Gɔwɔ tɔɔi 50
50
Ɉakɔbə powa loo mɛ̨nį
1Ə kɛ lɔ tii, Ɉosɛfə ə wolo nąn ma, ə wɔlɔ kpɔ kɛnɛ̨, ɲɛ̨iya yɛ pu nąn ɲɛ̨ilaa, ə yələwala too nąn ma. 2Yili pulu, ɲɔwɔtɔlɔɠaai ŋɛ̨i kɛ Ɉosɛfə yee mu, ə mo diɛ, di nąn bowa pɛli; di Israɛlə powa pɛli. 3Hvóló pow nąąn ɓə di gɛ, diɛ bowa pɛli. Eziptə nuą di Ɉakɔbə haa wɔlɔ ɓo a hvóló pow mɛ̨ihveelɛ.
4Ɉakɔbə haa wɔlɔ ɓoɔ kpɛɛ pulu, Ɉosɛfə ə mo tɔɔmun gwɛlɛ nu kpɛa kpɛaɠaa diɛ, yɛ diɛ: «Gɛ́ ka ɲɛ̨́i mąąwɛli kaa, ka hvaa mą, ka nwóó ŋɛ̨i laa həli tɔɔmun ma, kaa mą: 5‹Ną́n gɛɛ ni heeni, ə vɛli mą́ą́, yɛ, a kulɔ taai, ŋį́ naai pɛli Kanaan lɔi hu, gámąi tii yaa kpinį ə dee ɉu.› Ɲą́ą́n ŋį́ hvaa mą, gɛ́ mą: gáá pai gɛi tii. Yili ɓa, gɛ́ ka hvaa mą ŋą́ li, ŋą́ nąn naai pɛli Kanaan, ŋį́ pənə ŋį́ pa.»
6Tɔɔmun ə hvaa di nwoo ɓa, yɛ Ɉosɛfə ɓa: «'Li ə́ ə́ nąn noo yɛ bələi ə́ ə́ woo kwɛlɛ la.» 7Ɉosɛfə ə həɠə yɛ li nąn nooi. Dɔɔ kwəlii nu kpɛa kpɛa da galanɉonŋąą, ə pɛlɛ la Eziptə nɔi nąninąą kəlee diɛ, di həɠə di lɛɛ bɔ da diɛni di li. 8Ɉosɛfə yəi bɛlɛ́n nuą, ə mą kɛ niɛni yəi bɛlɛ́n nuą da di nąn ɲəi bɛlɛ́n nuą kəlee di həɠə. Nuąi lɔ lɛɛ Gosɛn lɔi hu, diɛ lɔ ɓaa a lɛapɛlɛɛ da daatɛlɛɛɠaa. 9Wotolo kpulu kɛnɛ̨ ə kɛ nuąi tii pulu, nąą mąąwiai kpɔ kɛ kɛnɛ̨.
10Di həliɛ kɛa Atadə gwɛni gbaha ŋą ɲąąləngbɔlɔ hu, Ɉurdɛn pulu pələ, di pənə nwɔ̨nɔ̨ di Ɉakɔbə haa wɔlɔ ta ɓo laa a mąąwiɛ pələ. Ɉosɛfə ə hvóló mɛ̨ihveelɛ kɛ laa, yɛ nąn ɉaa wɔlɔ ɓo. 11Ɉaa mɛ̨nį kɛ pələi tii Kanaan nuąi di gaa Atadə gwɛni gbaha mɛ̨i, diɛ mą: «Ɉaai ŋɛ̨i mąą mɛ̨nį walawalaai Eziptə nuą diɛ.»
Yili ɓə gɛ, di nąą laa hee a: Abɛlə-Misraimə#50.11 Abɛlə-Misraimə: mukulaa ɓaa a: «Eziptə nuą di wɔ haa mɛ̨nį kɛ pələ», nąą kaa Ɉurdɛn pulu pələ.
12Ɉakɔbə lonnii di gɛ yɛ bələi ə di tí la. 13Di di nąn ɉəɠə, di li la Kanaan lɔi hu, di noo Makpela ɲɛa, gwɛni wolo hu Mamre nwɛla kwɛlɛ. Gɛɛnąą tii ɓə wɔlɔ Abrahamə ə ɲa Hɛtə mun Ɛfrɔn yəi, nąą ə kɛ a nwɔɔ.
14Yii kɛa Ɉosɛfə ə nąn now, yaa, niɛni, ə mą kɛ nuąi lɛɛ di pɔ diɛ pa, da diɛni kəlee, di di pulu pənə Eziptə.
