Galatə 2

Woo laa mąąi kɛ Ɉerusalɛmə, galan gbɔn kɛ mɛ̨nį ɉu tanɔ̨n, da lɛɛgbɔwɔ ɓa laai Kristalɛa yəi

1Yili pulu, kwɛlan bow kɔw nąąn gulaa ɉu ɓə tɛɠa nwɔ̨nɔ̨ ŋą́ tɛ la Ɉerusalɛmə, kwa Barnabasə, ɛlɛɛ, Titə ə ɓo ku pɔ. 2Yaan mɛ̨nį ta ɓə di nɛ mą́ą́ pono ɲą, yili ɓə gɛ, gɛ́ li laa, ɛlɛɛ, Nwɛlɛɛ lɛlɛɛi ŋį́ kɛi naa həli huwu takpɛliɠaa lɔwai, ŋą́ nɛ diɛ, ŋą́ pənə nwɔ̨nɔ̨, ŋą́ nɛ nu mąą nwumąąɠaai kɛ laa, kwa diɛni ku hee, ŋį́ ɉukulɔ diɛ; ə gɛ, və́ pa gilɛ gbɛli həɠə. 3Kɛlaa, Titei ŋɛ̨i kɛ bɔ́, yɛ ɓo a Grɛkə mun, di hvo kpɛli kpala ná, a ɉee mɛ̨nį kɛ́nɛ̨ ɓa; 4bələi mąn nɛɛ kalan nɛa tii di kɛ la bɔ. Di pa ku lɔwai yɛ nɛ̨nɛ̨ɛ̨n-naa kɛ nuą; di kɛ bɔ di gaa, bələi ku kaa ku wɔɔ lɛɛgbɔwɔ ɓa laa hon ɉii la, a yai həɠə Jesus Kristə pɔ pələ, ə gɛ, di ku lɔ di yee mu. 5Ku hvo ku kpɔwɔ lɛɛ nuą tii yeei kpɛli tiikpɛ, ə gɛ, Nwɛlɛɛ lɛlɛɛ ŋą tɛ̨ą ə lɛɛ bələ mɛ̨i ká yəi.

6Kɛlaa yii hvilɛn na nuąi kɛ di kwɛdɛn ŋąą yə́i, di mąą mɛ̨nį ɓa, yili yaan hvo kɛ walawala li, Yálá hva ɲɛ̨i hee nu kan dɔɔi ɓa; nuą tii, di hvo mɛ̨nį takpɛli laa nwúɔ̨. 7Kɛlaa yaamun, di gaa diɛ, nwɛlɛɛ lɛlɛɛ mąąnɛ̨ɛ̨ ə həli kɛ́nɛ̨ kpolooɠaa diɛ, mąą laa aa tɛɛ bɔ́, yɛ bələi lɔ gɛ́nɛ̨lɛa di wɛi mąą laa ə tɛɛ la Piɛrə yəi; 8hvo gaai, bələi lɔ Yálá ə Piɛrə kɛ la a kɛla Ɉuifəɠaa lɔwai, bələ lɔ ɓə ə gɛ́ la a huwu takpɛliɠaa di wɛi. 9Ɛlɛɛ, mɛ̨inɛ̨ɛ̨i Yálá ə gɛ mą́ą́, di ɉukɔlɔn, Ɉakə, Sefasə da Ɉaan, diɛi kɛ di kɔ́lɔnŋąą yɛ gbɔn ɉu kɔwɠaa, di di yee laa ku yəi, ɲą́ą́ kwa Barnabasə, yili a nɛ yɛ kwa diɛni ku woo tɔɔi aa kɛ tanɔ̨n, ə gɛ, kwəli huwu takpɛliɠaa pɔ, diɛi tii, di li gɛ́nɛ̨lɛa pɔ pələ. 10Di kɛ lɔ kuɔ: 'Ká ká kili kɛ yeehvowolo nuą mąą mɛ̨nį hu, yaan yili kpɔ ɓə ŋą́ kɛi gɛ a nɛlɛɛ.

