akə 1

Túwɔ́-woo

1Ɲą́ą́ Ɉakə, Yálá ŋą tímun da Ną́mu Jesus Kristə, gáá ɉɛɓɛ́i ŋɛ̨i tɛɛi Israɛlə nu huwu pow kɔw hveelɛi ɓa, diɛi, di taɠa-taɠaa yɛnɛ̨ɛ̨ nąą kəlee; gáá ká túwɔ́ ɓoi.

Mąąhəɠə laa hɔlɔɓoɔ hukɔɔn mɛ̨nį hu

2Ną́n nonnii, hu kɔ́ɔn mɛ̨nįɠaa da həli kaa, 'ká ká kwəinɛ̨ɛ̨ gəlee hu; 3'Ká kili ə pu kani ɉu, káá, hukɔɔn mɛ̨nįɠaai a həli ká wɔ laa na laa ɓa, a kɛ a ɉuwalawala hɛn. 4Kɛlaa, ká tɔɔ a ká nwąnąi, ká wɔ liikpələlaa ə too pono ŋą, ə gɛ ka mąą mɛ̨nį laa ə kulɔ kpɔ a neelee, ká hvo hvɛɠɛ a hɛn nɔpee ta.

Laa na hvɛli woo

5Akɛ, ká ta a hvɛɠɛ a mɛ̨nį kɔlɔn gilii, ə vɛli Yálá ɓa, nwɛi, a dɛɛ nu kəlee pɔ a gwəinɛ̨ɛ̨, hva haŋąn mą, a tɛɛ mąą nu pɔ. 6Kɛlaa, mąą nu ə vɛli a laa na laa, ɲinɛ̨n-ɲinɛ̨n və kɛ ɉu; mąąhɔlɔɓo, nui a ɲinɛ̨n-ɲinɛ̨n gɛ pələ kaa yɛ, laakpala yii hvaŋą a ɲɛ̨i pənə ɓɛ pələi lɔpee gaa bɔ. 7Nu taaləi ti, hvo giliŋąhiɛ yɛ kɛ, gaa pai hɛn da hɔlɔɓoi gu Nąmu ɲəi; 8ɛlɛɛ, hvo laa li gɛ-mɛ̨nį lɔpee ta la, yili pulu, tɔɔ kpąą laa hvo ɲəi.

Yeehowolomun da hɛn gɔw nąmu

9Kristalon wɔ yɛnɛ̨ɛ̨ pɛliɛ mą, mąą mɛ̨nį nwąną mɛ̨nį ə kɛ a nwɔɔ ɲɛ̨i pono; 10ɛlɛɛ, kristalon a hɛn gɔw nąmu, yaa kpɛlimąn, da mąąyɛɛ, yili ə kɛ a nwɔɔ ɲɛ̨i pono, mąąhɔlɔɓo, hɛn nąmu laa a tɛɛ yɛ bələi wulu powa a kulɔ la ɲəi. 11Hvo gaai, hvóló a kulɔ a nwəleen gɛnɛ̨, a gala kpala, bowa ə kulɔ ɲəi, nwɔ nɛlɛ laa ə kulɔ ɲəi. Bələ kpɔlɔɔ ɓə hɛn gɔw nąmu a kulɔ la, nwɔ hɛn gɔw lɔwai.

Yɛnɛ̨ɛ̨ kɛɛ hukɔ́ɔn mɛ̨nį hu

12Nwun na nɛ̨ɛ̨mun maa, nui a tɔɔ a nwalawalaa hukɔ́ɔn mɛ̨nį hu, mąąhɔlɔɓo, nui daa mąąkpɛɛ tii, a wala too, a yɛnɛ̨ɛ̨ hva kpɛɛ hɔlɔɓo a nwun ma ɓɔlɔ, yai, naakwɛlanmoɔi Yálá wɛli la kɛ nuą diɛ. 13Nui lɔpee, ɲąąhɛn mɛ̨nį a həli mą, hvo kɛ diɛ: «Yálá ɓə ɲą́ą́hɛn.» Mąąhɔlɔɓo, mɛ̨ni ɲɔ̨n gɛ kili hva too Yálá ɓa, ɛlɛɛ, hva pɛli nu ɲąąhɛŋi. 14Nu tɛitɛi nwɔ ɲąąhɛn mɛ̨nį a kulɔ, nwɔ ɲɛ̨i kulɔ bɔ hu, yɛ ɲąąnɛ̨nɛ̨n, yɛ ɲɛ̨ikwɛli. 15Ɲɛ̨i kulɔbɔ a koo həɠə, ə naayɛɛ a nɛ̨ŋɛ̨n, nɛ̨ŋɛ̨n a pɔlɔ, ə naayɛɛ a haa.

