Lɛɛ gbɔwɔ ɓa 6
6
1Yai-Laa yɛ mą: «Mɛ̨nįi gáá pai naai Eziptə tɔɔmun ma, ə́ kaa kɛa pai gaai. Hvo kɛli da di yee tɔɔ gwąną, ya ɓə a gɛ ə di lɛɛ laa di li; yee tɔɔ gwąną mɛ̨nį laa a too ɉu, ya ɓə gaa pai di kpɛi la nwɔ lɔi hu.»
Yálá yɛ Moisə ɓa gáá Israɛlə nwun mąąɓoi
2Yálá yɛ nwɔ̨nɔ̨ Moisə ɓa: «Ɲą́ą́ ɓə gáá a: Yai-Laa. 3Ŋą́ wɔlɔ gbɔ́ɠɔ́ lɛ Abrahamə ɓa, ə mą kɛ Isaakə da Ɉakɔbə. Ŋą́ gbɔ́ɠɔ́ lɛ diɛ yɛ: ‹Huwalawala Kəlee Nąmu Yálá›, kɛlaa, di kili hvo kɛ ɉu, diɛ kɛ náá ɓaa: ‹Yai-Laa.› 4Yili pulu, kwa diɛni ku mįnɛ̨ həɠə, Kanaan lɔi ŋɛ̨i di kɛ ɉu yɛ nwɛ̨ąa, gɛ́ diɛ gáá dɛɛi ka pɔ. 5Yiihu, mɔ̨nɔ̨i Eziptə nuą di kaa nɔi Israɛlə lonnii pɔ, ŋą́ą́ di wɔlɔ woo mɛ̨n, nwóói ŋį́ gwɛlɛ diɛ, gili aa too ɲą́. 6Yili ɓa, 'mo Israɛlə lonnii diɛ, yɛ́ diɛ:
«Ɲą́ą́ ɓə a Yai-Laa,
gáá pai ka kulɔi bɔlɔtɛ laa ŋɛ̨i hu Eziptə,
Ŋį́ ka kulɔ mɔ̨nɔ̨ hu,
Gáá ka nwun mąąɓoi a nwɔ́ huwalawala laa, yai hɛn da hva tɔɔ na.
7Ŋą́ ka kɛ a nwɔ́ nu huwu, ŋį́ kɛ a ka wɔ Yálá.
Ka gɔlɔn kaa: Ɲą́ą́ gáá a Yai-Laa, gáá a ka wɔ Yálá,
yai ka kulɔ pɔlɔtɛ laa hu Eziptə.
8Gáá lii a kaa nɔi ŋɛ̨i ŋą́ naakwɛlanmo Abrahamə, Isaakə da Ɉakɔbə ni diɛ ɉu.
Gáá nąą tɛɛi ka pɔ a ka wɔɔ.
Ɲą́ą́ Yai-Laa ɲą́ą́ ɓə mo.»
9Moisə ə nwooi tii ɓo Israɛlə lonnii diɛ, di hvo kpɛli di wəli tɔɔ nwoo ɓa, mąąhɔlɔɓo, nuwɔ laa nwɔ mɔ̨nɔ̨ aa kɛ hee di hu.
10Yai-Laa yɛ nwɔ̨nɔ̨ Moisə ɓa: 11«Li, yɛ́ Eziptə tɔɔmun ma: ‹'Ɓo Israɛlə lonnii diɛ, di kulɔ ə́ pɔ lɔi.›»
12Moisə yɛ mą: «Israɛlə lonnii ɓə di hvo di wəli tɔɔ nwóó ɓa, Eziptə tɔɔmun gaa pai nwəli tɔɔ pələ kɛi ləi nwóó ɓa, ɲą́ą́ ŋɛ̨i náá kpan ɉu hvo tee li?»
13Nąąlɔwai Yai-Laa ə Moisə da Aarɔn di tí, Israɛlə lonnii pɔ, da Eziptə tɔɔmun, Israɛlə lonnii kulɔ mɛ̨nį ɓa Eziptə.
