Lɛɛ gbɔwɔ ɓa 27
27
Ɉaláá kulɔi
1«Yá haláá kulɔi ta pɛli a kpitili wulu ɓɛla, ɉaláá kulɔi dɔɔ ɉu ə kɛ a yee laa mą lɔɔli, ɲąą kɛnɛ̨ɛ̨ a yee laa mą lɔɔli, dɔɔ mɛ̨i ə ɓo a yee laa mą haaɓa. 2Yá mįnɛ̨ɠaa tɔɔ nwəli nąąn gəlee ɓa, gąnąn ŋąą mą. Ə́ ɓala kwɛli yá hiɛ mą. 3Ɉaláá kulɔ hɛnɲąŋąɠaai tii kəlee pɛli a ɓala kwɛli, ə́ da pɛli a luwu kələ hɛn, ə́ da kɛ a gwoa-gwoa, ə́ da kɛ a ɲąmą taɠa hɛnɲąŋą, ə́ da kɛ a mįnɛ̨ ɲin ɉu kulaa, ə́ da kɛ a nwɔ̨n ɉəɠə hɛn. 4Yá gala tɔɔ mą a ɓala kwɛli, ə́ bala pələ kɛ yɛ tumɔ nwəli la nąąn ma, ə́ gbonoɠaa hee laa, diɛ ɓo a ɓala kwɛli. 5Yá gala tɔɔ ɉaláá kulɔi ɓa, ə́ gɛ a ɓala kwɛli bala pələ ə kɛ yɛ tumɔ, gwɛa yee ə kpəla ɉaláá kulɔi hąąi. 6Yá kpitili wulu ɓɛla mąą haɠa, ə ɓala kwɛli ya hiɛ mą, ə kɛ a ɉaláá kulɔi nwɔɔ. 7Nwulu mąą haɠaa hveelɛi tii ɓə pai kɛi a ɉaláá taɓali kpəŋə hɛn, yii da nɔ gbonoɠaa ti hu diɛ gbəŋə la. 8Yá ɉaláá kulɔi pɛli, ə́ mu lɛɛ mą, yɛ bələi ŋį́ gbaɠala lɛ la yɛ́ ɓɛ ɲee ɓa.
Gwəli hąąi kɛ pələ
9«Həɠə ɓɛla ta pɛli, ə́ bɛlɛ gala ɓa, ə yɛɛ nąą kəlee, ə gwəli ɲɛn dɔɔ. Da bala a yeekali walawala, ɉɛɠɛɛ pələ həɠə ɓɛla kwɛa yee a kɛ a yee laa mą nwun dɔ̨nɔ̨. 10Bələ tɔ̨nɔ̨ nwɔ wulu hɔlɔɔn bow hveelɛ da di hvilɛn ɉɛn bow hveelɛ, gəlee diɛ ɓo a ɓala kwɛli, gbonoɠaa da ɉəɠə ɓɛla lɔ kwɛli hɔlɔɔnŋąą diɛ ɓo a wali kwɛli. 11Bələ lɔ ɓə nwɔ̨nɔ̨ ɲələi pələ a kwɛa la, a yee laa mą nwun dɔ̨nɔ̨ həɠə ɓɛla, da nwɔ wulu hɔlɔɔn bow hveelɛi da di hvilɛn ɉɛn bow hveelɛ diɛ ɓo a ɓala kwɛli, nwulu hɔlɔɔnŋąą di wɔ gbono da gwɛli hɔlɔɔn bɛlɛɛɠaa, di ɓo a wali kwɛli. 12Gwəli ɲąą kɛnɛ̨ pələ ka pai kɛi; voló tooi gboloyá tənən ma pələ, ɉəɠə ɓɛla ə ɓo ɉu a yee laa mą pow lɔɔli, di wɔ wulu hɔlɔɔn pow da vilɛn ɉɛn pow. 13Gwəli ɲąą kɛnɛ̨ pələ voló həɠəi bələ ə ɓo a yee laa mą pow lɔɔli. 14Yee tɔɔ ɉu pow gɔw lɔɔli həɠə ɓɛla, a kɛ bɛlɛ́ laaləi bələ tɔ̨nɔ̨ da nwɔ wulu hɔlɔɔn ɉaaɓa, da nwulu hɔlɔɔn vilɛn ɉɛn haaɓa. 15Bələ tɔ̨nɔ̨ yee laa mą pow gɔw lɔɔli həɠə ɓɛla, da wulu hɔlɔɔn ɉaaɓa, da di hvilɛn ɉɛn haaɓa. 16Gwəli laa kpulu həɠə ɓɛlaɠaa da kwɛa a yee laa mą pow hveelɛ, gbɔluɔ mu tɛɠiɛ viliiɓoɔ, gbɔluɔ gbələ tətə, diɛ ɓo a yeekali walawalaa mąą puɔ, ɛlɛɛ, wulu hɔlɔɔn nąąn, da di hvilɛn ɉɛn nąąn. 17Nwulu hɔlɔɔnŋąą di tinɛ̨nŋąą gwəli ɓa, da kɛ a di yilɛɛ di kee ɓa a wali kwɛli, di wɔ gbonoɠaa diɛ ɓo a wali, di hvilɛn ɉiiɠaa diɛ ɓo a ɓala kwɛli. 18Gwəli kwɛa pələ kaa pai kɛi a yee laa mą nwun dɔ̨nɔ̨, ɲąą kɛnɛ̨ pələ ə ɓo a yee laa mą pow lɔɔli, dɔɔmɛ̨i ə ɓo a yee laa mą lɔɔli, nwulu hɔlɔɔn vilɛn ɉiiɠaa da kɛ a ɓala kwɛli. 19Bɛlɛ́ mu hɛnŋąą kəlee, nąą kolo kɛ hɛnŋąą, nwulu hɔlɔɔn da gwəli wulu hɔlɔɔnŋąą kəlee, da kɛ a ɓala kwɛli.
Nwɔ̨n ɉee wulɔ
20«Mąąnɛ̨ɛ̨, ə́ mo Israɛlə lonnii diɛ, di pa a wulɔ nwunu ə́ pɔ, nwɔ̨n ɉee mɛ̨nį ɓa, ə kɛ a wulɔ lɛlɛɛ, yii a nwulɔ nwɔ̨n naahɔnmo a nɛlɛɛ, ə gɛ, nwɔ̨n ə kɛ lɔ lən ɉii a yələ kəlee. 21Ɓɛi gu kaa pai kɛi gu kee kaai laa, ɉəɠə ɓɛla ŋɛ̨i hɛlɛn ni mįnɛ̨ kəhi lííla, mo Aarɔn da nonnii diɛ, di nwulɔ nwɔ̨n ɉee nííla yɛ lən, a yələwulii da yələwala, Yai-Laa lííla. Yili ɓə pai kɛi a Israɛlə lonnii di wɔ kóló, mąą hva hvalin, yɛ ɓo a yələ kəlee mɛ̨nį.
Currently Selected:
Lɛɛ gbɔwɔ ɓa 27: BKPDCG
Highlight
Share
Compare
Copy
Want to have your highlights saved across all your devices? Sign up or sign in
