akə 5
5
Ká nwun na ɲɔ̨nwɔ̨ɔ̨i, hɛn gɔw nąmįną
1Káá ɓaa, hɛn gɔw nąmįną, ká wɔlɔ, ká ká woolaa mɛ̨nį ɲɔ̨n pai həli káá, mąą mɛ̨nį ɓa! 2Ká wɔ hɛn gɔw aa luwun, ɲįnįin aa ká wɔ həɠəɠaa mįi. 3Ká wɔ hɛnii da ká wɔ walii, ɓɛ̨nɛ̨ aa hee diɛ; mɛ̨nɛ̨i tii ɓə pai ká mąą kɛla hvaa ɓoi, yɛ ká kələn yɛ nwɔ̨n. Vóló gbɛlamąąɠaai ŋɛ̨i yee mu, káá hɛn gɔw kpɔn gee ɓa. 4'Ká ɓɛ kaa tai! Nuąi kɛi kólo kɛ ka yəi ɲɛa, di halai ká ká yee kanąn mą, gaa tomąi, góló kɛ nuą wɔlɔ woo aa too Mɛ̨nį Kəlee ŋą Hééɓomun nwəlii. 5Ká kɛ ká nɛ̨ɛ̨ hu yɛnɛ̨ɛ̨, káá ká liiɓa kɛ, káá ká laa nɛ̨ɛ̨ mįi, a hɛli ɲələɠaa. 6Káá kiti kala nuą diɛ, káá tələnmomun baa, hva mąąkɔ̨nwɔ̨ ká yəi.
'Ká ká liikpələ, gu Nąmu mąą aa kpuɔ
7Ną́n nonnii, ká ká liikpələ, ə lɛɛ la ɉu, gu Ną́mu pai lɔwai ə ɉəli. 'Ká ká ɲɛ̨i hee tai tíi kɛmun ma, a niikpələ, ə hee, yɛ lɔi dɔlɔ mąąkpɔn, a má dɔlɔɔ kulɔ, gili hva həɠə laa, ə lɛɛ ɉu, yɛ nɛɛ bulu mąąkpɔn. 8Káá kpɛlimąn, ká ká liikpələ, ká tɔɔ a nwalawalaa, mąąhɔlɔɓo, gu Nąmu pai lɔwai mąą aa kpuwɔ.
9Ną́n nonnii, ka hvo ka woolaa ka kee yəi, əgɛ, di hvo nəi pa ká kiti tee. Ká nąą kaa, giti tee mun kaa kɛa tɔɔni bɛlɛ́ laaləi. 10Ną́n nonnii, Yálá kwəi mɛ̨nį hukulɔ nuąi kɛli hvaa gu Ną́mu laa hu, ká ká kɔɔn diɛ; di di liikpələ, di mɔ̨nɔ̨ mįi. 11Ká kaa gaai, nuąi liikpələ laa kulɔ, gu kaa di mąątɛ̨nɛ̨i; ká Ɉobə nwɔ liikpələ laa mąą pələ mɛ̨n, ɛlɛɛ, bələi gu Nąmu ə nwɔ yɛnɛ̨ɛ̨ laa kulɔ la, ká gaa; mąąhɔlɔɓo, Ną́mu ŋą mɛ̨nį lɛlɛɛi, ɲee laahvɛɛi a mɛ̨inɛ̨ɛ̨.
12Mɛ̨nį kəlee ə mą kɛ, nąn nonnii, 'ká hvo ká kwɛla a yələkɔlɔn da lɔi, a wala kɛ ti, a hɛn ɉuwui lɔpee gəlee ta. Ká wɔɔ «ee!» ə kɛ a «ee!» Ká wɔɔ «kpaa!» ə kɛ a «kpaa!» Ya ɓə a gɛ, ká hva too la kitii hu.
'Ká Yálá hvɛli
13Ká ta kaa mɔ̨nɔ̨ mį́i? Ə Yálá hvɛli. Gwəinɛ̨ɛ̨i? Ə Yálá mąąwiɛ wələ too. 14Ɲɔ̨n gaa ká ta ɓa? Ə gbɔn ɉu nu kpɛa-kpɛaa təli, di Yálá hvɛli mą, gu Ną́mu laa hu, di mąąti a wulɔ. 15Laa na laa hvɛli woo a ɲɔ̨n gɛ mun gɔlɔi pono; ɛlɛɛ, gu Nąmu a ɉaŋąn ə ɉee, ə mą kɛ aa nɛ̨ŋɛ̨n ɉəɠə, a nwɔ nɛ̨ŋɛ̨n mąą hvaalɛɛ. 16'Ká hvaa ka wɔ nɛ̨ŋɛ̨nŋaa ɓa ká kee ɲɛ̨i ɓa, 'ká Yálá hvɛli ká kee ɓa, ə gɛ, ká kɔ́lɔi ə pono. Tələnmomun ŋą hvɛli woo kaa a ɲɔ̨n ɉali walawala. 17Eli ə kɛ lɔ a nu yɛ guɔ, ə Yálá hvɛli kpɔ a kilitɔɔmąą laa, yɛ tulɔ hvo pu, yaan, tulɔ hvo hvilɛn lɔi ɓa, kwɛlan ɉaaɓa ɲąnįn mɛ̨ida yee mu; 18yili pulu, ə pənə nwɔ̨nɔ̨, ə Yálá hvɛli, yələkɔlɔn naa ə ɓo, tulɔ ə pu lɔi mɛ̨i, hihɛnŋąa kəlee di lɛlɛ.
19Ną́n nonnii, ká ta a lan, a mąąkwɛa tɛ̨ą ɓa, nu ta a tɔɔ dɔwɔ ə pənə ə paa la, 20ká gili ə pu ɉu káá, nui a pənə a nɛ̨ŋɛ̨n ɉəɠəmun vilɛn tɛ̨ą pələ mɛ̨i, a kɛ ti, aa mąą nu nwun mąąɓo, ɛlɛɛ, aa nɛ̨ŋɛ̨n gbulu tamąą waa.
Currently Selected:
akə 5: BKPDCG
Highlight
Copy
Compare
Share
Want to have your highlights saved across all your devices? Sign up or sign in
