Fulaa 25
25
TUUVO LE CƐI-KOLA-TOANDAA TANGULLO A LE VANAA VANIN VALLO LENIN-NDA
(25—31)
Cuungiaa Israɛlla bɛnda mà yɔngu-o
1Mí Mɛlɛka soaa o Moise lo, mó dimul ndu aa: 2«Dimul Israɛlla mà yɔngu cuungiaalan le ya. Vana-vana yɔngu pɛ cuungiaa ndɔɔ a kɔl ndɔɔ kpow, la bii ndu ndu o ba. 3Cuungiaala nda bɛnda mà yɔngu lan la co lan ni: sianion, volin humbon, daɲan, 4yɔɔsɔla nda yin a kaan-ndan, yɔɔsɔla siaŋala sɔɔtɔtɔlan, la siaŋala vólotótolan, kola keese fɛtufɛtoo, kola toosian a yiiŋii cuinnda-o, 5yáwla saa kóndóla nda yin yinɔɔ siaŋaa lan, yáwla kálà-kálàlan, pɛngɛn akasia, 6cuɛiyan le vowvo o ɲɛ kɛsiaa lafitinaa nin, ɲɛm cun kɛndɔn le cuɛima co le pɔlaa-an a le ansan lomɔɔ, 7pow onikse a powta báà kàlàla celen, le holɔɔ o doma ifalenndo a o doma-lapow-iyama bolle vanaa-solia-lasálàá coo. 8Ma tosal-la Cɛi-Diandaa haliko mi cal Israɛlla tɛɛn. 9I co nɔm Moise cɔm mɛɛ nda tangulnin Calta Mɛlɛka lan a ɲɛm-laandun diandan vanin lenin-ndon yɛ. O kon, mì la tangul ndu mɛɛ ya co niaa cɔm yɛ kpafii.»
Kesu kpemaa a kumbu ndɔɔ
10«A bɛnda ma sɛl kesoo a pɛngɛn akasia, bandei dunndo lediin a tálá, buo dunndo lepilɛ a tálá, simndan dunndo lepilɛ a tálá. 11Mì nɔm Moise yikpa ndu lenin a lekɔɔli a sianin diandan, ma balu ndu sianion holɔɔ o cɔcɔn a o kpengon pindo. 12Ma tengiaa sianion, ma cɔw kelan mún hiɔɔlu le pelun hiɔɔlun kesu kon, ma lɛɛnduu n'miun kpengei pilɛ, n'miunndon kpengei pilɛi. 13Ma sɛl yɔmnde a pɛngɛn akasia le ndu cuaa, ma yikpa ndi a sianion, 14ma sɔɔ ndi o kelan mún nin o kpengun kesu kalaa, haliko mi vana nɔla kesoo cuaa a ndi. 15Yɔmii ken i bɛnda mì i lo le lɔ́ɔ́-lɔ́ɔ̀ o kelan mún nin, vana bɛnda ma soli ndi lenin te. 16Ma kɛsi sɛbɛ kpema diandaa ya co nɔm yɔngu-o o kesu kon nin. 17Ma toosiaa vɛlɛ kumbu kesu kon a sianin diandan bandei dunndo lediin a tálá, buo dunndo lepilɛ a tálá. 18Ma tuula mɛlɛkaa kanda ɲɛm Hala-on-nda a ŋiɔn a sianin fɛtufɛton o kpengun miuŋun kumbu kon. 19O pilɛ nɛɛ kumbu kon mɛɛlu kpengei pilɛi-ya, o pilɔɔ vɛlɛ nɛɛ kumboo mɛɛlu kpengei pilɛi-ya, mà va isisi lecoo. 20Mì kumbannda ndalan la va lapɛɛngaa coocoo le kumbu kesu kon kandaa a kumbannda lan, mà mululan hɔlla vellaa-velle, mà va tofaa o kumbu kesu kon coo.
21Ma handu kumbu kalaa o kesu kpema kon coo, ma kɛsi sɛbɛ kpema ya co nɔm yɔngu-o o kesu kon nin. 22O kumbu kesu kon coo, o mɛlɛkaa ŋiɔŋaa vanin kan o kumbu kesoo coo-a tɛɛn ya vanin nɔm cɔmnɔnndo ni. Lon ya vanin nɔm sɔɔn kpow dimullo le Israɛlla ni.»
