Lɛɛ gbɔwɔ ɓa 7
7
1Nąąlɔwai, Yai-Laa yɛ Moisə ɓa: «Hvo gɔlɔn yɛ́, ŋą́ą́ ə́ kɛ yɛ Eziptə tɔɔmun nwɔ yálá, Aarɔn yɛ ɓo a ə́ laawoo tɛɛ mun! 2Mɛ̨nįɠaai ŋį́ nɛ yɛ́, yá nɛ ə́ liɛ Aarɔn ɓa, ya ɓə a li ə naa həli Eziptə tɔɔmun ma, ə gɛ, ə Israɛlə lonnii lɛɛ laa, di kulɔ nwɔ lɔi hu. 3Ə mą kɛ ti, gáá pai Eziptə tɔɔmun gili walawalai, bələi mąn gáá pai kpalo mɛ̨nį kwɛlɛɛn mɛ̨nį tamąą kɛi la nwɔ lɔi hu. 4Kɛlaa hvo pai nwəli tɔɔi ka woo ɓa. Nąąlɔwai, gáá pai nwɔ́ huwalawala laa lɛi Eziptə lɔi ɓa, ŋį́ gɛlɛ. Yili pulu, ŋį́ nwɔ́ nuąi kulɔ Eziptə lɔi hu. 5Eziptə nuą di kaa pai gɔlɔn ɉii diɛ ɲą́ą́ ɓə gáá a Yai-Laa ɓɛlɔwai ŋą́ ɲee haŋą la, gɛ́ nwɔ́ nuąi kulɔ di wɔ lɔi hu.»
6Moisə da Aarɔn di gɛ yɛ bələi Yai-Laa ə di tí la. 7Ɓɛlɔwai di kɛi li mɛ̨nįi tii laa həlii la Eziptə tɔɔmun ma, Moisə kaa kwɛlan ə kɛ a kwɛlan bow mɛ̨ihaaɓa, Aarɔn nwɛi ə ɓo pow mɛ̨ihaaɓa kɔ́w haaɓa.
Eziptə tɔɔmun ə lənə Moisə da Aarɔn di woo ɓa
8Yai-Laa yɛ Moisə da Aarɔn diɛ: 9«Eziptə tɔɔmun a kɛ kaa: ‹'Ka kpalo mɛ̨nį ta kɛ›, yá kɛ Aarɔn ɓa, ‹Ə́ wɔ tunwɔ̨n həɠə, ə́ bili Eziptə tɔɔmun nííla.› A mąą pənə a kaalə.»
10Moisə da Aarɔn di li di həli Eziptə tɔɔmun ma, bələi ti Yai-Laa ə di tí la, di gɛ tii. Aarɔn ə nwɔ tunwɔ̨n pili tɔɔmun da nwɔ ɲɛ̨i tɔwɔ nuą di lííla, dunwɔ̨n ə mąą pənə a kaalə. 11Tɔɔmun ə nɛɛmą ə Eziptə, gilimąą nuą, dɔlukpɛ nuą da bənən gɛ nuą təli, ɛlɛɛ, diɛ kpɛli di da kɛ. 12Nu kəlee yɛ nwɔ tunwɔ̨n pili, yɛ mąą pənə a kaalə. Kɛlaa, Aarɔn nwɔ tunwɔ̨n ə di wɛiɠaai kpələ. 13Ə mą kɛ ti, Eziptə tɔɔmun ə gili walawala, hvo nwəli tɔɔ di woo ɓa, yɛ bələi Yai-Laa ə gbɛa mo la.
