu piɔmndo Baal-lo,
má sɔla piɔ́mndo.
2Háá sisa, a co hiovɔɔ laci a hakilan tosaa,
a co volin ndan teengiaa
mà va piɔmnda cownɔnndo a mun.
Piɔmaa nda pila co cɔvɔɔ-a kpow,
vanaa caa cɔwva-a co nda cɔvɔɔ ni.
Vannda co dimio a nda o kɔɔ aa:
‹Vanaa co sálàlan solio a vanndacieea-a
nɔla ma kɔman piɔmaa co
maa navaa téndé-a,
mà sɔsa nda sondolan le nda sooloo.›
3Lelan, a vanin maa mɔ́m idii,
maa kɛmma yala vesa cɔ́-cɔ́-an,
maa kefun hoeiye kɔandu
mí i faŋa mun o kpele lɔaa n'mallo coo-on.
A vanin vɛlɛ maa kumii
co fulaa o fɛ̀ɛ̀fɛlan-nde.
4Ya yɛ, kabi kandɔɔ o lɛŋnde Esipte len nin,
ya co Mɛlɛka Hala niaa ni.
La sina Hala celen o ya kɔɔli le,
vana ciindiaa celen co o ya kɔɔli le.
5I síná niaa o lɛŋnde veselɛilen nin,
o lɛŋnde paalen le fùlà taw len nin.
6Mɛɛ niaa tiiya o yondo puiyaa nin,
mí la dia, mí lapum cá.
Mɛɛ niaa pim,
mí kɔlta yongalan la luɛi niaa nin,
mí la pɔɛɛnun ya.
7Kɛ i siŋnunnin le niaa maa yàlà kana,
mí mɛngɛla niaa o nɛilan coo maa tambili.
8I kpuvanin niaa maa kɔ́lɔ́vúlu nda cuel cuavaa ndɔa-o,
mì sɛɛsiaa yala kɔlta niaalan la co nin-ndo.
I sɔamnin niaa maa yàlà laandu,
mì visia yondoa siow niaa sɛɛsiaa.
9Ɲɛ co niaa co laasiaa-o, niaa Israɛlla,
le tùú niaa ciŋilan ya-o.
Niaa yɛ, la ciŋilan ya vana co niaa malaa-o.
10Ɔ́ɔ̀ niko masa niaa?
Mɛɛ o baŋa niko niaa
o kobila niaalan kpow nin!
Kuɛɛ simlacia niaa co yɛ?
A niaa va dimio a nda o kɔɔ
aa ya ke niaa masaa a simlacia-a pɛɛn.
11I ke niaa masaa o kɔl ni tuwvo nin,
i puunin ndu niaa o ba o kɔl ni fulaa nin.
12Yɔŋ vɔɔn cuavaa-imamaa Efraim-nda co o mandaa,
hakila ndalan la co la kɛsiaa kɔ́dɔ́!
13Sangaa toalnin nda coo
mɛɛ dembe vialaa nɛi vanalanɔɔ nuaa yɛ.
O co cɛlɛkpɛa nɔ kɔlkalu le nda co le.
Telenndo tiiya bɛɛ le violɔɔ kala nda-o,
a cɛl le keleŋaa fulaa ndu o dembe le.
14I baŋanin nda mì soli nda ciee-piɔ́m,
i solinin nda o kpòndò piɔ́mndo bɛngu.
Òó piɔ́mndo! Ɔ́ɔ̀ ɲɛm cɔvun n tiindan-ndon?
Òó ciee-piɔ́m! Ɔ́ɔ̀ kpaaya nɔm tɛɛmbua?
I tofa lɛnin nda mì ɲíí bii ya le.
15Cuavaa-imamaa Efraim-nda,
ndáà pɛlnun ladio puapilɛa ndaa tɛɛn.
Kɛ hoeyii cɛn a ba paalen le can-ndo-e co hunɔɔ,
hoeyii Mɛlɛka-e co cɔnɔnndo
o lɛŋnde veselɛilen nin, mì va heeloo.
I veesiaanin peela lebolta cuavaa Efraim-nda,
mì soonnda kólaala ndalan la vela.
Bolofaa ndaa a ɲɛm vɔngu ndan báà kalan
cuannunnin mì n kɔɛnnun.»
Currently Selected:
Osee 13: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
