Lɛɛ gbɔwɔ ɓa 24
24
Yálá da Israɛlə di mįnɛ̨ həɠə
1Yai-Laa yɛ Moisə ɓa: «'Tɛ ɲee nwuɔ̨, ka Aarɔn, Nadavə, Avihu da Israɛlə kalanɉon pow mɛ̨ihveelɛi. Ka lɛɛ kwɛa la ka pɛlɛ ka liiɓa. 2Kɛlaa, Moisə yɛ́ tɔ̨nɔ̨ ɓə pai lɛɠɛi Yai-Laa ɓa. Yiiɠaai tii di hva lɛɠɛ laa, ɛlɛɛ, nu kpulu hvo lɛɛ ə́ pulu ka hvo tɛ.»
3Moisə ə pa, ə Yai-Laa wooɠaa kəlee da nwɔ tɔ́n nwoo hukulɔ nɔi lonnii diɛ. Nuą kəlee di nwoo mu hon a gee, diɛ mą: «Nwooɠaai kpɔ tii Yai-Laa ə mo, kwa gəlee kɛ.»
4Moisə ə Yai-Laa wooɠaa kəlee pɛ̨ɛ̨, ə muhəɠə yələwala pinɛ̨ɛ̨, ə haláá kulɔi pɛli Yai-Laa ɓa, a kwɛni pow kɔ́w hveelɛ, ə di tɔɔ a Israɛlə lonnii pow kɔ́w hveelɛi laa. 5Yili pulu, ə Israɛlə hilɛlɛa tɔɔ yiliɠaai di Yálá mąąwiɛ haláá kulɔ, di nįŋɛ̨ gbɔnŋaa paa Yai-Laa ɓa a liilaa haláá. 6Moisə ə ɲąmą bələ tɔ̨nɔ̨ həɠə, ə bu tɛaɠaa hu, ɲąmą bələ tɔ̨nɔ̨i ti lɛɛ, ə daɠa ɉaláá kulɔi. 7Ə mįnɛ̨ hɛɓɛ́ həɠə, ə ɉu woo ɓo nɔi lonnii diɛ. Yiliɠaai diɛ mą: «Mɛ̨nįɠaai kpɔ Yai-Laa ə mo, kwa gəlee kɛ, ku lɛɛ gəlee pulu.»
8Moisə ə ɲąmą həɠə, ə daɠa nuą mɛ̨i, yɛ diɛ: «Mįnɛ̨i Yai-Laa ə naa gwa diɛni gu lɔwai, yaai ɉu woo ɓaa a nwooɠaai ŋɛ̨i kəlee, ɉəɠə ɲąmą ka.»
9Moisə ə tɛ, da Aarɔn, Nadavə Avihu da Israɛlə kalanɉon pow mɛ̨ihveelɛi. 10Di Israɛlə nwɔ Yálái kaa, gɔwɔ mu ə kɛi lən yɛ da diamąn pɛlɛ laa, dɛɠiɛ yɛ yələkɔlɔn. 11Israɛlə kalanɉonŋaai ti, Yálá hvo mɛ̨nį ɲɔ̨n gɛ a diɛ, di pɛli Yálá kaai, di di laa mįi, di di kpələ.
Moisə da Yálá di di kee kaa ɲee nwuɔ̨
12Yai-Laa yɛ Moisə ɓa: «'Tɛ́ bɔ́ pələ, ɲee nwuɔ̨, ə́ lɛɛ laa ŋį́ gwɛni ɓɛlaɠaa tɛɛ ə́ pɔ. Diɛ ɓaa Dɔ́n nwoo da díɓoɠaai ŋį́ di pɛ̨ɛ̨, yɛ́ pɛli nuą mąąkwɛlii mą.»
13Moisə ə muhəɠə, da bɔmun Ɉosue, ə tɛ Yálá nwɔ yeei ɓa. 14Yɛ galanɉonŋaa diɛ: «Ka ku mąąkpɔn ɓɛ, ə lɛɛ ɉu ku pənə ku pa. Aarɔn da Hurə di kaa ka pɔ, nui mɛ̨nį a gaa, ə mo diɛ.»
15Moisə ə tɛ ɲee nwuɔ̨, dulɔ kpinįn ə pɛlɛ kɛa ɲee mɛ̨i. 16Yai-Laa nwɔ Mąąɲinɛ̨n ə kɛ Sinai yee mɛ̨i, dulɔ kpinįn ə pɛlɛ ɲee mɛ̨i hvóló mɛ̨ida yeemu, voló mɛ̨ihveelɛ yələ, ə lɛɛ dulɔ kpinįn ɉu, ə Moisə təli. 17Yai-Laa Mąąɲinɛ̨n ə lɛ Israɛlə lonnii diɛ yɛ nwɔ̨n nən ɲee tona. 18Moisə ə lɔ dulɔ kpinįn ɉu, ə tɛ ɲee ɓa. Moisə ə lɛɛ ɲee hu hvóló pow nąąn da kpinį pow nąąn.
Currently Selected:
Lɛɛ gbɔwɔ ɓa 24: BKPDCG
Highlight
Share
Compare
Copy
Want to have your highlights saved across all your devices? Sign up or sign in
