Gɔwɔ tɔɔi 30

1Ɓɛlɔwai kɛa Rasɛlə ə gaa la yɛ hva pɛli lon ɉɔlɔɓoi, yɛ kɛa tóló kulɔ a niɛ, yɛ ɉilɛ Ɉakɔbə ɓa: «Lón dɛɛ bɔ́ ɲą́ą́ gbɛli, a wala kɛ tii, gáá haai.»

2Ɉakɔbə ə niiɲąnwąną kpɔ kɛnɛ̨, yɛ Rasɛlə ɓa: «Gáá ə́ kwɛi Yálá ɓa ɲą́ą́? Yálá ɓə ə́ kɛ a kpomąnɛ̨ą, ɲą́ą́ hvəi.»

3Rasɛlə yɛ ɉilɛ ɓa: «Nwɔ́ tínɛ̨ɛ̨nui ŋɛ̨i a Bilha, ɉəɠə, ə́ kɛ a ə́ nɛ̨ą, a lon gaa, ə kɛ a nón ɲą́ą́ gbɛli.» 4Rasɛlə ə nwɔ tínɛ̨ɛ̨nui tɛɛ ɉilɛ Ɉakɔbə pɔ, da yaa di lɔ pɛlɛ́n.

5Bilha ə koo həɠə, ə lon ɉulɔnu hɔlɔɓo. 6Rasɛlə ə naa hee a Dan. Mąąhɔlɔɓo, Rasɛlə yɛ mą: «Yálá aa ɲɛ̨i lɛlɛɛ hee mą́ą́, aa nwóó mɛ̨n, aa lon dɛɛ ɲą́ą́ gbɛli bɔ́.»

7Rasɛlə nwɔ tínɛ̨ɛ̨nui Bilha, ə pənə nwɔ̨nɔ̨ ə koo həɠə, ə non ɉulɔnu veelɛnąn ɉɔlɔɓo. 8Rasɛlə ə naa hee a Nɛftali. Yɛ mą: «Ŋą́ą́ kɔ́ pɛlɛ níɛ ɓa, gɔ́ aa nɛ̨ɛ̨ mą́ą́.»

9Yii kɛa Lea ə gaa yaa kpɛli, yɛ diɛ: hvo kɛa lon gaai, ə nwɔ tínɛ̨ɛ̨nui Zilpa həɠə, ə dɛɛ Ɉakɔbə pɔ a nɛ̨ą. 10Jakobə ə lon ɉulɔnu kaa Lea nwɔ tínɛ̨ɛ̨non Zilpa ɓa. 11Lea ə naa hee a Gadə. Yɛ mą: «Nwun na nɛ̨ɛ̨ ɓaa yii ŋɛ̨i aa həli mą́ą́.»

12Jakobə ə lon ɉulɔnu veelɛnąą kaa Lea nwɔ tínɛ̨ɛ̨non Zilpa ɓa. 13Lea ə naa hee a Asɛrə. Yɛ mą: «Yii hu kɛa, nɛ̨ąą kaa pai kɛi mą́ą́: ‹Nwun na nɛ̨ɛ̨mun maa a yɛ́.›»

14Hvóló ta, mɔ̨nun deei lɔwai, Rubɛn ə lɛɛ tɛɛ ɲɛɛ kɔ́wɔ hu nwului ɲɛ̨i da kɛ mą: mandragorə#30.14 mandragorə: Gaa yɛ yagbudɛn, dɔ̨nɔ̨ gbən mələ a kɛ a daŋąą. Ə wɔlɔ kɛi kulɔ Ɉurdɛn ya ɓoloon bɔ. A ɓá, má ə ɓo a mahiɓoɔ, mąą kun nɛ̨ɛ̨, di wɔlɔ kɛi gɛ a nɛ̨ɛ̨nu kwəi nwun ɉalə. ə má ta yɛɠɛ, ə paa la nee Lea pɔ. Yii kɛa Rasɛlə ə nwulu ɓá tii kaa, yɛ Lea ɓa: «Néé, gáá nɛ̨ɛ̨mąą hvəi yɛ́, gɛ́ ə́ ə́ lon nwɔ wulu ɓáɠaai ŋɛ̨i ta tɛɛ bɔ́.»

15Lea yɛ mą: «Akɛtii, ə́ ɉílɛ kulɔ ɲə́i, yɛ́ nwɔ̨nɔ̨ ə́ nón nwɔ wulu ɓaɠaai həɠə?»

Rasɛlə yɛ mą: «Akɛ yili kaa tii, gáá ɉulɔnu tɛɛi ə́ pɔ gbinį tɔ̨nɔ̨i ŋɛ̨i kuu mu, a ə́ lon nwɔ wulu ɓai mąąhvalin.»

