Gɔwɔ tɔɔi 38
38
Ɉuda da Tamarə
1Gwɛlan dɔ̨nɔ̨i tii hu, Ɉuda ə həɠə nąn nonnii pɔ, ə li Adulamə hulɔnu ta pɔ, diɛ kɛ naa ɓa: Hira. 2Ɉuda ə lɛɛ Adulamə, ə Sua Kanaan mun non ɉəɠə a nɛ̨ą, da yaa di lɔ pɛlɛ́n. 3Ə koo həɠə, ə lon ɉulɔnu kaa, Ɉuda ə naa hee a: Ɛrə. 4Ə non tii pulu kaa a hulɔnu, nɛ̨ɛ̨nu kpinįi ə naa hee a: Onan. 5Ə pənə nwɔ̨nɔ̨ ə lon ɉulɔnu takpɛli kaa, ə naa hee a Sela. Sela kaai lɔwai, Ɉuda ə kɛ Kezivə.
6Ɉuda ə nɛ̨ɛ̨nu ta həɠə ə dɛɛ non dɔlɔɔ Ɛrə pɔ a nɛ̨ą, diɛ kɛ mą: Tamarə. 7Ɉuda lon Ɛrə túwɔ́ pələ wɛli hvo kpɔ kɛ Yai-Laa ɓa. Yai-Laa ə baa. 8Nąąlɔwai, Ɉuda yɛ non Onan ɓa: «Ə́ liɛ aa haa, nɛ̨ąi tii həɠə, əgɛ, ə́ ɉuwu kaa mą.»
9Kɛlaa, Onan kili ə kɛ ɉu yɛ, da nɛ̨ɛ̨nui tii da lon gaa, naa hva lɛɛ mą, yili ɓə gɛ, da laa, hva kɛ bɔ nɛ̨ɛ̨nu hvo koo həɠə, ə kɛi ɲá pu nɔi ɓa. 10Onan túwɔ́ pələi tii hvo nɛ̨ɛ̨ Yai-Laa ɓa, Yai-Laa ə gɛ, yaa kpɛli ə haa. 11Ɉuda yɛ kɛa non nɛ̨ą Tamarə ɓa: «Yɛ bələi yáá lɛɛ la a kalanin, 'li ə́ lɛɛ ə́ nąn ɲəi bɛlɛ́n, ə́ nąą mąą kpɔn, ə lɛɛ ɉu nón Sela ə laŋą.»
Ɉuda ə kɛi mo gwəi pələ, yɛ kɛ mą: «Və́ bɔ Sela yaa kpɛli hvo haa, yɛ bələi niɛni di haa la.» Tamarə ə li nąn ɲəi bɛlɛ́n, ə lɛɛ laa.
12Lɔwai tamąą tɛɛ pulu, Sua lon nɛ̨ɛ̨nui ŋɛ̨i kɛ a Ɉuda nɛ̨ą, ə haa. Ɓɛlɔwai nɛ̨ɛ̨nui tii ɉaa wɔlɔɓoɔ ə kpɛɛ la, Ɉuda ə həɠə yɛ li Timna da mɛlan Hira yai kɛ Adulamə, ə gɛ, nuąi ŋɛ̨i kɛi nwɔ ɓɛlaaɠaai lɛɠa mɛ̨i tee, ə di mɛ̨i kaa. 13Yələ ta Tamarə ə bələ mɛ̨n diɛ mą: «Ə́ hilɛ nąn gaa lii Timna daai nwɔ ɓɛlaaɠaai ləɠa mɛ̨i teei.» 14Tamarə ə nwɔ kalanin ɉəɠəi kulɔ gwąną, ə həɠə ta yɛɛ a nwun, ə hee Einaimə taa ɉįi la Timna pələi pɔ. Mąąhɔlɔɓo, ə gɔlɔn yɛ kɛ Sela aa laŋą, kɛlaa, nąn və pa li, hvo tɔɔ dɔwɔ, hvo dɛɛ non bɔ. 15Ɉuda ə Tamarə kaa yɛ wɛlikɛnɛ̨ɛ̨nu, mąąhɔlɔɓo, həɠə yɛɛi kɛ a nwun. 16Hvo gɔlɔn yɛ kɛ non nɛ̨ą li. Ə lɛɠɛ mą, yɛ mą: «Gɛ́ gwə́ li gu yii nwɛ̨́ą́ pɛlɛ́ mu.»
Nɛ̨ɛ̨nui tii yɛ mą: «Gwa yili kɛ tii, lə ɓə ya dɛɛ bɔ́?»
17Ɉuda yɛ mą: «Ŋą́ nwɔ́ ɓoluɠaai non dɔ̨nɔ̨ tɛɛ ə́ pɔ a ə́ wɔɔ.»
Nɛ̨ɛ̨nui tii ə pənə yɛ Ɉuda ɓa: «Ŋą́ą́ hvaa mą, kɛlaa, dɔlaa hvə a ə́ yəi hɛn da.»
18Ɉuda yɛ mą: «Lə ɓə ə́ kaa bɔ ŋą́ və a dɔlaa?»
Nɛ̨ɛ̨nui yɛ mą: «Ə́ kpinį ɓa hɛn da hvə, da ə́ wɔ túnwɔ̨n.»