Tabali kɛsiaa bulu sálàá
23«O kon kɔɔli, ma sɛl vɛlɛ tabalio a pɛngɛn akasia, bandei dunndo lediin, buo dunndo lepilɛ, simndan dunndo lepilɛ a tálá. 24Ma yikpa ndu a sianin diandan, ma holi sianion o cɔcɔn tabali kalaa pindo. 25Ma toosiaa pɛngɔn tongei a ba kɔllo kpen, ma balu mun baŋɔɔ le ndu saa kpíŋ, ma holi sianion o cɔcɔn pɛngɛn mun. 26Ma tosa kelan mún hiɔɔlu a sianion, ma lɛɛnduu mun o sɔngila hiɔɔlulan, nɛɛ pelun hiɔɔlun tabali kon hun ciŋan o tabalio-a. 27O kelan co mun o pɛngɛn saa ndu kpíŋ-ndon ikɛi-yon nda sɔaanin yɔmii cuaa tabalii kalɛi ni le kɔlan a ndu. 28Ma sɛl kpɔlɔnndan tan tiɔn a yɔm akasia, ma yikpa lan a sianion, lan la vanin le tabali kalaa cuaa le kɔlan ni. 29Ma cɔw ɲɛm-laandon: sɛtilan, taalala kólaalan, fɛngɛlan a hɛngɛilan le sálàla mamɔilan solio, lan kpow a sianin diandan. 30Ma kɛsi bulu nda solul-la sálàá-o ya o hɔl o tabali kon coo, mò va o kɛsiaa lon le lɔ́ɔ́-lɔ́ɔ̀.»
Ɲɛ kɛsiaa lafitina cɔwnun a sianion-ndo
31«Ma cɔw ɲɛ kɛsiaa lafitinaa a sianin diandan fɛtufɛton, ma cɔw ndu o baalanndo a tum ndɔɔ, mì lɔɔla ndɔlan la nɔ kɛɛmiaalan tɛɛn maa lapeenge a boondon. O lɔɔla lan bolle, mì hɛngɛila tɛsɛkɛɛlan#25.31 hɛngɛila tɛsɛkɛɛlan: hɛngɛila yingila lenin te lan nda veelu ni aa hɛngɛila tɛsɛkɛɛlan. Ɲɛ yingila lenin too co ɲɛ tɛsɛkɛɛo ni. la va lon le fitinalan kɛsio lecoo. 32Ma cɔw ndu a lɔɔlan laŋɔmpum: kpengeí layàá, kpengeì pilɛi vɛlɛ layàá. 33Lɔɔla ŋɔmpumnda lan, lɔɔ oo lɔɔ bɛnda mò nɔ boondon mún yáá a kɛɛmiaalan o boondun mun maa peengela yɔm amanndiee. 34Lɔɔ co tɛɛn-ndo bɛnda mò nɔ boondon mún hiɔɔlu a kɛɛmiaalan o boondun mun maa peengela yɔm amanndiee. 35Mì kpukpon va o fondala lɔɔla tiɔn-tiɔnndan la hun bɔŋa o lɔɔ co tɛɛn-ndo-o bɛngu. 36Mì kpukpun mun a lɔɔla lan la va labaalanndan o lɔɔ co tɛɛn-ndo. Mì ɲɛ kɛsiaa lafitina kon kpow va o cɔavaa nɛɛ pilɛ a sianin diandan fɛtufɛton. 37Ma cɔw vɛlɛ fitinalan tan ŋɔmmɛw, ma kɛsi lan o hɛngɛila tɛsɛkɛɛla toosian le fitinalan kɛsio lecoo lan coo, haliko mi ɲɔɔ va o tengaa laci. 38Ma cɔw kpaɲala ndɔlan a bombola kɔandaa lapulta ndɔlan a sianin diandan. 39A bɛnda ma tuu sianin diandan kilolan beleyaa le ɲɛ kɛsiaa lafitinaa a volɔɔla ndɔlan cɔvɔɔ. 40Toosiaa ndu ɲɛkɛndɛi mɛɛ ya tuu ndu mí cɔm nɔm o pembei coo yɛ kpafii.»
Currently Selected:
Fulaa 25: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
