Fulaa 28

Volɔɔla cuɛinannda vanaa-solia-lasálàá

1«O Israɛlla tɛɛn, ma cua Aarɔn bɛ nɔm nda poaa ndɔa, Nadab, Abihu, Eleasar a Itamar pɛɛn, mì nda sɔɔnguu nɔm ikɛi. Nda hɛlin o Israɛlla tɛɛn le siŋnɔnndo vanaa-solia-lasálàá le ya Mɛlɛka ni. 2Ma sɔndu volɔɔla diandaala solia lasálàlan le Aarɔn bɛ nɔm. Lan la co va tɔɔmaseloo le biilu ndɔɔ a le bɛɛle ndɔlen ni. 3Nɔm Moise, ma soo o vanaa caa sɔndɔɔ-a kpow lo, vanaa ya yɔngu kɔlkaloo taw-taw-va, ma dimul nda mà sondul Aarɔn volɔɔlan, haliko mo siŋnun teengen le ya baala solia lasálàá tosallo. 4Volɔɔla nda bɛnda mà sɔndu lan la co lan ni: doma-lapow-iyamaa, doma ifalenndo, doma bɛndoo, doma lebɛngu sɔɔlaa, mɔsillo a yáwlen. Mì vanaa kan a toosiaa volɔɔla diandaala solia lasálàlan ndan le Aarɔn bɛ nɔm nda poaa ndɔa, haliko ma siŋnun vanaa-solia-lasálàá le ya Mɛlɛka. 5Mì vanaa kan toosiaa ɲɛla lan a sianion, a kɛila nda yin a kaan-ndan, a kɛila siaŋala sɔɔtɔlɔlan, a kɛila siaŋala vólotótolan a á kola keesoo.»

Doma ifalen vana-solia-lasálàá

6«Mì vanaa kan lɔ doma ifalenndo a kɛila n'sianilan, a kɛila nda yin a kaan-ndan, a kɛila siaŋala sɔɔtɔtɔlan, a kɛila siaŋala vólotótolan a á kola keese nda lɔ a kɛila kpeendaalan-ndo. Mì vanaa caa baala kon taw-va toosiaa lan. 7Mì kolala n'pɛngɛla kei o congúlan coo le doma kalaa yiiyo lan la va tan tiɔn o kpengun miunndon coo. 8Mì yáwlen le tosan a kola súú pilɔɔ nda doma ifalen kon, mì le va lesɔandaa lecoo a kɛila kpeendaalan. 9Ma cua powta onikselan tan tiɔn, ma sɛva diola poaa Israɛl-la lecoo. 10Mì diola vanaa ŋɔmpum la sɛvan o powvo o pilɛ coo, mì diola vanaa ŋɔmpumnda pilla la sɛvan o powvo pilɔɔ coo. Ava pɛ sɛvaa, a kandu a po tasoo, a mɛɛlu a po lumndo. 11Cua vana caa powtan siɔlɔɔ-o, mò sɛl diola lan o powta tiɔnnda lan coo mɛɛ nda sial powvo mà toosiaa tampɔnndo nuaa yɛ. Ma hol powta tiɔnnda lan o sianion coo. 12Ma hol tan o kolala n'pɛngɛla kei o congúlan coo lan. Powta lan ya vanin cɔu ni mì va loonɔnndo a poaa Israɛl-la. Kani Aarɔn vanin hunɔɔ ya Mɛlɛka o hɔl a diola lan o congúla ndɔlan coo, mì va loonɔnndo lɔ́ɔ́-lɔ́ɔ̀ a nda. 13Ma cɔw vɛlɛ ɲɛla vana hol ɲɔɔ coo lan tan tiɔn a sianion, 14ma cɔw yɔlɔn pɔmbɔn mún miun a sianin diandan, ma lɔ mun maa lakande, ma baa yɔlɔn lɔfan mun o ɲɛla holiaa laɲɛla lan.»