Ɉuda ə ɉɛnŋąąi tii həɠə ə dɛɛ nɛ̨ɛ̨nui pɔ, da yaa də li di yii, ə lɛɛ mą a koo. 19Nɛ̨ɛ̨nui ə tɛɛ ə li nąn ɲəi bɛlɛ́n, ɉəɠəi tii kɛ bɛlɛɛ nwun mɛ̨i, ə ɉəɠə nwun mɛ̨i, ə nwɔ kalanin ɉəɠəi kɛ mą. 20Ɉuda ə mɛlan ŋɛ̨i kɛ a Adulamə mun, ə dɔɔ, molu lon ə naakwɛlanmo nɛ̨ɛ̨nui ɓa, ə li la, ə gɛ, ə nwɔ hɛnŋąąi həɠə nɛ̨ɛ̨nui yəi, kɛlaa, mɛlan və nɛ̨ɛ̨nui kaa. 21Ə daai nuą mąąnikɛ, yɛ diɛ: «Nwɛlikɛnɛ̨ɛ̨nui ŋɛ̨i kɛi hee Einaimə bələ kwɛlɛ, gaa mį?»
Nuą diɛ mą: «Wɛli kɛ nɛ̨ɛ̨nu hvo ta kɛ li ɓɛ daai.»
22Ɉuda mɛlan ə pənə ə pa, yɛ mą: «Və́ nɛ̨ɛ̨nui tii kaa li, ɛlɛɛ, ŋį́ nąą nuą mąąnikɛ, diɛ mą́ą́: ‹Wɛli kɛ nɛ̨ɛ̨nu hvo ta kɛ li ɓɛ daai.›»
23Ɉuda yɛ mą: «Akɛ yili kaa tii, nɛ̨ɛ̨nu kpɔ ə ɉɛnŋąą tii lɛɛ ɲəi. Gu hvo kanąn yili ɓa, ə gɛ, nuą di hvo pa yɛ́lɛ́ kulɔ gu hu. Yii ɓaa tɛ̨ą, yii lɔ ŋį́ molu lon dɛɛ, ə́ li la, hvo nɛ̨ɛ̨nu kpɔ gaa.»
24Ɲąnįn ɉaaɓa tɛɛ pulu, nu ta ə pa, yɛ Ɉuda ɓa: «Ə́ lon nɛ̨ą Tamarə aa gbɔwɔ kɛ a wɛli kɛ mun, aa lɛɛ ɉu aa koo həɠə.»
Ɉuda yɛ diɛ: «Ka ɉon ka li la, ka nɛɛ a vulú, ka gələn.»
25Ɓɛlɔwai di nɛ̨ɛ̨nui tii hon na, diɛ li gələn ɉii, ə wɛlɛɛ tɔɔ ɉilɛ nąn bɔɔli, yɛ mą: «'Ka li, 'ka ɉɛnŋąąi ŋɛ̨i lɛ mą, ə gaa, nui ɲəi hɛnŋąą ɓəi, mąą nu nwɔ koo ka mą́ą́.»
26Ɉuda ə ɉɛnŋąąi tii kɔ́lɔn, ya ɓə a kɛ diɛ: «Nɛ̨ɛ̨nui tii aa tɔ́n ɉon aa tɛɛ mą́ą́; ɲą́ą́ ɓə gáá a hɔn mąąmun. Tɛ̨ą li, mąąnɛ̨ɛ̨ kɛ ŋį́ pa ŋį́ tɔɔ dɔwɔ, ŋį́ dɛɛ nón Sela pɔ a nɛ̨ą, ɲą́ą́ ɓə gɛ a ɲɔ̨nwɔ̨ɔ̨.» Nɛ̨ɛ̨nui tii da Ɉuda di hvo kɛa laa yili pulu.
27Ɓɛlɔwai nɛ̨ɛ̨nui laayɛɛi lɔwai ə ɉəli la, yɛ gwəinwąną kɛ, di gaa diɛ yonŋąą ka tii. 28Dɔ̨nɔ̨ ə ɲee kulɔ, vɛlɛlee kɛ nɛ̨ąą tii kɛ gwɛlɛ, ə nokolo yee hon, ə yeekali kpɔlu too ɲee ɓa, yɛ diɛ: «Nui ŋɛ̨i ɓə pai kɛi a dɔlɔɔ.»
29Nokolo ə ɲee lɔ, mɛlan ə tɛɛ mą, ə pa tɔwɔ. Vɛlɛlee kɛ nɛ̨ąą, yɛ diɛ: «Ə́ tɛɛ a pələ ləi yɛ́ pa?» Ɉuda ə nokolo laa hee a Pɛrɛsə, mukulaa ɓaa: «pələ lə kɛɛ.» 30Mɛlan ə lɛɛ pulu ɲee kali kpɔlu toɔ ɲee kwąną; Ɉuda ə naa hee a Zera, mukulaa ɓaa: «hvóló tɛ.»
Currently Selected:
Gɔwɔ tɔɔi 38: BKPDCG
Highlight
Copy
Compare
Share
Want to have your highlights saved across all your devices? Sign up or sign in
