2Timote 3
3
Mɛɛ vannda vanin o palɛi mɛɛlɛi yɛ
1Sínà maa o palɛi mɛɛlɛi, sangala vɔɔn-vɔɔnndan la vanin. 2Kani vanndacieea kaolannin nda pila, mà kaola volion. A vanin vanaa heelannda, a vanaa yongaa. A vanin sɔɔn tanan dimio a Hala o kɔɔ. A venin sɔɔn vanaa velu nda-a biyɔɔ le, a venin vanaa sinaa ikɛndɛ le, a kenin ɲɛm diandan Hala-on lebɛɛ le. 3A nɔnin iɲíí le, a vanin vanaa bii tɛɛlɔn te-a, vanaa tɛɛmbuu caanda diolan-nda, vanaa bii kɔlta ndalan te-a, vanaa kɔlvesɛiya a vanaa yeema dɛnɛ kɛndɛ le-a. 4Vanaa tosà yalalen-nda a vanaa tosà hɛnan ndaa-a. A vanin vanaa hɔlaa heelaa bɛndu. A kaolanin ɲaale ceendo hiovɔɔ Hala coo. 5A vanin Hala vow a lahɔl, kɛ mà kɛɛ kpaaya Mɛlɛka kpeekpeiyo. Faŋan vanaa vaa lende kɔɔli. 6Vanaa pum nda tɛɛn luɛinin o yungula pilalan nin, mà bii vanlaandua laasian a hakilan-nda, a yeemɛi vɔɔŋii súú-súù ka i pɛ o lakɔl-la pɛɛn. 7Vanlaandua kan a vanin Hala piɛiyo lɔ́ɔ́-lɔ́ɔ̀, kɛ a nɔlanin toɲaa sinaa le. 8A simulnin toɲa Mɛlɛka-a mɛɛ Yanɛs nda Yambrɛs simul Moise yɛ (Fulaa 7.11). 9Kɛ a hiwnin laci le, kani diɔmii ndɛi fulanin ceen mì i cɔmnun vannda kpow o hɔl mɛɛ o tosalan poaa ŋiɔnda haa yɛ.
Silala mɛɛlalan
10Kɛ nɔm Timote, a bii pɛɛkula nilan bila, a sínà niinu nuu, a sínà dɛnnda ya tuwnun o kɔltan, laalan nuu, biuvɔn nuu, kaola nuu, a mɛɛ ya sim yili o tiindan nuu coo yɛ, 11a sínà mɛɛ vannda co ya yɛlen tollo yɛ. Sangala co ya coo lan kpede, ɔ́ɔ̀ o kɛɛ ya kei coo Antiɔs, Ikoniɔm a Listre-o? A sínà yɛle tolaale kei ya coo len. Kɛ mí Mɛlɛka ciindiaa ya o dɛnnda lan kpow nin. 12Síná pɛɛngu maa vanaa-vanaa yeema le lou o diomnden coo a yiinannda a Krista, ó co Yeesu-o, vanaa kan a sɔlanin yɛle tolaalen. 13Kɛ vanaa vɔɔnda a vanaa leyalaa hiawnin laci a dɛnɛ vɔɔndo tosaa, a huinin caanda, mì caanda bɛɛ a hui nda. 14Nɔm nɔm, sɔɔn n pɛi má laalan mun-ndon, lo mun biyɔɔ tuŋ. A sínà vana n pɛɛku mun o ba-o, 15a sínà vɛlɛ mɛɛ n loonun sɛbɛ Hala-o cɔn o cuaambɔyɛi nɔmnde nin yɛ. Kon nɔla mo ke nɔm kɔlkaloo haliko ma sɔla laalan yɔngunin nɔm cindaa sɔlaa o Yeesu Krista nin-ndo. 16Diom oo diom co o sɛvaa o sɛbɛ Hala-o nin, Hala tosa ni mó sɛvan. Diomnda lan la sɛvan le vannda pɛɛkoo, le nda toɲaa dimullo, le nda mingio o nɛi a le nda silaa o dɛnɛ sandaa nin, 17haliko mi vana baala Hala-o va o bɛɛndian, nduyɛ mo va o tiwnan ɲɛkɛndɛi le dɛnɛ kɛndɛ súú-súù ka tosaa.
Currently Selected:
2Timote 3: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
