Matie 8
8
Jesus ə hvólóɲɔ̨n gɛmun da kɔ́lɔi pono
(Markə 1.40-45; Lukə 5.12-16)
1Jesus həɠɛɛ ɲee ɓa yɛ yɛɛ, nu kpulu kɛnɛ̨ ə hvilɛn bulu. 2Nąąlɔwai, hvólóɲɔ̨n gɛmun da ə pa ə pɛlɛ gɔɠɔ mu, yɛ mą: «Nwɔ́ mɛ̨nį Nąmu, ŋį́ gɔlɔn gɛ́ yá hvaa mą, yá pɛli ə́ gɔ́lɔi pono, ə́ mą́ą́həɠə.»
3Jesus ə ɲee pɛlɛ mą; yɛ mą: «Ŋą́ą́ hvaa mą! Ə́ kɔ́lɔi ə pono, ə́ mąą ə həɠə.»
Ɲąąɓa, ɉulɔnui tii, nwɔ hvólóɲɔ̨n ə kpɛɛ, mąą ə həɠə.
4Yili pulu Jesus yɛ mą: «'Hvó mɛ̨nįi ŋɛ̨i ɓo nu ta ɓa. Kɛlaa, li ə́ ə́ kpɔɔ lɛ ɉaláá laa həli mun ma, yɛ mą: Gɔ́lɔi aa pono. Ɛlɛɛ, ɉaláá yii Moisə ə vaaɓo, ə́ gulɔ. Ə gɛ, nu kəlee di gɔlɔn diɛ: Ə́ kɔ́lɔi aa pono, ə́ mąą aa həɠə.»
Jesus ə holahi nwun nąmu ta nwɔ kólo kɛmun gɔlɔi pono
(Lukə 7.1-10)
5Ɓɛlɔwai Jesus ə kɛi həli la Kafarnaumə daai, holahi nwun nąmu ta ə pa, ə pɛlɛ gɔɠɔ mu, ə mąąnɛ̨ɛ̨ yɛ mą: 6«Ną́mu, nwɔ́ kólo kɛmun gaa laa ni bɛlɛ́n, kpɛlɛɠɛlɛ ɲɔ̨n aa ɉon, naanɔ̨nwɔ̨ ɓoɔ kpɔ a mɔlɔ. Gɛ́ ə́ hvaa mą ə́ gɔlɔi pono.»
7Jesus yɛ mą: «'Li! Gáá pai ŋį́ gɔlɔi pono.»
8Kɛlaa, gɔ́kulaa nwun nąmui tii ə nwoo ɲąąpənə, yɛ mą: «Ną́mu, ɲą́ą́ mą́ą́ hvo nɛ̨ɛ̨li, a nui yá lɔ ɲei bɛlɛ́n. Kɛlaa, woo tɔ̨nɔ̨ ɓo lɔ, nwɔ́ kólo kɛmun kɔ́lɔi a pono. 9Hvó gaai, ɲą́ą́ gbɛli, gáá nuą yeemu, əlɛɛ, holahiɠaa di ɓo ɲéému. Ŋą́ kɛ da ɓa: ‹'Li!›, a li. Ŋą́ kɛ dakpɛli ɓa: ‹'Pa!›, a pa. Ŋą́ kɛ nwɔ́ luwɔi ɓa: ‹'Yii kɛ!›, a gɛ.»
10Yii kɛa Jesus ə nwoo tii mɛ̨n, yili ə nii hon gbɔ kpąą. Nuą ŋɛ̨i kɛ bulu, ə mo diɛ, yɛ diɛ: «Gáá tɛ̨ą ɓoi kaa, və́ ni naa na laa huwui ŋɛ̨i ta kaa li Israɛlə lonnii lɔwai. 11Gáá tɛ̨ą ɓoi kaa, hį́i takpɛliɠaa kaa pai həɠəi hvóló kulɔi da hvóló tooi pələ, da Abrahamə, Isaakə, əlɛɛ, da Ɉakɔbə ni diɛ kɔ̨nɔ̨n mį́į́ gee ɓa Yálá-taa tɔɔlaa hu. 12Kɛlaa, kaa mun ŋɛ̨i a Ɉuifəɠaa, dɔɔlaa yɛ ɓo a ka wɔɔ, da ka kpɛ, di ka pili kpinį hu, ɓɛi wɔlɔ da ɲį́n ɲą mį́į́ di kaa laa.»
13Yili pulu ɓə Jesus ə kɛ la gɔ́kulaa nwun nąmui tii ɓa: «'Li! Bələi tii ə́ laa la na, ə kɛ tii a yɛ́.»
Nąąlɔwai kpɔlɔɔ ɓə, nwɔ kólo kɛmun kɔ́lɔi ə pono la.
Piɛrə ɲolaa kɔ́lɔi pono mɛ̨nį
(Markə 1.29-34; Lukə 4.38-41)
14Ɓɛlɔwai Jesus ə lɔ la Piɛrə yəi bɛlɛ́n, ə Piɛrə ɲolaa kaa gɔlɔ kələn ŋąą mą. 15Jesus ə ɲee pɛlɛ mą, gɔlɔi ə pono. Ə mu həɠə yɛ di kɔ̨nɔ̨n gɛ.
16Yələ wulii həliɛ, di pa a ɲį́nɛ̨n ɲɔ̨n gɛ nuą tamąą Jesus pɔ. Ə kɛi ɲį́nɛ̨nŋaa tii kpɛ nuą tii pulu a nwoo, yɛ ɲɔ̨n ɉuwu kəlee kɛ nuą kɔ́lɔi pono. 17Yili ə kɛ tii, ə gɛ, mɛ̨nį Yálá kwəi mɛ̨nį hukulɔ mun Esai ə mo mąą ə hvɛɛ, yai ə kɛ mą: «Yaa ɓə ku kpɛɠiɠaa həɠə kuɔ, ə ku wɔ ɲɔ̨nŋąai həɠə a nwuɔ̨ tiɛ̨.»
