1Korɛntea 16
16
Mala biinun le vanaa diandaa-o
1Le mala co biinɔnndo le vanaa diandaa-o yɛ, la tosa mɛɛ ya dimul vanaa laalannda Kalasi yɛ. 2O niaa tɛɛn, vana-vana kɛsi ɲɛ pum landɔ o ndu lo cɛinin mɛɛ o tiw ba yɛ le hunɔɔ a ndu o paale tasele co o lɔ́ɔ́ o lɔ́ɔ́ bɛngu len, haliko la cum telen ya kɔanin-ndo le ɲɛm mun cuungiaa le. 3Tuma ya tiiyanin lon-ndo, la hɛli vanaa niaa laalan-nda, i yɔngu nda sɛbɛlan a cuungiaala lan, a kɔɛ a lan Yerusalɛm. 4Te o va yɛ pɛ mì ya pila kɔɛ, n kɔɛ naa ndaa latulu.
Tuula Pol tuu lan
5I cɛn pɛ Maseduan, i kɔɛ o niaa lo, kani lon ya keinin ni. 6Bɔɔle i tosanin telen pum o niaa lo, mì hivi sialten ndon, haliko nɛɛ-nɛɛ ya va pɛ kɔlan kelaa, la mala ya. 7I yeema mì kei niaa yilɔɔ o laan o hiownɔn nin te. I co yiyanndo le telenndo pum hivio naa niaa, te Mɛlɛka cɛl pɛ.
8Kɛ i lonin Efɛs háá mì kafo koavaa tiiya, 9kani dioo kumbilun ya kumbilɔnndo pila, kɛ yaamɔaa nia co sɛ́lɛ́.
10Te Timote komal niaa pɛ, la caa ndu biyɔɔ, o va a isiòòn niaa tɛɛn te, kani o co vallo tosaa maa ya o baala Maalii-o nin. 11Vana-vana kialun ndu yii le. La mala ndu mò kɔɛ nɛɛ o co lan-nda a kɔlɲuloo, mò muungu ya o ibuŋ. I co ndu cumndo nda puapilɛa.
12Apolɔs puapilɛ naa yɛ, i co ndu yoomuan lueiyo taw le niaa kɔlan yilɔɔ nda puapilɛa, kɛ o yiyan ndɔ le lakɔ sunsun te, o sɔlan pɛ ba, o kɔanin.
Congɔnndan a yilɔɔla mɛɛlaalan
13La pɔɛɛnun te, la sim yili o laalanndo nin, la luei yoomuan a kpaayaa. 14La tosa dɛnndan kpow niaa tɛɛn o kaolaa nin.
15Puapilɛa nia, la sínà maa yungu Stefanas-o yɔŋnun vanaa laalaŋa tasea Akaii ni, má va vanaa diandaa baalaa tosallo. Lelan i co niaa yoomuan luei, 16haliko mi la tuei vanaa vaa lende a vana-vana nda co vallo tosaa nda ndaa diom.
17I dɔwnun ɲaale le hunɔɔ Stefanas, Fɔrtinatis a Akaikus-o, kani a cuu ya ɲɛm va ya pɛŋnden-ndon, la ve nanu le. 18Kani a ɲulul-la kɔllo má ɲulul kɔlta niaalan. La biilu vanaa vaa lende-a.
19Kundala vanaa laalannda Asii a yil niaa. Akilas, Priska a vanaa laalaŋaa co bɔɔŋianndo biyɔɔ o nda lo cɛinin-nda bɛɛ a yil niaa. 20Puapilɛa co nanu-a kpow a yil niaa lapi.
La yilan vellaa-velle a kɔɔmianndo.
21Yilɔɔlan ndan, ya pila sɛva lan a ba ni.
22Te vanndo kaola Maalii Yeesu Krista le, ndu siŋnun vana dangaa. Maranata - Maalii naa co hunɔɔ.
23Màá Maalii Yeesu tosal niaa kɛndɛi!
24Niaa kpow, i kaola niaa o Yeesu nin.
Currently Selected:
1Korɛntea 16: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
