Fulaa 30

Fonda nda loam ansan coo-o

1«Ma cɔw vɛlɛ fonda-loamaa-lasálàá a pɛngɛn akasia le ansan lomɔɔ lecoo. 2Mì kpengon va ɲɛ pilɔɔ: bandei dunndo lepilɛ, buo dunndo lepilɛ, simndan dunndo lediin. Mì kpɛ̀ɛ́n ndɔn va n'baalanndon a ndu pila. 3Kandɔɔ lecoo, kpengun ndɔn, kɔ bii a kpɛ̀ɛ́n ndɔn, ma yikpa mun a sianin diandan. Ma balu ndu sianion holɔɔ o cɔcɔn pindo. 4Ma cɔw kelan n'sianion mún miun, ma baa mun o cɔcɔn bɛngu. Lon niaa vownin kpɔlɔnndan le ndu cuaa ni. 5Ma sɛl kpɔlɔnnda lan a pɛngɛn akasia, ma yikpa lan a sianion. 6Ma kɛsi fonda-loamaa-lasálà kon o kola-landaa ven kesu kpema-o hɔl-ndɔ, o kumbu co o kesu kpema kon coo-o laci. O kumbu kon coo ya vanin nɔm cɔmnɔnndo ni. 7O fonda-loamaa-lasálà kon coo Aarɔn vanin ansan lomɔɔ telen o vanin fitinalan vɔɔsuuo idii oo idii o cɛi-kola-toandaa diandaa nin-ndo ni. 8Lecoo koni o vanin ndu lomɔɔ telen o vanin ndan mɛndullo icɔl oo icɔl-lo ni. Le fɛɛn a fɛɛn, la bɛnda mì la va ansan lomɔɔ ya o hɔl. 9La vá ansan súú-súù ka lomɔɔ o fonda-loamaa-lasálà kon coo le, la sólì sálà loamaa lecoo le, là soli sálà ɲɛm vaa lecoo le, là tala vɛlɛ sálà mamɔi lecoo le. 10Aarɔn bɛnda mò tosa faleŋii baŋannde o kpɛ̀ɛ́n fonda-loamaa-lasálà kon coo bɛmbɛ lepilɛ o vɔsio nin, a kooma cɔlu diinunnin le sálàá solio le hakio sɔlaa malɔɔ-o-an o bɛnda ni mo tosa faleŋii ken o kpɛ̀ɛ́n fonda kon coo. Le fɛɛn a fɛɛn, lende o bɛnda ni mo tosa faleŋii baŋannde lecoo bɛmbɛ lepilɛ o vɔsio nin. Kani fonda diandaa pila co kon le Mɛlɛka ni.»

Muloo le Cɛi-Diandaa

11Mí Mɛlɛka soaa o Moise lo, mó dimul ndu aa: 12«Tuma n vanin Israɛlla diolan sɛvaa a pilɛn-pilɛnnda le sinaa mɛɛ nda co kunda yɛ-o, vana-vana bɛnda mò mal muloo o ya Mɛlɛka lo le yoomu ndɔɔ baŋaa telen sɛva kon vanin tosanndo-o. O kon kpundɛ oo kpundɛ komalnin nda telen sɛva kon vanin tosanndo-o le. 13O vanaa sɛvannin-nda nin, vana-vana bɛnda mò yɔngu tààngáà mɛɛ volin latámán co dionnɔnndo o Cɛi-Diandaa nin-ndon co yɛ. Le ya Mɛlɛka mulu kon biinunnin ni. 14O vanaa sɛvannin-nda tɛɛn, vana-vana nɔ pɛ vɔsilan bidiin, te kon te hiovɔɔ bidiin coo, ndu bɛnda mò yɔngu cuungiaa kon le baala Mɛlɛka-o. 15Vana bolofaa bɛnda mò yɔngu hiovɔɔ kon coo le, vana bala fondoo bɛnda mò kɛɛ suili le, vana-vana bɛnda mò yɔngu le Mɛlɛka mɛɛ o kelun yɛ le yoomu ndɔɔ baŋaa. 16Nɔm Moise, ma bii ɲɛ-sɔlaa kon Israɛlla o laba le yoomula ndalan baŋaa, ma yɔngu ndu le baala cɛi-kola-toandaa-labɔɔŋianndo. Kon tosanin ni mì va loonɔnndo maa vana-vana mal muloo, mò baŋa yoomu ndɔɔ.»

