2Korɛntea 2

1Lelan, i cii tùú, i co muungu o niaa lo le, yɔŋii ya tɛɛmbuu niaa vɛlɛ kɔltan. 2Kani te i tɛɛmbuu pɛ niaa kɔltan, ɔ́ɔ̀ vanaa yɔngunin ya ɲaaloo o kɔl-la? Fɔ niaa vanaa ya tɛɛmbuu kan kɔltan-nda. 3Le hee ya sɛval niaa mɛɛ ya tosa nuaa yɛ ni, yáà yeema mì yáà kɔɛ o niaa lo, mì yáà tambu kɔl a vanáà yɔngunin ya ɲaaloo o kɔl-la le. Nduyɛ, i laalan maa te i dɔwnun pɛ ɲaale, niaa bɛɛ la dɔwnun ɲaale. 4Lende koni, a kɔl tambɛiyo taw a á siòònde ya sɛval niaa ni, mɛmɛan ma va ya o hɔl taw-taw. Nduyɛ o co le niaa lakɔl tɛɛmbuu le, kɛ haliko mi la sínà kaola bɛndu ya kaola niaa-o.

La mal vanaa cua hakilan a niaa-a haki

5Te vana pum tosa pɛ dɛnɛ tɛɛmbuu vana kɔllo-o, o co ya le o tɛɛmbuu kɔl te, kɛ niaa kpow o tɛɛmbuu kɔl lende ni. Te i hiw yɛ ba le, mɛɛ vanaa pum niaa tɛɛn o tɛɛmbuu kɔl lende ni. 6Sanga niaa vanaa bɔɔ-bɔɔ tuisi vana kon coo-o tiw. 7Lelan, sunsun, o bɛnda mì la mal ndu haki, mì la luei ndu yoomuan yɔŋii vana kon tambu kɔllo háá mò ŋɔɔcan. 8Nduyɛ, i co niaa tɛɛlɔn, la cɔm ndu maa la kaola ndu. 9Le hee ya sɛval niaa ni maa yáà yeema mì yáà tɔɔndan niaa, mì yáà sina te la co pɛ a bɛɛndiannda lɔ́ɔ́-lɔ́ɔ̀ le silala nilan biyɔɔ. 10Te la mal pɛ vanndo haki le tɛɛmbuu o tɛɛmbuu-o, ya bɛɛ i mal ndu haki. Kani o kɛ́-kɛ̀ ya mal pɛ haki, i mal ndu haki le niaa Krista o hɔl, 11yɔŋii Setana hui naa. Nduyɛ, n sínà yeemɛi ndɔɛi.

Buulan Pol buulan Troas-o

12Lɔ́ɔ́ ya tiiya Troas le vannda Yoongu kɛndɛ Krista-o tiiyallo-o, mí Maalii kumbil-la dioo vakpa le baalaa tosaa. 13Kɛ nduyɛ, i va buulanndo taw, kani i komal Tite puapilɛ nuu lon te. Le hee, mí congun yungoo Troas, mí kɔa Maseduan.

Yoomuma vana sɔla o Yeesu Krista nin-ndan

14Kɛ n melnun Hala balika, kani o co cɛlɔɔ mì n va dɛnndan tiwvo ba lɔ́ɔ́-lɔ́ɔ̀ o diola Krista lan. O co vɛlɛ tosaa mì n va sɔɛi Krista-e vannda cɔmndo nɛɛ-nɛɛ ka maa mɛɛ lasikɔlɔ cun kɛndɔɔ tiw ba-ba fee nuaa yɛ. 15Kani n co macoaa maa lasikɔlɔ cun kɛndɛ Krista-o le Hala. Lasikɔlɔ kon co le vanaa co kɔlan o cindaa nin-nda a le vanaa co kɔlan o lou nin-nda. 16Le vanaa co kɔlan o lou nin-nda yɛ, cun yɔngu vana piɔ́mndo sɔlaa-o co nda diyɔɔ. A co kɔlan o nɛi cindaa coo-a nda, cun yɔngu vana yoomoo-o co nda yoomoo yɔngoo. Nɛ̀ɛ́ tiw yɛ ba mò tosa dɛnɔɔ ho? 17N co maa vanaa pum te, a co yulalen tosaa a sɔɛi Hala-e a. Kɛ naa naa, le tùú Hala vem naa-o naa n co sɔɛi a toɲaa ndu Hala o hɔl o Krista nin ni.

Currently Selected:

2Korɛntea 2: BKG

Highlight

Copy

Compare