Moisə da Aarɔn di kalaɓɔlɔni laa ka
14Israɛlə lonnii lɔwai bɛlɛ́ nąmįną laa ka: Rubɛn, Israɛlə lon dɔlɔɔ, nonnii laa ka: Hanɔkə da Palu, Hɛsrɔn, da Karmi. Rubɛn nwɔ pɛlɛ́ nąmįnąą laa ka ti.
15Simeɔn nwɔ lonnii laa ka: Yemuɛlə, Yamin, Ohadə, Yakin, Soharə, da Saulə, yai kɛ a Kanaan nɛ̨ɛ̨nui lon. Simeɔn nwɔ pɛlɛ́ nąmínąi laa ka ti.
16Levi nwɔ lonnii laa ka, da di huwu: Gɛrsɔn, Kehatə, da Merari. Levi kaa kwɛlan ə kɛ a kwɛlan nwun dɔ̨nɔ̨, kwɛlan bow haaɓa kɔ́w mɛ̨ihveelɛ. 17Gɛrsɔn lonnii laa ka: Livni da Simei da di huwu. 18Kehatə lonnii laa ka: Amramə, Yiseharə, Hebrɔn, da Uziɛlə. Kehatə kaa kwɛlan ə kɛ a kwɛlan nwun dɔ̨nɔ̨, kwɛlan bow haaɓa kɔ́w haaɓa. 19Merari lonnii laa ka: Mali, da Musi. Levi nwɔ pɛlɛ́ nąmínąi laa ka ti.
20Amramə ə dɛlɛ́n Yokɛvɛdə həɠə a nɛ̨ą, da yaa di lon ɉinąą hveelɛ hɔlɔɓo, diɛ ɓaa: Aarɔn da Moisə. Amramə kaa kwɛlan ə kɛ a kwɛlan nwun dɔ̨nɔ̨, kwɛlan bow haaɓa kɔ́w mɛ̨ihveelɛ.
21Yiseharə lonnii laa ka: Kore, Nɛfɛgə, da Ɉikri. 22Uziɛlə lonnii laa ka: Misaɛlə, Ɛlsafan, da Sitri.
23Aarɔn ə Aminadavə lon Elisabɛtə həɠə a nɛ̨ą, Nasɔn mąąhala. Da yaa di lon ɉinąą nąąn ɉɔlɔɓo, di laa ka: Nadavə, Avihu, Eleazarə da Itamarə.
24Kore lonnii laa ka: Asirə, Ɛlkana da Aviasafə. Kore nwɔ pɛ́lɛ́ nąmįnąi laa ka tii.
25Aarɔn lon Eleazarə ə Putiɛlə lon ɉəɠə a nɛ̨ą, da yaa di lon ɉulɔnu tɔ̨nɔ̨ hɔlɔɓo, diɛ kɛ mą: Pinasə.
Nuąi ti ɓə kɛ Levi huwuhu a pɛlɛ́ nąmįną.
26Aarɔn da Moisə ɓə Yai-Laa ə kɛ diɛ: «Ka Israɛlə lonnii kulɔ Eziptə lɔi hu, yɛ bələi di huwu hee pələ kaa la.» 27Moisə da Aarɔn ɓə li, diɛ kɛ Eziptə tɔɔmun ma: «'Ɓo Israɛlə lonnii diɛ di kulɔ ə́ wɔ lɔi hu.»
Yálá ə nwɔ mįnɛ̨i hu nwun Moisə ɓa
28Ɲələi ŋɛ̨i, Yai-Laa ə kɛi mɛ̨nį ɓo la Moisə ɓa Eziptə lɔi hu, 29Ə kɛ mą: «Ɲą́ą́ ɓə gáá a Yai-Laa; mɛ̨nįɠaai ŋɛ̨i gáá moi yɛ́, 'li ə́ mo Eziptə tɔɔmun ma.»
30Kɛlaa, Moisə ə nwoo ŋąąpənə, yɛ mą: «Ɲą́ą́ ka náá kpan ɉu hvo tee li, Eziptə tɔɔmun a nwəli tɔɔ pələ kɛ kpɔ ləi nwóó ɓa?»
Currently Selected:
Lɛɛ gbɔwɔ ɓa 6: BKPDCG
Highlight
Share
Compare
Copy
Want to have your highlights saved across all your devices? Sign up or sign in
