Hebreu 1
1
Yálá aa pələ ɓo guɔ Non ɉu pələ
1Yálá ə gbɛa tɔlɔɔ kɛ pələ ɓoi gu nąnni diɛ, geemɛ̨i tamąą, kpaalə tamąą hu, gwəi mɛ̨nį hukulɔ nuą laaləi, 2ya ka, yiihui ŋɛ̨i, gu kaa kɛa la vóló gbɛlamąąɠaa hu, aa pələ ɓo guɔ, Non ɉu pələ, yai ə ɉee a gwɛlin gəlee həɠəmun, a yai ə yɛnɛ̨ɛ̨ kəlee pɛli la. 3Non ti ɓə a Yaa kpinįi ŋą mąąwiɛlaa too pono ŋą, bələi lɔ gaa la, bələ lɔ ɓə Non gaa la, ɛlɛɛ Naa woo ŋą hvaŋą ɓə ɉeɛ yɛnɛ̨ɛ̨ kəlee mu. Yii kɛa, ə nuą kəlee di wɔɔ nɛ̨ŋɛ̨nŋaa waa diɛ, ə tɛ ə hee Hééɓolaa ɓa-mįi-yee hu.
Yálá lon gɛnɛ̨i dɛɛ malakaɠaa diɛ
4Gɛnɛ̨ mɛ̨nį ə tɛɛ malakaɠaa diɛ ɓə gɛ, ə laa ta hɔlɔɓo, gɛnɛ̨ dɛɛ malakaɠaa di wɛi ɓa.
5Malakaɠaa tii, nɛlɛ ɓə aa ta kɛ mą:
«Nón maa yɛ́, ɲą́ą́ kpɔ ɓə ə́ kaa háákələi.»
Ə lɛɛ nwɔ̨nɔ̨, yɛ kɛ mą:
«Ɲą́ą́n, gáá pai kɛi a ə́ nąn, ɛlɛɛ, yɛ ɓo pai kɛi a nón?»
6Kɛlaa yaamun, ɓɛlɔwai ə kɛli pa Lon dɔlɔɔ lɛi la yɛnɛ̨ɛ̨ ɓa, ə mo yɛ:
«Yálá ŋą malakaɠaa kəlee, 'ká kwɛli hvilɛn mą.»
7Yii ɓaa malakaɠaa di wɛi, nwoo ka, yɛ mą:
«Yaa ɓə a ŋą malakaɠaa kɛ a hvaŋą,
ə ŋą kɛlaɠaai kɛ a nwɔ̨n nən.»
8Kɛlaa, yii ɓaa a Non nwɛi, Yaa kpinįi ə mo, yɛ:
«Ə́ wɔɔ tɔɔkpəlin, oo Yálá, gaa lɔ heeni ɉeei a yələ kəlee mɛ̨nį,
ɛlɛɛ, tələnmolaa ɓə ya ə́ wɔ tɔɔlai kɛ ɉu.
9Ə́ Tələnmolaa wɛli la kɛ, Ə́ mɛ̨nį ɲɔ̨n nwɛli kpɛɛ yɛ́,
Yili ɓə gɛ, oo Yálá, ə́ wɔɔ Yálái ə́ ə́ mąątí a dɔɔ wulɔ,
a kwəinɛ̨ɛ̨ wulɔ, ə ə́ həɠə ɉu ə́ ɓɛlaa lɔwai.»
10Ɛlɛɛ nwɔ̨nɔ̨, yɛ mą:
«Yɛ́ ɓə wɔlɔ, a gɔwɔ tɔɔ yələ, Ną́mu, ə́ yɛnɛ̨ɛ̨ kɔwɔ hvilɛn,
ɛlɛɛ, yələ kwəi hɛnŋąa kəlee kaa a ə́ yee pɔɔ.
11Di wɛi, haa kaa diɛ, kɛlaa, ə́ wɛi, ə́ kaa lɔ laa a yələ kəlee.
A tɛ̨ą, gəlee da haɠa yɛ həɠə.
12Ɛlɛɛ, bələi da gɛ la a biliɉu, bələ ɓə ə́ kaa pai gɛi la a diɛ,
bələi da həɠə mąąhvalin na, bələ ɓə yá di mąąhvalin na.
Kɛlaa, ə́ wɛi, ə́ mąą hva hvalin, ə́ wɔɔ yɛnɛ̨ɛ̨, ɲɛ̨n deei hvo mą.»
13Ɛlɛɛ, malakaɠaa tii, nɛlɛ ɓə aa ta kɛ mą:
«'Hee mamįiyee hu,
ŋą́ ə́ yowoɠaa kəlee pɛlɛ ə́ kɔ́wɔ mu, yɛ haɠa?»
14Malakaɠaa tii, di hvo mɔ̨ɔ̨ a hvaŋą diɛ di wɔ mąątíí kɛ, diɛ di tí mɛ̨nį lɛlɛɛ kɛ mɛ̨nį ɓa, nuąi pai ɓalo mɛ̨nį hɔlɔɓoi a di kwɛlin, diɛ?
Currently Selected:
Hebreu 1: BKPDCG
Highlight
Copy
Compare
Share
Want to have your highlights saved across all your devices? Sign up or sign in