Polə ə haŋą Sefasə ɓa Antiɔsə

11Kɛlaa, pai Piɛrə ə mo Antiɔsə, ŋį́ haŋą mą kpɔn ɉu, mąąhɔlɔɓo, hvo mɛ̨nį lɛlɛɛ kɛ. 12Hvo gaai, gɛɛ kɛ nuąi Ɉakə ə di tɔɔ, di hvo pa, Sefasə da huwu takpɛliɠaa di kɛli kɔ̨nɔ̨n mįi gee ɓa, kɛlaa, yii kɛa Ɉuifəɠaai ti di pa, ə mąą kwɛa ɉuwu takpɛliɠaa ti diɛ, ə tɔɔ a dee, yɛ ɲɔw Ɉuifəɠaa diɛ, 13ɛlɛɛ, Ɉuifə yiiɠaai ti di too bɔ, diɛ yili kɛ, ə mą kɛ, Barnabasə yaa kpɛli ə həɠə ə too di wɔɔ huhveelɛ laa ti pɔ. 14Kɛlaa gáái ŋį́ mo, hvo hiɛi yɛ bələi nwɛlɛɛ lɛlɛɛ mąą tɛ̨ą kaa la, gbɔn gəlee ɲɛ̨i ɓa, gɛ́ Sefasə ɓa: Akɛ, yɛ́i ə́ kaa a Ɉuifə, ə́ ə́ wɔɔ yɛnɛ̨ɛ̨ kɛ yɛ huwu takpɛliɠaa, hvó gɛ li a Ɉuifə yíi, yá pɛli tɔɔi ləi, yɛ́ kpala huwu takpɛliɠaa la, diɛ túwɔ́ yɛ Ɉuifəɠaa?

Ɉuifəɠaa da huwu takpɛliɠaa di nwun mąąɓoɔi laa na laa haalai

15Ku wɛi ku ka pələ hu, ku kaa a Ɉuifəɠaa, ku hvo a huwu takpɛliɠaa, diɛi a nɛ̨ŋɛ̨n ɉəɠə nuą. 16Ku kili kaa ɉu kuɔ, nu hva pɛli tələnmolaa hɔlɔɓoi dɔn bɔ yíiɓoɔ hu, kɛlaa nu a laa Jesus Kristə la, ya ɓə a tələnmolaa hɔlɔɓo la; kuɔ kpɛli, ku laa Jesus Kristə la, kuɔ pɛli kɛ a tələnmo nuą Kristə nwɔ laa na laai háálai, hvo kɛ li a dɔn bɔ yíiɓoɔ. Gbala ə tɔɔ, nui lɔpee ta hvo pai tələnmolaa hɔlɔɓoi dɔ́n bɔ yíiɓoɔ hu. 17Kɛlaa akɛ, tələnmolaa kwɛliɛ Kristə hu ɓə, aa ku kɛ a nɛ̨ŋɛ̨n ɉəɠə nuą, akɛ tii, Kristə kaa kani a nɛ̨ŋɛ̨n ŋą tímun? Gɛ́ mą: kpaa-o! 18Akɛ dɔ́n bɔ yíi ŋą́ lənə mąi, ŋą́ pənə gɛ́ lɔ ɉui, a kɛ tii, gɛ́ɛ́ gbɔ́wɔ́ pulu kulɔi ka ti. 19Hvo gaai, nwɛ́i, ŋą́ą́ haa dɔn bɔ pələ, ə gɛ ŋą́ yɛnɛ̨ɛ̨ kɛ Yálá pɔ pələ. Kwa Kristə ɓə haa kolɔwa ɓa; 20ŋą́ kɛli kɛa yɛnɛ̨ɛ̨ kɛ, və́ gɛi gbɔ́wɔ́ ɓa, Kristə ka tii yɛnɛ̨ɛ̨ kɛi ɉú. Gbala ə tɔɔ, ɲɛnɛ̨ɛ̨ yii ŋɛ̨i gáá gɛi nu kɔlɔ hui, gáá gɛi laa na laa hu, Yálá lon ŋɛ̨i nwɛ́lilakɛi, yɛ gbɔwɔ kwɛlɛ mą́ą́ mɛ̨nį ɓa, ɉáálai. 21Vá pɛli Yálá nwɔ mɛ̨inɛ̨ɛ̨ kaai a kpɛli-kpɛli. Mąąhɔlɔɓo, akɛ tələnmolaa a hɔlɔɓo kɛ dɔ́n bɔ pələi, akɛtii, Kristə ə haa lɔ kpɛli-kpɛli.

Currently Selected:

Galatə 2: BKPDCG

Highlight

Copy

Compare