1Korɛntea 2
2
La tiiyal vannda sɔɛi Krista nda baŋ o yɔm singafilaa coo-e
1Puapilɛa nia, lɔ́ɔ́ ya kɔɛ o niaa lo le niaa Yoongu kɛndɔɔ tiiyallo-o, i dimul niaa isɔɔ oo isɔɔ o sɔɔn bɛndu nin te, te kon te a kɔlkalu bɛndu le. 2Kani telen ya va niaa tɛɛn-ndo, mí kialu o kɔl nuu nin maa i sínà ɲɛ-ɲɛ celen faŋanndo o Yeesu Krista kɔɔli le, Yeesu nda baŋ o yɔm singafilaa coo-o pɛɛn. 3Lelan, i va niaa ikɛi a dialun vílɛ́iyon, a siòònde mí va ɲiiya taw. 4Sɔɛi nii a pɛɛku nuu ve fula o kɔlkalu ivanacieeya nin a o sɔɔn bii vana kɔllo-on nin te. Kɛ kpaaya Hala Kɔl-Diandaa tosa ni mí kon yɔŋnun, 5haliko la kɛsi laalan niaa o kɔlkalu ivanacieeya coo le, kɛ mì la laalan kpaaya Hala-o.
Kɔlkalu fula Hala Kɔl-Diandaa o ba-o
6Nduyɛ, kɔlkaloo naa n co niaa vanaa sínà sɔɛi Hala-e-a pɛɛkoo ni, o co kɔlkalu ceendo ho le, o co vɛlɛ kɔlkalu masaa ceenda haa sunsun te, a co kan hunɔɔ itambu-a. 7Kɛ kɔlkalu Hala-o, kɔlkalu dɔaw vanndacieea kɔndɔfilio, o co o vianaa-o, o Hala ndóò cii nin hɛli le biilu naa lɔ́ɔ́ pá mí ceendo ho kandun-ndo. 8O ceendo ho coo, kpaayala kɛ́-kɛ̀ sínà kɔlkalu kalaa le, kani te láà sínà ndu pɛ, la ve Maalii biiloo bɛnda-o baŋɔɔ o yɔm singafilaa coo le. 9Kɛ maa mɛɛ o co o sɛvaa yɛ aa:
«Ɲɛ hɔlte ci loo,
ɲɛ nile tui loo,
ɲɛ yiyan luei vana o kɔl too,
ndu Hala bɛɛndiaa ni le vanaa kaola ndu-a.»
10Kɛ naa naa, mí Hala cɔm naa kon a Kɔl-Diandaa, kani Kɔl-Diandaa kon yaasiaa isɔɔ oo isɔɔ ɲɛkɛndɛi ni, hali tuula Hala toosiaa mó vian kpíŋ-ndan. 11Kani o niaa tɛɛn, ɔ́ɔ̀ vana sínà yiyannda vanacieo-vo, te o co Kɔl-Diandaa co ndu nin-ndo le? Lende vɛlɛ koni, vana-vana sínà yiyannda Hala lan te, fɔ Kɔl Hala-o. 12Nduyɛ, naa naa, o co kɔl ceendo ho le naa n sɔla le, kɛ Kɔl fula Hala o ba-o, haliko mi n sínà ɲɛ Hala ke naa fondo fúú-o. 13Naa yɛ, o co a kɔlkalu vanndacieea pɛɛku naa-o le naa n co sɔɔn mun dimio le, kɛ a kɔlkalu Hala Kɔl-Diandaa pɛɛku naa-o. Nduyɛ, vanaa nɔ Kɔl-Diandaa-a naa n co sɔɔn toɲan Kɔl-Diandan tɛɛsiallo ni.
14Vanaciee nɔ Hala Kɔl-Diandaa loo nɔla mò cɛl sɔɔn Hala Kɔl-Diandaa le, kani sɔɔn ndiɔmndon n co ndu o hɔl ni. Mɛɛ mì Hala Kɔl-Diandaa va vanndo nin malan o sínà mun kɔlɔlan. 15Vana Hala Kɔl-Diandaa co nin-ndo nɔla mò kelu dɛnndan kpow iyama, kɛ vana celen nɔla mò kelu ndu iyama le. 16Kani o co o sɛvaa aa:
«Ɔ́ɔ̀ vana sínà yiyannda Mɛlɛka lan-ndo?
Ɔ́ɔ̀ vana nɔlà mo cɔm ndu dɛnɛ sinaa-o?»
Kɛ naa naa, kɔlkalu Krista-o naa n nɔ ni.
Currently Selected:
1Korɛntea 2: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