Fɛngɛ bɛndu mamɛnndo

17Mí Mɛlɛka soaa o Moise lo, mó dimul ndu aa: 18«Cɔw fɛngɛ bɛndu mamɛnndo a daɲan le dindinndo, ma toosiaa fonda fɛngɛ bɛndu kon bɛnda le tumndo kɛsio coo-o a daɲan. Ma kɛsi ndu o cɛi-kola-toandaa-labɔɔŋianndo a fonda-loamaa-lasálàá tɛɛn, ma pei ndu ca a mɛnndan. 19A mɛmma man Aarɔn nda poaa ndɔa bɛnda ni mà va balan a pelon pulɔɔ. 20Tuma pá nda luɛi o cɛi-kola-toandaa-labɔɔŋianndo nin, fɔ mà kei fɔlɔn pelon a balan pulɔɔ a mɛmma man, yɔŋii nda sɔla piɔ́mndo. Tuma pá mà sɔɔnguu vɛlɛ o fonda-loamaa-lasálàá ikɛi le sálà ŋɔa o yin-ndo solio o Mɛlɛka lo, a bɛnda mà pulu pelon a balan a man, yɔŋii nda sɔla piɔ́mndo. 21Le fɛɛn a fɛɛn, kandɔɔ a Aarɔn pila, kɔ bii a poaa ndɔa, a bɛnda mà bii tɔŋndo ho.»

Cuɛiyan le pɔlaa

22O kon kɔɔli, mí Mɛlɛka soaa o Moise lo, mó dimul ndu aa: 23«Nuwviaa ɲɛm cun kɛndɛ-kɛndɔn: mir landenndo kilolan laŋuɛɛnu, kanɛl cun kɛndɔɔ kilolan latiɔn a tálá, sinanɔm kilolan latiɔn a tálá, 24kase#30.24 Tɔlɔɔlan ndan: mir, kanɛl, sinanɔm, kase… la co lɛŋnde makisi le. Kisia sina lan diolan te. Lelan naa n yow diomndan ndan ni. kilolan laŋuɛɛnu, mì vɔngu ɲɛm mun cɔmnun o volin co dionnɔnndo o Cɛi-Diandaa nin-ndon nin, a cuɛima olivean litililan laŋɔmpum. 25A ɲɛm mun n toosiaanin cuɛiyan le pɔla diandaa ni. Ma yɔngu vana toosiàà lasikɔlɔɔ-o ɲɛm mun, mò toosiaa cuɛima pɔlan a mun. 26Ma cua cuɛima man, ma pɔla cɛi-kola-toandaa-labɔɔŋianndo, kesu kpemaa, 27tabalio a ɲɛm ndɔn laandon, ɲɛ kɛsiaa lafitinaa a ɲɛm ndɔn, fonda loamaa ansan, 28fonda loamaa sálà loamaa a ɲɛm ndɔn laandon kpow, a fɛngɛ bɛndu mamɛnndo a fonda o kɛsi tumndo coo-o. 29Ma dindi mun ya Mɛlɛka o hɔl few-few. Ɲɛ-ɲɛ pilan nin mun pɛ, ndu bɛɛ siŋnun le Mɛlɛka. 30Ma pɔla vɛlɛ Aarɔn nda poaa ndɔa haliko ma siŋnun vanaa-solia-lasálàá le vali nuu.

31Ma dimul vɛlɛ Israɛlla sɔɔn mun: ‹Le fɛɛn a fɛɛn, le vali Mɛlɛka-o kínɛí cuɛima pɔlan man ma bɛnda mi ma va ni. 32O co cuɛima vana suunun te, la toosiaa vɛlɛ cuɛima súú vaa lende le kpeku celen te. Cuɛima diandan ma co le vali Mɛlɛka-o ni, la cɔ man maa madiandan ma co ni. 33Vana-vana toosiaa pɛ cuɛima súú vaa lende mò suu vana celen man, te o co yɛ vana-solia-lasálàá le, a bɛnda mà soli vana súú kon vanndo man-ndo Israɛlla tɛɛn po.›»

Le ansan toosiaa

34Mí Mɛlɛka dimul vɛlɛ Moise aa: «Nuwviaa ɲɛm nɔ cun kɛndɔɔ-on: staktee, pow onikse a kalbanɔm, ma cua ansan yukuyukoo a ɲɛm mun kpen-kpen, 35ma dimul vana toosiaa ɲɛm kɛndɔn-ndo mò muulian ɲɛm mun toosiaa a hɛlle, mò siinguu mun ansan diandaa. 36Ma cui n'pum yukuyuku, ma kɛsi mun o kesu kpemaa hɔl-ndɔ o cɛi-kola-toandaa-labɔɔŋianndo nin, o fonda ya vanin nɔm cɔmnɔnndo-o. La cɔ ɲɛm mun maa n'diandaa-diandaa n co ya Mɛlɛka o hɔl ni. 37La bɛnda mì la toosiaa lasikɔlɔ súú vaa lende le niaa pila le. La cɔ ndu maa ɲɛ diandaa o co ya Mɛlɛka o hɔl ni, le vali nuu kínɛí o co ni. 38Vana-vana toosiaa súú kon pɛ le cun ndɔ kɛndɔɔ tueyɔɔ yeela, a soli vana kon Israɛlla tɛɛn po.»

Currently Selected:

Fulaa 30: BKG

Highlight

Copy

Compare