2Korɛntea 6
6
1Lelan, naa co vallo a Hala diom pilɛ-a, n co niaa tɛɛlɔn, la cɛ̀l mì kɛndɛi niaa sɔla Hala o ba-e i tambun fúú le. 2Kani o dimi aa:
«O telen kɛndɔɔ, mí mulul nɔm,
o paale cindaa len coo, mí mala nɔm.»
Má cè niko telen niaa bɛnda mì la cɛl dɛnɛ kɛndɛ Hala-o o! Má cè niko paale cindaa len!
3N yeema mì vali naa tambu labɛɛ le, lelan, ɲɛ-ɲɛ tosa mò luei vanndo o pɔwlan nin, n tosan kon te. 4Kɛ o dɛnndan nin kpow, n co vannda cɔmndo maa vanaa baalaa Hala-a lekɛ́ndɛi naa n co ni: n co sangalan biwnɔnndo taw, sɔɔn imɔnɔn a sɔɔn yɔngu vana buulannda bɛndulan-ndon. 5Vannda lɔɔ naa, má mal naa o kaasoolan. Mí vanaa pum a del naa coo. N tosa baalala kálà-kálàlan, má lɔli naa lahɔl, má tuŋ naa ɲɛdiaa. 6N co cɔmndo maa vanaa baalaa Hala-a naa n co ni: a diondɔɔ naa n dendu-o, dɛnɛ sinaa naa, biuvɔnndo naa, vili naa kɛndɔɔ, Kɔl-Diandaa co naa vallo nin-ndo, a o kaola kpeekpei naa n nɔ-o nin, 7a sɔɔn toɲan vannda dimullo a o kpaaya Hala-o nin. A sɔɔn dɛnɛ sandan naa n co vannda cɔlɔbaa ni, mì n va vɛlɛ cɛvɔnndo a mun. 8Vannda co naa bɛɛlen keo, mà va naa bɛ̀ɛ̀lan tɛɛmbuuo. A co sɔɔn vɔɔnndon dimio a naa o kɔɔ, mà va sɔɔn naan kɛndɔn dimio. A co naa cɔw vanaa lacòòvaa, nduyɛ toɲaa naa n co nda dimullo ni. 9A co yiyanndo maa vannda sínà naa le, kɛ nduyɛ a sínà naa válán, a co naa cɔw maa vanaa vílɛ́i, kɛ nduyɛ n co yoomu ɲɛkɛndɛi. A co naa sangaa tuisio coo, kɛ nduyɛ a co naa diw le. 10A co naa kɔltan tɛɛmbuuo, kɛ nduyɛ n co a ɲaaloo lɔ́ɔ́-lɔ́ɔ̀. N co maa vanaa kɔɛi bɛndu, kɛ nduyɛ n co vannda tɔnɔɔ looloo, n co maa vanaa lepɛŋ, kɛ nduyɛ, ɲɔɔn kpow n co naa o ba.
11Caaŋaa naa Korɛnte, kpendekele naa n soo o niaa lo ni, mí n kumbil niaa kɔlta naalan kpow. 12N kɛɛ niaa kaola naa cɔm te, kɛ mí la kindal naa kɔlta niaalan. 13Maa mɛɛ ya sɔaa o cuavaa nia lo yɛ, lende ya co sɔɛi o niaa lo ni. La kumbil naa kɔltan mɛɛ naa n kumbil niaa la naalan yɛ.
Silaa le manndanndo a vanaa co vanaa laalan te-a o kɔɔ
14La luei bollen o yɔm lebol pilɔɔ bɛngu niaa vanaa laalan te-a le. Kani ɔ́ɔ̀ bɛnda co ɲɛ sandu-o a ɲɛ sendu loo tɛɛn-ndo? Ɔ́ɔ̀ canyɛi co ɲɛ-tengaa a ɲumndan tɛɛn-nde? 15Ɔ́ɔ̀ bɛnda co Krista nda Setana tɛɛn-ndo? Te kon te ɔ́ɔ̀ bɛnda co vana laalanndo nda vana co vana laalan too tɛɛn-ndo? 16Ɔ́ɔ̀ bɛnda co Cɛi-Hala-o nda piɔmnda tɛɛn-ndo? Kani naa co Cɛi-Hala kiyɛiyo ni, maa mɛɛ Hala pila dimi yɛ aa:
«I vanin niaa tɛɛn, mì kela niaa tɛɛn,
i vanin Hala niaa mì niaa va cuavaa nia.»
17Lelan Mɛlɛka dimi ni aa:
«La fula nda tɛɛn,
mì la sɛyan niaa ndaa.
Ɲɛ-ɲɛ co ɲɛ nɔɔlɛiyo, la pilan ndu le!
O kon, i cɛlnin niaa.
18I vanin Fuɲa nia,
mì niaa va poaa niaa a cuavaa nia.»
Mɛlɛka nɔ kpaayaa kpow-vo dimi lende ni.
Currently Selected:
2Korɛntea 6: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
