2Tesalonikea 2
2
Le hunɔɔ Maalii-o
1Le hunɔɔ Maalii naa Yeesu Krista-o yɛ, a le cuungian naa cuungiannin ndu ikɛi-yo, n co niaa tɛɛlɔn puapilɛa naa, 2la malnùn mì la keleŋa luɛyɔɔ o lapɔw nin te, yɔŋii vana pum luei niaa siòònde, mò dimul niaa siɔdii lacio, te kon te diomnden, te kon te mà sɛval niaa sɛbɔɔ maa naa o ba o fula ni, maa paale Maalii len le tiiya. 3La cɛ̀l mì vana-vana hui niaa o nɛi oo nɛi coo le. Kani fɔ mì vannda kɛɛ laalanndo malan paale len le tiiya. O kon mì vana tɛɛmbua fula, o bɛnda le lou o ɲánndávàà-o pɛɛn. 4Yaamɔɔ kalaa simulnin ɲɛ-ɲɛ vannda co veeloo aa hala, te kon te ɲɛ-ɲɛ nda co biiloo, háá mò kɔ luɛi o cɛi Mɛlɛka Hala-o nin, mò kɔ cal, mì ndu pila veelun aa hala. 5Vɛ̀ɛ̀ la co loonɔn ɲɛ ya va niaa dimullo telen ya va niaa ikɛi-yo le? 6Ɛ̀ɛ̀ nduyɛ, la sínà ɲɛ co yaamɔɔ kon kuunaa hunɔɔ sunsun-ndo, mɛɛ mì telen ndɔɔ tiiya. 7Kpaaya viannan laalan lepɛŋndo co nin baalaa. O lo cobe, mì ɲɛ bii ndu kon-ndo faŋan ndu o nɛi. 8O kon vana kɔlvesɛi kon cɔmnun niko, o Maalii Yeesu tɛɛmbuunin a hoeyii fulanin ndu Maalii o sondo-e-o, mò tɛɛmbuu biilu hunɔɔ ndɔɔ-o pɛɛn. 9Vana kɔlvesɛiyo hunnin a kpaaya Setana-o, mò tosa dɛnnda kpaayala súú-súù ka, kaamaalan a kɔndɔfilta lacòòvalan. 10O hunnin a dɛɛniaala súú-súù fee, mò luei vanaa vanin o lou nin-nda o pɔwlan nin a o dɛnɛ sandaa lepɛŋndo nin, kani a cɛ́l kaola toɲaa mà sɔla cindaa le. 11Lelan, Hala cuunin nda kpaaya laasiaa vana-o, mà laalan sɔɔn lacòòvan. 12Vanaa kɛ́-kɛ̀ kɛɛ sɔɛi toɲɛi laalan, mà va ɲaaloo dɔwnɔnndo a dɛnɛ vɔɔndo sɔlanin yaalaa.
Le cindaa sɔlaa niaa sɔla hɛlio ni
13Puapilɛa naa, mɛɛ mì n va Hala balikaa mello lɔ́ɔ́-lɔ́ɔ̀ le niaa, niaa vanaa Mɛlɛka kaola-a pɛɛn. Kani Hala hɛli niaa kabi paandu le cindaa sɔlaa o dindin Kɔl-Diandaa a o laalan toɲaa nin. 14Lelan o tosa ni mò veelu niaa o Yoongu kɛndɛ naa dimul niaa-o nin, haliko mi la sɔla biilu Maalii naa Yeesu Krista-o. 15Lelan, puapilɛa naa, la sim yili mì la loonun pɛɛkula naa n pɛɛku niaa a lasondo lan, te kon te o sɛbɔɔ nin-ndan.
16Màá Maalii naa Yeesu Krista pila a Fuɲa naa Hala, o kaola naa mó luei naa yoomuan a kɛndɛi ndɔɛi le fɛɛn a fɛɛn-ndo cɛl, mò ke naa vɛlɛ tiindanndo, 17mò pei niaa yoomuan o lakɔl, mò hiw niaa laci o dɛnnda kɛndɛlan a o sɔɔn kɛndɔn kpow nin!
Currently Selected:
2Tesalonikea 2: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