16Yələwulii pɔ, Ɉakɔbə ə həɠə ɲɛa pələ yɛ pa, Lea ə kpulun, yɛ li nąąkwiɛn ɉii a kwəinɛ̨ɛ̨, yɛ mą: «Háákələi, mąąnɛɛ ə́ yii ɲə́i bɛlɛ́n, ŋą́ą́ yili nąą mąą ya a nón nwɔ mandragorə ɓa.» Mąą kpinį tii, Ɉakɔbə da Lea di yii ɲəi bɛlɛ́n.

17Yálá ə Lea nwɔ hvɛli woo mu hon. Lea ə koo həɠə, ə nąą yɛɛ a lon ɉulɔnu, yili ɓə kɛ a Lea lon nɔɔlinaa. 18Lea yɛ diɛ: «Yálá aa və́la kulɔ, nwɔ́ tínɛ̨ɛ̨nui tɛɛi ŋį́ mo ɉilɛ pɔ mąą mɛ̨nį ɓa.» Ə non tii laa hee a Isakarə.

19Lea ə pənə nwɔ̨nɔ̨ ə bulu ɓa koo həɠə, ə lon ɉulɔnu hɔlɔɓo, a non mɛ̨idanąn. 20Lea yɛ diɛ: «Yii ŋɛ̨i nwɛi, Yálá aa mɛ̨inɛ̨ɛ̨ kɛnɛ̨ kɛ mą́ą́, kwa ɉílɛ ku kaa kɛa pai kɛi ku kee ɓa, mąąhɔlɔɓo, kwa ya kwaa lon ɉinąą mɛ̨ida kaa.» Lea ə nokoloi tii laa hee a Zabulɔn. 21Lea ə pənə ə lon nɛ̨ɛ̨nu kaa, ə naa hee a Dina.

22Nąąlɔwai, Yálá ə giliŋąhiɛ Rasɛlə ɓa, ə gwəi nwun. 23Ə koo həɠə, ə lon ɉulɔnu hɔlɔɓo. Rasɛlə, yɛ diɛ: «Yálá aa nwumɛ̨ həɠə ɲɛ̨́ilaa.» 24Rasɛlə ə nokoloi tii laa hee a Ɉosɛfə. Yɛ mą: «Gɛ́, Yai-Laa ə non ŋɛ̨i ta pɛlɛ mą.»

Ɉakɔbə da Laban

25Ɉosɛfə kaa pulu, Ɉakɔbə ə mo gála Laban ɓa, yɛ mą: «Gɛ́ kɛa ŋį́ pənə ŋį́ li ku pɔ lɔi. 26Yili ɓa, gɛ́ ə́ hvaa mą, ɲą́ą́ nɛ́ani, kwa ku lonnii kəlee kwə li, mąąhɔlɔɓo, ŋį́ di mąą kóló ɓo yɛ́, ɛlɛɛ gólói ŋį́ gɛ yɛ́, yɛ́ kpinįi ə́ gɔ́lɔ́n.»

27Laban ə nwoo ŋąąpənə, yɛ mą: «Ɉakɔbə, ə́ wəli tɔɔ kpɔ a nɛlɛɛ, nwɔ́ haliɠaai daa nɛ mą́ą́, diɛ: Yálá hvulu aa lúwɔ́ too ɲə́i hɛnŋąą diɛ, ə́ mąą mɛ̨nį ɓa.» 28Yili ɓa, lə ɓə ə́ kaa bɔ ŋį́ dɛɛ ə́ pɔ a ə́ hálá?

29Ɉakɔbə yɛ mą: «Yɛ́ kpinį ə́ gɔlɔn pələi ŋą́ą́ kóló kɛ la yɛ́, ɛlɛɛ, ə́ gɔlɔn yɛ́ diɛ ɲą́ą́ ɉáálai ɓə ə́ wɔ taatɛlɛɛɠaa kpulu hu aa kɛnɛ̨ la. 30Gɛɛ kɛ və́ pa, gbulu hu hvo kɛ kɛnɛ̨ li. Yii hu kɛa, ɉu aa kɛnɛ̨, Yai-Laa aa lúwɔ́ too yɛ́, mąąhɔlɔɓo, gáá ə́ yəi bɛlɛ́n. Yili ɓa, mąąnɛ̨ɛ̨ kɛa ɲą́ą́ gbɛli ŋį́ li ŋį́ kóló kɛ nwɔ́ pɛ́lɛ́i ɓa.»

31Laban yɛ mą: «Lə ɓə mąąnɛ̨ɛ̨ ŋį́ dɛɛ ə́ pɔ?»