16Ną́n nonnii, 'ká hvo ká kpɔwɔ ɓɔwo, nwɛ́likɛmąą nuą. 17Mɛ̨inɛ̨ɛ̨ kəlee, da nukpɔɔlaa hɛn nɛlɛɛɠaa kəlee, da həɠə yələi pələ, kɛɛpono Nąn bɔ, yai, gɛ pələ mąą hva hvalin, nįnįn nɔpee hvo nąą ta. 18Yaa kpinįi niiɓa hu ɓə, ə gu kaa la a lon, tɛ̨ą woo háálai, əgɛ, gu kɛ a ŋą pɛli hɛn dɔlɔɔɠaa.

'Ká mɛ̨nį mɛ̨n, 'ká bɔ mɛ̨nį kɛ

19Nąn nonnii nwɛ́likɛmąą nuą, ká káá a kilimąą nuą. 'Ká ká mąą hulɔ, mɛ̨nį mɛ̨n mɛ̨nį ɓa ɉa, kɛlaa, 'ká hvo humo a hvaa ɉa, 'ká hvo ká lííholi ɉa, 20gbala ə too, nu ŋą lííholi hva Yálá ŋą tələnmolaa pɔ mɛ̨nį kɛ. 21Yili ɓa tii, 'ká ká yee kulɔ mąąliɓi mɛ̨nįɠaa hu, da lííholi mɛ̨nįɠaa, Nwoo ŋɛ̨i ɉinŋąą ká hui, yai a pɛli ə ká ɓaloi, 'ká ká yee hee mu a lii nɛ̨ɛ̨ gwəilaa.

22Kɛlaa, 'ká kɛ a Yálá laa woo pɔ yíiɓo nuą, ɛlɛɛ, 'ká hvo kɛ a nuąi da di wəli tɔɔ, diɛ di kpɔwɔ ɓowo. 23Gbala ə tɔɔ, nui a nwəli tɔɔ Yálá laa woo ɓa, ɛlɛɛ, hva bɔ mɛ̨nį kɛ, gaa lɔ yɛ, nui a gbɔwɔ kaa pɛnɛ̨n ɉu, 24a kpɛɛ a gbɔwɔ kaa tii, a lii, aa mąn lɛ̨ą bələi ɲɛ̨ilai ə kɛ la, mą. 25Kɛlaa yaamun, nui a ɲɛ̨i hee dɔn gbɔ-kpɔɔ hu, yai a nu lɛɛ gbɔwɔ ɓa, hva ɲɛ̨i hee lɔ ɉu, ɉee wɛli ɓa, mąą nu a bɔ mɛ̨nį kɛi, a nwun na nɛ̨ɛ̨ hɔlɔɓo bɔ yíiɓoɔ hu.

26Kɛlaa, nu ta a gbɔwɔ kɛ a Yálá kɔ́lɔn mun, a wala nɛ̨n dɔɔ vaa woo tɔwɔ, akɛtii gaa gbɔwɔ ɓowoi, hvo Yálá kɔ́lɔn. 27Yálá kɔ́lɔn bələi mąąhəɠɛɛ, ɉaŋąa gu Ną́n Yálá ɲɛ̨i ɓa, ya ɓaa: Nu yɛ kpɔnmąą tɛɛ təlilɛaa da galaninŋaa pɔ di wɔ mɔ̨nɔ̨ hu; yɛ gbɔwɔ huhon yɛnɛ̨ɛ̨ hu, hvo pa kɔhɔɓo.

Currently Selected:

akə 1: BKPDCG

Highlight

Copy

Compare