Ose 6
6
1'Ka pa ka gu pənə gwəli Yai-Laa pɔ,
ya ɓə ɲɔ̨n bɛlɛ guɔ, ya ɓə pai gu kɔ́lɔi pɔ̨nɔ̨i,
ya ɓə gu kɛlɛ, ya lɔ ɓə nwɔ̨nɔ̨ pai bala halii.
2Gaa pai a gu kɛi a gu hvulú hvóló hveelɛ yeemu.
Voló haaɓa yələ, a kɛ a gbɛɛ a gu muhəɠɛɛ;
ɛlɛɛ gu kaa pai kɛi a gu hvulú níila.
3'Ka gu Yai-Laa kɔ́lɔn, ka gu tɔɔ a gu nwąnąi Yai-Laa kɔ́lɔn mɛ̨nį ɓa,
ba mɛ̨nį hva ɉəɠə mą, lɔ yɛ bələi yələ ɓoɔ hva ɉəɠə la mą;
gaa pai pai gu pɔ, yɛ nąląąn,
yɛ bələi tulɔ tɔlɔɔ a pu la yɛ lɔi yɔwɔ.
4Lə ɓə ŋą́ pɛli gɛi a yɛ́ Ɛfraimə?
Lə kpɔ ɓə ŋą́ pɛli gɛi a yɛ́ Ɉuda?
Ka wɔ tələnmolaa kaa lɔ yɛ nąląąn a pu yələ wala pɔ,
ə ɓo yɛ yələ ɓɔi nɛ̨n ɲá, yai hva lamun laakpala ŋą.
5Yili ɓə gɛ, gɛ́ di kɛlɛ a gwə́i mɛ̨nį hu kulɔ nuą woo,
gɛ́ di hu kala a wooɠaai da kulɔ ná.
Nwɔ́ kiti wooi kaa pai kulɔi yɛ kɛɛ pɔ̨nɔ̨.
6Mąąhɔlɔɓo mɛ̨inɛ̨ɛ̨ kɛɛ ɓə a níí hon, haláá kulaa hvəi,
ɛlɛɛ, gɛ́ Yálá kɔ́lɔn mɛ̨nį hviɛlaɓo taatɛlɛɛ kələnŋąą a haláá ɓa.
7Kɛlaa di wɛi, yɛ nu kanŋaa, daa mįnɛ̨ həɠɛɛ hu kala,
bələi di mówo la bələ li.
8Galaadə kaa a lɔi kala nuą di wɔ lɔi,
ɲąmą pɔɔ ə ɓo nąą kəlee.
9Ɉaláá laa həli nuą kaa nuą paai Sisɛmə pələi pɔ,
yɛ nu kpulu a hee dɔwɔ kɛ,
mɛ̨nį ɲɔ̨n gɛnɛ̨i di yee kaa ɉu, ya ka tii.
10Ŋą́ą́ mɛ̨nį ɲɔ̨nwɔ̨ɔ̨ kpɛa-kpɛa kaa Israɛlə nwɔ pɛlɛ́i mu,
nąą ɓə Ɛfraimə a nwɔ wɛli mɛ̨nįi kɛ laa, Israɛlə mąą yɛ liɓi la.
11Yɛ́ kpɛli mąn Ɉuda, gáá mɔ̨nun mɔn ŋąą heei ə́ tɔwɔ,
a ɲələi gáá pai nwɔ́ nuąi kulɔi la luwɔlaa hu.
Currently Selected:
Ose 6: BKPDCG
Highlight
Share
Copy
Want to have your highlights saved across all your devices? Sign up or sign in