Ɉakɔbə yɛ mą: «Mɛ̨nį ŋɛ̨i gáá pai naa həlii yɛ́, ya hvaa mai, ɉála mɛ̨nį takpɛli hva kɛ ɉu, ŋį́ ɲɛ̨́i lɛɛ ə́ wɔ taatɛlɛɛɠaa diɛ, ŋį́ di hon a nɛlɛɛ, yɛ́ pələi ŋį́ kɛi gɛ la tɔlɔɔ. 32Háákələi gáá daatɛlɛɛɠaa kəlee mąąkpɛɛi, taatɛlɛɛ yii kpɔ a kɛ a bɛ̨ɛ̨, ə kɛ a nogolo, ə kɛ a gɛnɛ̨, ŋį́ dɔɔ a dee. Yii kpɔ nwɔ̨nɔ̨ dɛɠiɛi ɲee tɔ̨nɔ̨ mɛ̨i, ə kɛ a nogolo, ə kɛ a gɛnɛ̨, ŋį́ yiliɠaai pili gee mɛ̨i. Ə kɛ a ɓɛlaa-oo, ə kɛ a ɓolu-oo, pələ ɓə gáá gɛi la a gəlee, a kɛ tii bɛ̨ɛ̨ da dɛɠiɛ, yiliɠaai di lɛɛ ɲə́i a ɉála. 33Tinąą tɔwɔ pələ, nwɔ́ tələnmolaa a kɛ a gíti tee hɛn, ɓɛlɔwai ə kaa pai ɉála kɔ́lɔn ɉii la. Ya pa tinąą kulɔi bɔ́, yii a wala kɛ a bɛ̨ɛ̨, a wala kɛ ti dɛɠiɛ ɲee tɔ̨nɔ̨ mɛ̨i, a kɛ tii ŋį́ yili nwuɔ̨.»

34Laban yɛ mą: «Ɲéé kaa mu.»

35Voló tɔ̨nɔ̨i tii hu, ɓolu hilɛɠaai kpɔ kɛ a bɛ̨ɛ̨, molu haaɠaai kpɔ kɛ dɛɠiɛ ɲee tɔ̨nɔ̨ mɛ̨i, ə mą kɛ mɛlaaɠaa, ə kɛ a nogolo, a wala kɛ tii gɛnɛ̨, Laban ə yiliɠaai pili gee mɛ̨i, ə di tɛɛ non ɉinąą pɔ. 36Di di mąąkwɛa Ɉakɔbə ɓa, a hvóló haaɓa hiɛ. Ɉakɔbə yaan ə lɛɛ Laban nwɛiɠaai pulu, yɛ di mɛ̨i kaa.

37Ɉakɔbə ə peuplie kpaɠa tee a nwunu, da amandə kpaɠa, ɛlɛɛ da platan kpaɠa, ə gəlee mąą pɛ̨ɛ̨, gwəlɛɛɠaai tii kɛ mą, ə gəlee kulɔ mą. 38Nwulu kpiɛ mąą pɛ̨ɛ̨ɠaa tii, ə kɛ Ɉakɔbə yəi, daatɛlɛɛɠaa da kɛi di kpələ, a doo ɲai, mąąhɔlɔɓo, da kɛi pa di kpələi, da kɛ tɛi nąąlɔwai. 39Nwulu kpiɛ tii a kɛ tooni ɲai daatɛlɛɛɠaa diɛ tɛ, da di kaa di lonnii pɛ̨ɛ̨, a wala kɛ tii di tɛɠiɛ.

40Laban nwɔ taatɛlɛɛɠaa ŋɛ̨i kɛ Ɉakɔbə yəi yɛ mɛ̨i kaa, ə kɛi bɛ̨ɛ̨ da dɛɠiɛɠaa yɛɠɛ ɉu, yɛ bili gee mɛ̨i. Pələ ɓə ə taatɛlɛɛ kpulu hɔlɔɓo la, hvo kɛ a ɉumɔɔ a Laban nwɛi. 41Ɓɛlɔwai daatɛlɛɛ kpin ɉu kɛnɛ̨ɠaa da kɛ tɛi la, nwulu kpiɛɠaa tii ɓə Ɉakɔbə a bu di kpələ ya hu. 42Kɛlaa, akɛ a daatɛlɛɛ yiiɠaai di kpin ɉu hvo kɛnɛ̨ li, da kɛi tɛ, Ɉakɔbə hva nwulu kpiɛ too ɲai. Yiliɠaai ɓə kɛi di kaa, yɛ lɛɛ ɲee tɔ̨nɔ̨ mɛ̨i a Laban nwɛi, gbin ɉu kɛnɛ̨ɠaa diɛ lɛɛ a Ɉakɔbə nwɛi. 43Ɓələ ɓə Ɉakɔbə ə taatɛlɛɛ kpulu kɛnɛ̨ hɔlɔɓo la, ɓɛlaaɠaa diɛ ɓo ɲəi, ɓoluɠaa, ɲɔ̨nwɔ̨mɛ̨ɛ̨ɠaa, hoohvaalənŋąą, ɛlɛɛ luwɔ hinąą da luwɔ nɛ̨ąą.

Currently Selected:

Gɔwɔ tɔɔi 30: BKPDCG

Highlight

Copy

Compare