Mɛ̨nįɠaai kɛ Ɉakɔbə haa pulu
15Ɉosɛfə niɛni di hee, diɛ di kee ɓa: «Yii kɛa gu nąn aa haa, Ɉosɛfə kaa pai tinɛ̨n ɉi, ə ɲɛ̨i ɲɔ̨nwɔ̨ɔ̨ hee guɔ, mɛ̨nį ɲɔ̨n kpɔ gu gɛ la, gaa pai nwɔ kwələ kulɔi.» 16Di nɛɛmą, di wɛlɛɛ tɔɔ Ɉosɛfə pɔ, diɛ mą: «Gɛɛ gu nąn hvo pa kulɔ taai, ə kɛ kuɔ: 17‹Ka nwóó ŋɛ̨i laa həli Ɉosɛfə ɓa, kaa mą, Ɉakɔbə yɛ: Mɛ̨ni nwąnąąi ə́ liɛni di naa yɛ́, yii kpɔ di gɛ a yɛ́ a ɲɔ̨nwɔ̨ɔ̨, di mąąhvaalɛɛ gəlee hu.› Yili ɓa, Ɉosɛfə, kuɔ: Ə́ ku mąąhvaalɛɛ, gu kəlee ɓə gwa kwɛli hvilɛn gu nąn nwɔ Yálái ɓa.»
Nwɛlɛɛ tii ɓoi di mo Ɉosɛfə ɓa, ə hee yɛ wɔlɔ. 18Yili pulu, niɛni kpinįi, di pa, di pɛlɛ gɔwɔ mu, diɛ mą: «Kwaa lɛɛ a ə́ wɔ luwɔɠaa.»
19Ɉosɛfə yɛ diɛ: «Ka hvə ɲɔw, vá pɛli tɔɔi Yálá tɔɔi. 20Ka kɛ bɔ ka mɛ̨nį ɲɔ̨n gɛ a ɲą́ą́, kɛlaa, Yálá ə mɛ̨nį ɲɔ̨n tii mąą pənə a nɛlɛɛ, ə gɛ, nu kpulu tamąą ə ɓalo, yɛ pələi kaa kpinįi kaa gaa la háákələi. 21Ka hvə ɲɔw tɔ̨nɔ̨ kpɛli. Gáá gíli lɛɛi ka hu, ŋį́ ka mąąkpaan gbɛɛ ka ka yəi bɛlɛ́n nuą kəlee.»
Bələ ɓə Ɉosɛfə ə niɛni liilaa la a wɛlikɛmąą woo.
Ɉosɛfə haa mɛ̨nį
22Ɉosɛfə da nąn ɲəi bɛlɛ́n nuą di kɛ heeni Eziptə lɔi hu. Ɉosɛfə kaa kwɛlan ə kɛ a: kwɛlan nwun dɔ̨nɔ̨ kwɛlan bow. 23Ɉosɛfə ə lɛɛ heeni ə non Ɛfraimə lonnii di wɔɔ lonnii hon, ə lɛɛ la ɉu, ə həli la mąnįn mɛlaa heei ɉaaɓa nąą ɓa. Ə mą kɛ non Manase, ə yili nwɔ lon Makirə nwɔ mąnįn bulu mąnįn ɉon.
24Ɉosɛfə yɛ niɛni diɛ: «Gáá pai laai kwɛlɛ; kɛlaa, Yálá kaa pai ɲɛ̨i lɛlɛɛ heei kaa, ə ka kulɔ nɔi ŋɛ̨i hu, ə li a kaa, ɓɛi wɔlɔ ə nąą laakwɛlanmo Abrahamə, Isaakə da Ɉakɔbə diɛ.» 25Ka ka kwɛla, kaa diɛ: «Yálá a pa ɲɛ̨i lɛlɛɛ heei kaa, ka káá gɔ́wɠaa həɠəi ka li la.»
Ɉosɛfə niɛni diɛ mą: «Kwa gɛ yɛ bələi tii ə́ mo la.»
26Ɉosɛfə kaa kwɛlan ə kɛ a kwɛlan nwun dɔ̨nɔ̨ kwɛlan bow, yɛ laa nąnni kwɛlɛ. Di bowa pɛli di naa kəhi hu Eziptə.
Currently Selected:
Gɔwɔ tɔɔi 50: BKPDCG
Highlight
Share
Compare
Copy
Want to have your highlights saved across all your devices? Sign up or sign in