Doma-lapow-iyamaa

15«Ma dimul vanaa caa baala labaa taw-va, mà toosiaa doma-lapow-iyamaa a powta báà kàlàlan. Mà toosiaa mɛɛ nda toosiaa doma ifalenndo yɛ, mà tosa ndu a kɛila n'sianilan, a kɛila nda yin a kaan-ndan, a kɛila siaŋala sɔɔtɔtɔlan, a kɛila siaŋala vólotótolan a á kola keese nda lɔ a kɛila kpeendaalan-ndo. 16Bandii pilɛi o nɔnin ni, kpengei pilɛ bandei baa piasaa lepilɛ, buo baa piasaa lepilɛ. 17Ma hol powta báà kàlàlan polan mahiɔɔlu lecoo, o polale taselen coo, ma hol sarduan, topas a emerɔd. 18O polale diinndɔlen coo, ma hol rubis, safir a diamannde. 19O polale yàándɔlen coo, ma hol opal, akate a ametiste. 20O polale hiɔɔlundɔlen coo, ma hol krisolite, onikse a yaspe. Mì powta lan la va laholiaa o ɲɛla nda cɔw a sianion-ndan coo. 21Mì diola poaa tɔ́ a à ŋiɔŋaa Israɛl-la la va lasialaa lecoo mɛɛ nda sial sɛvaa o powvo le ndu siinguuo tampɔnndo nuaa yɛ. Mì pow oo pow nɔ diola vana pilɛ o poaa tɔ́ a à ŋiɔŋaa Israɛl-laa kan tɛɛn.

22Ma cɔw yɔlɔn pɔmbɔn le doma-lapow-iyama kon a sianin diandan, ma lɔfa mun maa iyoo. 23Ma cɔw vɛlɛ kelan mún miun a sianion, ma vil mun o kpengun miuŋun doma-lapow-iyama kon. 24Ma luei yoei ŋiiŋii n tosa a sianion-nde o kelan miuŋun n cɔw a sianion-ndon nin o kpengun miuŋun doma-lapow-iyama kon. 25Ma baa bolii yoei ŋiinde pilɛi o ɲɛla bààla co o yoei lacongúi doma-lapow-iyama kon laci lan. 26Ma cɔɔlu vɛlɛ kelan cɔvɔɔ mún miun a sianion, ma baa mun o kpengun miuŋun co o doma-lapow-iyama kon a lebɛngu-on, o hɔlaa vɔɔŋaa doma-lapow-iyama kon n bɛnda ni ma baa mun, hɔlaa holnun doma ifalenndo-a pɛɛn. 27Ma tosa vɛlɛ kelan n'sianin celen mún miun, ma baa mun o yoei lacongúi doma ifalenndo, ma baa mun laci a lebɛngu, o yáwle doma ifalen kon ikɛi. 28Mì kelan doma-lapow-iyama kon n baanun o kelan doma ifalenndo a o kola ipɛngɛ kola nda yin a kaan-ndo, haliko mi doma-lapow-iyama kon va o yiyaa o yáwle doma ifalenndo coo, yɔŋii o kpeŋan lecoo.

29O kon, lɔ́ɔ́-lɔ́ɔ̀ Aarɔn luɛi pɛ o Cɛi-Diandaa nin, o kɔɛ Mɛlɛka o hɔl a diola poaa Israɛl-la ndu o takpa o doma-lapow-iyama kon coo, haliko mi ya Mɛlɛka va loonɔnndo a nda lɔ́ɔ́-lɔ́ɔ̀. 30O kon, a vow urim a tumim o doma-lapow-iyama kon nin. Mì lan bɛɛ la va o takpa Aarɔn-ndo coo lɔ́ɔ́-lɔ́ɔ̀ o luɛi pɛ ya Mɛlɛka o hɔl. La va pɛ ndu o takpa, la cɔm ndu yaman ya vanin kiolɔɔ o sɔɔn Israɛlla nin-ndon.»

