Hebreu 3
3
Jesus kɛnɛ̨i dɛɛ Moisə ɓa
1Yili ɓa tii kani, Kristalɛa mąąhəɠɛɛɠaa, káái Yálá aa ká təli, 'ká ká ɲɛ̨i hee Jesus ɓa, yai a ká wɔɔ laa na laa nwun, a kɛla, da ɉaláá laa həli mun gɛnɛ̨i; 2Yai a kulɔ nwoo ɓa, Yálái ɉee ɲɛ̨i ɓa, yɛ bələi lɔ Moisə ə kɛ la Yálá yəi bɛlɛ́n. 3Kɛlaa, mąąwiɛlaai Jesus ə ɉɔlɔɓo gɛnɛ̨i dɛɛi Moisə nwɛi ɓa, yɛ bələi lɔ pɛlɛ́ tɔɔ mun, ŋą mąąwiɛlaa kɛnɛ̨i la dɛɛ bɛlɛ́i ə dɔɔ mą. 4Pɛlɛ́ lɔpee gəlee, dɔɔ mun gaa mą, ɛlɛɛ, hɛn gəlee pɛlimun maa a Yálá. 5Moisə ə tələnmolaa kɛ Yálá yəi bɛlɛ́n, yɛ tímun, ə gɛ, mɛ̨nįi kɛi pa ɓoi, ə kɛ a mąą kɛla. 6Kɛlaa, Kristə nwɛi, gaa a bɛlɛ́n non, yɛ ɓo ŋą pɛlɛ́i mɛ̨i. Ŋą pɛlɛ́i, ya ɓaa a guɔ, akɛ mɛ̨nįi gu kaa mąąkpɔn ɉii, a ɲɛ̨i pono, a kilitɔɔmąą laa, gwa gu yee kąnąn mą kpąą.
Laa na laa ɓə a nu lɔ Yálá ŋą hviitɔɔi hu
7Yili ɓə gaa mą, yɛ pələi Kili-Mąąhəɠɛɛ ə mo la, yɛ mą:
«Háákələi, ká Yálá laa woo mɛ̨n,
8'ka hvo ka kili walawala, yɛ ɲələi nuą di di kwɛli tee la,
a ɲələi di kɛi Yálá hukɔɔn na, nɔi pun ɉu.
9Nąą ɓə ká nąnni di ɉúkɔɔn naa, ə gɛ, di gáá,
diɛn, di ɲéé pɔɔ kaa,
10kwɛlan bɔw nąąn ɲee mu.
Yili ɓə gɛ, gɛ́ nííɲąnwąną diɛ,
gɛ́ kɛ diɛ: Yələ kəlee ká káá lɔ lan bələ mɛ̨i,
nuą ŋɛ̨i, di hvo kpɛli nwɔ́ pələɠaai kaa li,
11hvo gaai nííholii kɛa di mo, ŋį́ gwə́la diɛ, gɛ́ diɛ:
‹Gu ɲɛ̨i kaa laa, akɛ di kaa pai lɔi ŋą́ hvįitɔɔi hu!›»
12Ną́n nonnii, ka gɛ kani a nɛlɛɛ, nu ta hvo kɛ ka lɔwai, kili walawala laa ɲɔ̨nwɔ̨ɔ̨ hvo mąąkwɛa Yálá hvulúmąą ɓa. 13Kɛlaa yaamun, ká ká keeni hvaŋąlɔ a yələɓɔ pələ tɛitɛi, yii kpɔ ni háákələi kaa ɉui, əgɛ, ká ta hvo pa gili walawala, nɛ̨ŋɛ̨n yɛ mowo. 14Guɔ ka kɛa gwaa kɛ kɛa a Kristə mɛlaani, akɛ, gwa lɛɛ lɔ tɔɔni gu tɔɔ kilitɔɔmąą laa hu, ə lɛɛ la ɉu ɲąąkpɛɛ yələ.
15Moɔi ŋɛ̨i nwɔ̨nɔ̨, yɛ mą:
«Háákələi, ka Yálá laa woo mɛ̨n,
ká hvo ka kili walawala, yɛ ɲələi nuą di di kwɛli tee la.»
16Akɛti, gbɛɛ nuą ɓə Yálá laa woo mɛ̨n, diɛ di kwɛli tee? Kɛlɛi nuąi kpɔ kulɔ Eziptə lɔi hu Moisə háálai diɛ ɓə-é! 17Gbɛɛ nuą ɓə Yálá ə niiɲąąnwąną diɛ kwɛlan bow nąąn ɲee mu? Kɛlɛi nuąi nɛ̨ŋɛ̨n ɉəɠə, diɛ ɓə-é! Diɛ ɓə di powa ə pu nɔi pun ɉu. 18Gbɛɛ nuą ɓə Yálá ə gwɛla diɛ, yɛ kɛ, di hva kpɔ lɔ ŋą hvįitɔɔi hu? Kɛlɛi gili walawala nuą tii ɓə-é! 19Gu ɲɛ̨i kaa mą, di tɔ̨nɔ̨ kpɛli hvo pɛli lɔi, a di wɔɔ kili walawala laa laa pɔɔ.
Currently Selected:
Hebreu 3: BKPDCG
Highlight
Copy
Compare
Share
Want to have your highlights saved across all your devices? Sign up or sign in
