1Nsaŋ 2

Krista co vana mala naa-o ni

1Cuavaa nia hɛnan ya-a, i co niaa sɔɔn mun sɛval, haliko la tosa haki le. Te vanndo pum tosa yɛ pɛ hakio, n nɔ vana soaa le naa-o o Pua lo, Yeesu Krista vana sandaa pɛɛn. 2Kani ndu pila solin sálà le hakila naalan faŋaa ni. O co ka le la naalan te, kɛ le la ceendo kpede.

3Te n bii pɛ tɔŋnda Hala lan, n nɔla mì n laalan maa n sínà Hala. 4Te vanndo dimi pɛ aa: «I sínà Hala», mò bii tɔŋnda ndɔlan te, mɛɛ vana lacòòvaa o co ni, o nɔ toɲa o kɔl te. 5Kɛ vana bii pɛ sɔɛi ndɔɛi, mɛɛ kaola Hala-o kpeekpei co vana kon o kɔl ni. O kon naa n sínà ni maa n co o ndu nin. 6Vana dimi pɛ maa o co o Hala nin, ndu bɛnda mò kela maa Yeesu.

Tɔŋ sɛnɛiyo

7Caaŋaa nia hɛnan ya-a, o co tɔŋ sɛnɛi le ya co niaa sɛvallo le, kɛ o paandoo ni, o niaa nɔ kabi o tasendɔ-o, tɔŋ paandu kon co sɔɛi niaa tuei-ye ni. 8Kɛ nduyɛ, tɔŋ sɛnɛiyo ya co niaa sɛvallo ni. Ken i co toɲa le ndu a le niaa, kani ɲumndan ma co hiovɔɔ mì ɲɛ-tengaa kpeekpeiyo va nihau tengaa.

9Vana dimi pɛ maa o co o ɲɛ-tengaa nin, kɛ mì puapilɛ ndɔɔ nɛinun ndu, mɛɛ o ɲumndan nin ndu co vɔ ni. 10Vana kaola pɛ puapilɛ ndɔɔ, mɛɛ ndu co o ɲɛ-tengaa nin, ɲɛ-ɲɛ tosa mò del co le. 11Kɛ te vanndo nɔ pɛ nɛyɔn puapilɛ ndɔɔ, mɛɛ o ɲumndan nin ndu co ni, o ɲumma man nin o co kelaa ni, o sínà nɛɛ o co kɔlan-nda le, kani ɲumndan ma cii ndu suumiaa.

12Niaa cuavaa nia hɛnan ya-a, i co niaa sɛval, kani hakila niaalan la malnun haki le diola ndɔlan. 13Niaa fuɲaa, i co niaa sɛval, kani la sínà vana co kabi o tasendɔ-o. Niaa felengia, i co niaa sɛval, kani la nɔla Vana Vɔɔndo.

14Niaa cuaambɔa, i co niaa sɛval, kani la sínà Pua. Niaa fuɲaa, i co niaa sɛval, kani la sínà vana co kabi o tasendɔ-o. Niaa felengia, i co niaa sɛval, kani la nɔ yoomuan, sɔɛi Hala-e co niaa o lakɔl, mì la nɔla Vana Vɔɔndo.

15La kaola ceendo le, la kaola ɲɛm co o ceendo nin-ndon te. Te vanndo kaola pɛ ceendo, kaola Pua-o ve ndu nin te, 16kani ɲɛ-ɲɛ co o ceendo nin, yeemɛi n'faluei, hɔlte ɲɛm kɛndɛlen a yonga ceendo, o fula Pua o ba le, kɛ o ceendo nin. 17Ceendo co hiovɔɔ a yeeman ndɔn, kɛ vana tosa pɛ hɛnan Hala-o, ndu co va yoomu le fɛɛn a fɛɛn.

Yaamɔa Krista-a

18Niaa cuaambɔa hɛnan ya-a, telen mɛɛlaa naa n co nuaa ni, maa mɛɛ niaa tuei maa yaamɔɔ Krista-o co hunɔɔ yɛ, la sínà maa yaamɔaa Krista-a co nin sɛ́lɛ́, ken cɔm naa ni maa telen mɛɛlaa tiiya. 19Naa n tɛɛn nda fula ni, kɛ a ve vanaa naa le, kani te ndáà va pɛ vanaa naa, a va lo latulu naa ndaa. Kɛ i tósan lende haliko mi n sínà maa vana-vana o nda tɛɛn co o naa le.

20Niaa niaa, la cii Kɔl-Diandaa sɔla fulaa Krista o ba, niaa kpow la sínà toɲaa. 21I sɛval niaa, o co dɔ́ɔ́ maa la kɛɛ toɲaa sínà le, kɛ le mɛɛ niaa sínà ndu yɛ, a le mɛɛ còòla kɛ́-kɛ̀ la fula o toɲaa nin te yɛ.

22Nɛ̀ɛ́ co yɛ vana lacòòvaa, o faŋan pɛ o vana co sɛɛngiaa maa Yeesu co Krista loo kɔɔli? Ndu co yaamɔɔ Krista-o ni, o kɛɛ Poo a Fuɲaa-o pɛɛn. 23Vana-vana kɛɛ pɛ Poo, mɛɛ o nɔ vɛlɛ Fuɲaa le, vana sɔlɔlan pɛ sɔɛi Poo, ndu nɔ vɛlɛ Fuɲaa.

24Lelan sɔɛi niaa tuei kabi o tasendɔ-e, ndi bɛnda mì i lo niaa o lakɔl. Te o va pɛ mì sɔɛi niaa tuei kabi o tasendɔ-e lo niaa o lakɔl, mɛɛ niaa bɛɛ la vanin yoomu o Poo a o Fuɲaa nin. 25Ɲɛ o dimi le naa keo-vo co yoomu fɛɛn-fɛɛndo ni.

26Hee yáà yeema le niaa sɛvallo ni, sɔɛi vanaa yeema le niaa lueiyo o pɔwlan nin-nda. 27Le niaa, Kɔl-Diandaa niaa sɔla Krista o ba-o lo niaa o lakɔl. La nɔ lɛ mako mì vana pɛɛku niaa le. Kani Kɔl-Diandaa co niaa dɛnndan kpede pɛɛku, toɲaa o pɛɛkunin niaa ni, o venin lacòò le. Lelan, la lo o ndu nin maa mɛɛ o pɛɛku niaa yɛ.

28Lelan, cuavaa nia, la lo ndu nin, haliko telen o cɔmnunnin-ndo, mì n sɔla tiindanndo, o kon siɛmbula biinin naa a ndu o hunɔɔ ndɔɔ le. 29Te la sínà pɛ maa Krista sandu, mɛɛ la sínà vɛlɛ maa vana-vana tosa pɛ dɛnɛ sandaa, mɛɛ cua Hala-o o co ni.

Currently Selected:

1Nsaŋ 2: BKG

Highlight

Copy

Compare