Mɛ̨nį nwąnąą dɔlɔɔ: Yá mąąpənə a ɲąmą
14Yai-Laa yɛ Moisə ɓa: «Eziptə tɔɔmun gili aa walawala, hvo gɛli hvo Israɛlə lonnii lɛɛ laa di hvo li. 15'Humo tinąą, ə́ li ɲalee kwɛlɛ ə́ tɔɔmun mąąkpɔn naa. Dunwɔ̨n ŋɛ̨i kɛ ə́ yəi yɛ mąą pənə a kaalə, 'ɉon ə́ yee pɔ. 16A pa, yɛ́ mą: ‹Yai-Laa Hebreuɠaa di wɔ Yálái ɓə dɔ́ɔ́ ə́ pɔ, yɛ ə́ ɓo nwɔ nu huwui ɓa, ə li nɔi pun ɉu, ə kwɛli hvilɛn mą; ya ka ti hvó gɛ li. 17Yili ɓa, Yai-Laa yɛ, yii ka yaa ka káá pai tɛɛi ɉu nwɛi, ə́ kaa pai gɔlɔn ɉii, yɛ́ kɛ Yaa lɔ ɓə gaa a Yai-Laa. Gáá ɲá kɛlɛi a dunwɔ̨n ŋɛ̨i, ə mąą pənə a ŋąmą. 18Ɉɔwɔlee kəlee di haa, ɲá ə kun, Eziptə nuą di hva pɛli da kpələi.›» 19Yai-Laa yɛ Moisə ɓa: «Mo Aarɔn ɓa, yɛ mą: ‹Ə́ wɔ tunwɔ̨n həɠə, ə́ ə́ yee haŋą Eziptə yaɠaa kəlee mɛ̨i, ɲá pɛlɛɛɠaa kəlee da bowa kəlee mɛ̨i, ə mą kɛ, yiiɠaai di yəi heeni ɉɛɲąŋąɠaa hu, gəlee mąą ə pənə a ɲąmą. Ɲąmą ə kɛ nɔi nąą kəlee.›» 20Bələi tii Yai-Laa ə Moisə da Aarɔn di tí la, di gɛ ti.
Aarɔn ə dunwɔ̨n ɉəɠə, ə gɛlɛ ɲá ŋą Eziptə tɔɔmun nííla da nwɔ nu kpɛa-kpɛai. Ɲá lee kɛnɛ̨i ti mąą ə pənə a ŋąmą. 21Ɉɔwɔleeɠaa di haa, ɲá ə kun Eziptə nuą di hvo pɛli da kpələi, ŋąmą yɛ ɓo nɔi nąą kəlee. 22Eziptə pənən gɛ nuą diɛ kpɛli, di da kɛ. Eziptə tɔɔmun ə gili walawala, hvo gɛ hvo nwəli tɔɔ Moisə da Aarɔn diɛ yɛ bələi Yai-Laa ə gbɛa mo la.
23Eziptə tɔɔmun ə pənə ə li ɲəi bɛlɛ́ laaləi, hvo kpɛli gaa a mɛ̨nį walawala. 24Eziptə nuą di yálɔwaɠaa tee ɲa lee kwɛlɛ, ə gɛ, di yá lɛlɛɛ hɔlɔɓo. Mąąhɔlɔɓo, di hva kɛ pɛli ɲá lee ta kpələi. 25Ɲá mąą pənəi ŋɛ̨i Yai-Laa ə mo a ɲąmą, hvóló mɛ̨ihveelɛ ɓə ə gɛ ɉu.
Mɛ̨nį nwąnąą veelɛnąą: Gbəŋəɠaa
26Yai-Laa yɛ Moisə ɓa: «'Li ə́ həli Eziptə tɔɔmun ma, yɛ́ mą: ‹Yai-Laa yɛ Ə́ ɓo nwɔ́ nu huwui ɓa, di li di kwɛli hvilɛn mą́ą́.› 27Yɛ, akɛ yá lənə mą, gaa pai gbəŋəɠaa pui ə́ wɔ lɔi nąą kəlee. 28Ɲá lee kaa pai tɛi a gbəŋə, diɛ lɔ ə́ yəi bɛlɛ́n, ɓɛi ya yii laa, diɛ tɛ ə́ laa gbin ŋą. Diɛ lɔ ə́ wɔ nu kpɛa-kpɛa kəlee yəi bɛlɛ́n, da ə́ wɔ lɔi hu nuą kəlee. Da tɛ kpɔ ə́ yəi nopɛi kɛi. 29Gbəŋəɠaai tii kaa pai kɛi tɛi ə́ kpinį ɓa, ə mą kɛ ə́ wɔ nu kpɛa-kpɛai da ə́ wɔ lɔi hu nuą kəlee diɛ.»
Currently Selected:
Lɛɛ gbɔwɔ ɓa 7: BKPDCG
Highlight
Share
Compare
Copy
Want to have your highlights saved across all your devices? Sign up or sign in