Volɔɔla cuɛinannda tɔ̀la vanaa-solia-lasálàá

31«Ma sɔndu doma bɛndu bɛnda le vaa o doma ifalenndo bɛngu-o kpow a kola nda yin a kaan-ndo. 32Mì doma bɛndu kon va o bulia tɛɛn le bollen lueiyo lon. Mì vanaa lɔaa lakolaa sɔɔluu bolola bulin lan-ndan ɲɛkɛndɛi, yɔŋii la sɛɛsa. 33Ma tosa ɲɛlan lapum velanndo a krenadeon a kɛila nda yin a kaan-ndan, a kɛila siaŋala sɔɔtɔtɔlan a á kɛila siaŋala vólotótolan, ma balu lan bayiaa a bamban pɔmbɔn cɔwnun a sianion-ndon latulu o cɔcɔɛi lebɛngui doma bɛndu kon pindo. 34A baa pɛ bambɛi n'sianiei ipilɛ, a baa vɛlɛ tuula krenadeo o pilɛ. Lende n bɛnda ni ma lo lan hiyahiyanndo bayiaa háá mà bɔŋa cɔcɔɛi lebɛngui doma bɛndu kon sɔ́. 35Ndú Aarɔn vanin vownɔnndo ni le luɛyɔɔ sálàlan solio. Tuma Aarɔn vanin luɛyɔɔ ya Mɛlɛka o hɔl o Cɛi-Diandaa nin-ndo a telen o vanin fulaa-o, bamban mun bɛnda mì n va comullo ni. Kon tosanin ni o sɔlanin piɔ́mndo le.

36O kon kɔɔli, ma tosa pɛngɛi pɔmbɔɛi a sianin diandan le holɔɔ o mɔsillo laci, ma sɛva lecoo mɛɛ vana sɛva o tampɔnndo coo nuaa yɛ aa: ‹O kɛsin teengen le baala Mɛlɛka-o-o.› 37Ma hol ndi o mɔsil solia lasálàá laci a pɛngɛi kola nda yin a kaan-ndo, 38haliko mi pɛngɛi ken va Aarɔn o itendu. Kon cɔm ni maa te Israɛlla tosa pɛ hakio, mà pilan ya tana o ya sálàla ndalan súúlan kpow cuuo nin, mɛɛ Aarɔn siilun hakila ndala lan. Pɛngɛi ken vanin ndu o itendu lɔ́ɔ́-lɔ́ɔ̀ ni haliko mi cɛl sálàla lan a kɔl nuu kpow.

39Kon cuu pɛ, a cua kola keesoo, a sondul doma lebɛngoo, a sondul ndu vɛlɛ mɔsillo a kola keese pilɛ kon. Mì vana caa sɔɔluuo-o toosiaa yáwlen. 40Ma sondul vɛlɛ poaa Aarɔn-nda domala lebɛngulan, a yáwve, a mɔsilta vilɛilan. Tɔɔmaselelan la co lan ni le biilu ndaa a le bɛɛle ndalen cɔmndo. 41Ma vow Aarɔn bɛ nɔm a poaa ndɔa volɔɔla lan, ma pɔla nda a cuɛima diandan, ma kɛsi nda teengen, haliko ma kandu baalaa le siŋnɔnndo vanaa-solia-lasálàà nia, ya Mɛlɛka pɛɛn.

42Ma sondul nda vɛlɛ lɛmbɛla lebɛngulan a kola keesoo, mì la va bandei kandɔɔ o caŋnda háá o lɔlulan, yɔŋii nda va tumnda fondo. 43Te Aarɔn nda poaa ndɔa a va pɛ luɛyɔɔ o cɛi-kola-toandaa-labɔɔŋianndo nin, te kon te mà va le kɔlan o fonda-loamaa-lasálàá o Fonda-Diandaa nin, à bɛnda mà vownun ndan. À tosa pɛ lende, mɛɛ à delnin kasi mà sɔla piɔ́m te. Tɔŋndo co hoo le Aarɔn a polale ndɔlen ndu kɔɔli le fɛɛn a fɛɛn ni.»

Currently Selected:

Fulaa 28: BKG

Highlight

Copy

Compare