Nui gaa bɔ ə hvilɛn Jesus pulu
(Lukə 9.57-62)
18Yii kɛa Jesus ə nu kpulu kɛnɛ̨ tii kaa gwɛlɛ, ə kɛ diɛ: Ka tɛɛ bówa pulu ɓɛli pələ. 19Yili pulu, tɔ́n galamɔ̨ɔ̨ ta ə lɛɠɛ Jesus ɓa yɛ mą: «Mąąkwɛli kɛmun, ɓɛi lɔpee ya li laa ŋą hvilɛn ə́ pulu.»
20Jesus ə mo mą yɛ mą: «Kɛlɛnŋąa lɔ wolo kaa di yəi, ə mą kɛ nwɛ̨nįɠaa taa kaa di yəi. Kɛlaa, kɛɛnąą ta hvo kpɛli Nu Lon yəi ɓɛi a vįitɔɔ laa.»
21Nwɔ kalan nɛai tɔ̨nɔ̨ ə mo mą, yɛ mą: «Ną́mu, hvaa mą ŋį́ li ŋą ną́n noo.»
22Jesus ə nwoo ŋąąpənə yɛ mą: «Haa nuą lɛɛ laa di di kee loo. Ə́ wɛi, hvilɛn búlú.»
Jesus ə tulɔ hvaŋą kɔ́lɔ haa ma
(Markə 4.35-41; Lukə 8.22-25)
23Jesus da nwɔ kalan nɛai di tɛ gələn ɉu. 24Di lɛɛ lɔ lii, tulɔ hvaŋą ta ə muhəɠə; gələn yɛ gɛ takpa-takpa, ya yɛ tɛ ɉu; nąąlɔwai Jesus ə kɛi yii. 25Nwɔ kalan nɛai, di lɛɠɛ mą, diɛ mą: «Ku Ną́mu, ku lɛɛ hiɛ ka ɲai, ku kulɔ wɛ ɉu!»
26Jesus ə ɲįnąąɓo, ə di woo ŋąąpənə yɛ diɛ: «Ee kə! Ka wɔ laa na laa tiikpə ɓə ee! Lə mɛ̨nį ɓa ka káá ɲɔ̨wi?»
Ŋąąɓa, ə muhəɠə, ə haŋą vaŋą ɓa da ɲa, yɛ diɛ: 'Ka kpəla ma! Vaŋą da ɲa di kpəla kpɔlɔɔ tii ma, kɛɛ mąą ə haa kpɔ tin. 27Nwɔ kalan nɛai kəlee kwəi ə pili diɛ, diɛ kɛ mą: Akɛti, nu huwu lə kɛɛ ɓəi, yai hvaŋą da ya da nwoo mɛ̨n diɛ di kɔ́lɔ haa diɛ?
Jesus ə ɲį́nɛ̨n ɲɔ̨n gɛ nuą hveelɛ kɔ́lɔi pono
(Markə 5.1-20; Lukə 8.26-39)
28Yii kɛa Jesus da nwɔ kalan nɛai di ɲa teen Gadara nuą di wɔ lɔi hu, hinąą hveelɛ di kɛ laa ɲį́nɛ̨n yɛ ɓo di pulu, di yíi ɓa kɛ a kámą la, di kpuluun, diɛ pa Jesus pɔ. Di wɔ mɛ̨nį ɲɔ̨n bələ mąą mɛ̨nį ɓa, hvo kɛ li nuą di pələ həɠə diɛ. 29Jesus kaai di mo, di tómą diɛ kɛ mą: «Ee ku Yálá Lon, lə ɓə yɛ ə́ gɛ a kuɔ? Akɛti, ə́ paa li kɛa, ə gɛ, ə́ ku nwun na pili nɔwai tɔwɔ?»
30Yaan, ɓoi kpulu ə kɛ naa kwɛlɛ, diɛ di kɔ̨nɔ̨n gwɛli. 31Ɲįnɛ̨nŋaai tii di nɛ̨ɛ̨mąą hvə Jesus ɓa diɛ mą: «Ya ku kpɛi, hvaa mą kwə li ku lɔ moiɠaai tii hu.»
32Jesus yɛ diɛ: «Ka li, ka lɔ di hu.»
Ɲįnɛ̨nŋaai tii di həɠə nu hveelɛi tii pulu, də li, di lɔ moi kpului tii hu. Moiɠaa kəlee də li di pu bowayai tii kɛ naa kwɛlɛ ɉu. Gəlee di haa kpɔ tɛ̨ɛ̨tɛ̨ɛ̨?.
33Nuą tii kɛ moiɠaa tii pulu, diɛ di mąąkpɛ, yii kɛa di yili naa kaa; di tɛɛ aa gilɛ, də li taai. Mɛ̨nįi di ɲɛ̨i ə gaa, di gəlee hukulɔ; ə mą kɛ, nu hveelɛi tii ɲį́nɛ̨n ə kɛ di pulu, di mąą mɛ̨nį. 34Nąąlɔwai, daai nuą kəlee di kulɔ diɛ li Jesus laakwiɛn Ɉii. Yii kɛa di gaa, di nɛ̨ɛ̨mąą hvə mą, diɛ mą: Həɠə ɓɛ ku wɔ lɔi hu.
