Lɛɛ gbɔwɔ ɓa 15
15
Moisə da Israɛlə lonnii di wɔ nwun mąąɓo wələ yii di doo
1Moisə da Israɛlə lonnii di nwələi ŋɛ̨i too Yai-Laa ɓa, diɛ kɛ mą:
Gáá wələ tooi Yai-Laa ɓa,
aa yeetɛɛmąą walawala kɛ,
aa hoo da mɛ̨i nuą pili gboloyá hu.
2Yai-Laa ɓə gaa a nwɔ́ huwalawala da nwɔ́ wələ,
gaa a málomun,
gaa a nwɔ́ Yálá, Ya ɓə ŋą́ Naa tɛ.
Ną́n nwɔ Yálá li,
gáá mąą wələ tooi.
3Yai-Laa kaa a kɔ́kuláá,
Naa ɓa a: Yai-Laa.
4Aa Eziptə tɔɔmun nwɔ wotoloɠaai,
da nwɔ kɔlaɠai pili gboloyá hu,
nwɔ kɔ́kulááɠaai,
daa lɛɛ veegbɔ̨nɔ̨ gboloyá hu.
5Ɲá aa di mɛ̨i kpulu,
daa yɛɛ mu yɛ kwɛni kpuwulu.
6Ee! Yai-Laa Ə́ ɓa-mįi-yee
aa gbɔwɔ lɛ a huwalawala laa,
Yai-Laa Ə́ ɓa-mįi-yee
aa Ə́ yowoɠaa hu wolo.
7Ə́ hvaŋą kɛnɛ̨ pələ
aa Ə́ kɔ́yɔwɔɠaa too,
Ə́ wɔ liiholi aa gəlee kəlen yɛ dɛ̨ɛ̨ kpalaan.
8Ə́ hunwɔ̨i nɔ̨ɔ̨
a yáɠaa kpinįn gɛ,
yáɠilin yɛ tɔɔ gee mɛ̨i,
yɛ kpukpu,
gboloyá kpon ɉu yɛ walawala.
9Ku yowoɠaa di kɛ diɛ:
«Ku kaa hvilɛn ɉii di pulu, ku di hon,
ku kaa lii ku wɔ kɔ́ pulu hɛn ɉəɠəi,
yɛ bələi ku kaa la bɔ,
ku kaa ku wɔ kɔ́-kɔ ɓɔwai yalai daa hu,
ku yee kaa pai pɛli diɛ.»
10Kɛlaa Yɛ́ Yai-Laa,
Ə́ ɓo Ə́ wɔ hvaŋąi ɓa, ə pa,
gboloyá ə laa di mɛ̨i,
di lɔ ɲá mu yɛ kwɛni kpuwulu,
di laa ɲá kpon ɉu.
11Yai-Laa, yáláɠaa lɔwai gbɛɛ gaa yɛ Yɛ́?
Gbɛɛ ɓə gaa yɛ Yɛ́ mąąhəɠəlaa hu!
Gɛ mɛ̨nįɠaa kɛnɛ̨ pələ mąąɲɔwuɔi,
yɛ pɛli kwɛlɛɛn mɛ̨nįɠaa kɛi?
12Yá Ə́ ɓa-mįi-yee haŋą lɔ,
lɔi laa ə ɓo, ə ku yowoɠaa kpələ.
13Yáá Ə́ wɔ nu huwui nwun mąąɓo,
a wɛlikɛmąąlaa, a huwalawalalaa, Yáá tɔɔ di tɔwɔ,
Yɛ́ li a diɛ ɓɛi ə́ wɔ Mąąhəɠəlaa kaa heeni laa.
14Hį́i takpɛliɠaa da mɛ̨nį ŋɛ̨i bələ mɛ̨n,
di mąą a kpɛlin,
liihɛlɛn aa too Filisti nuą diɛ.
15Ɲɔw aa too Edɔmə lɔi nwun nąmįną hu.
Moabə tɔɔɓɛlaa hu a kpɛlin
Kanaan lɔi hu nuą daa həɠeen a ɲɔw.
16Ɲɔw aa di hu pu diɛ,
Ə́ wɔ yee walawala laa aa di mąą ɲɔw,
daa di kpuwulu kɛ, yɛ kwɛni.
Di kaa pai lɛɛi tí, ə lɛɛ ɉu Yai-Laa
Ə́ wɔ nu huwui ə tɛɛ;
a Ə́ wɔ nu huwui Ə́ di həɠə ɉu, di tɛɛ.
17Ə́ kaa pai lii a diɛ,
Ə́ di hee, yee nwuɔ̨, Ə́ wɔ lɔi hu;
Yai-Laa nąą ɓə Ə́i hee kulɔ laa,
Yai-Laa, nąą ɓə ə́ ə́ hee pɛlɛ́ kɔ́wɔ hvilɛn naa.
18Yai-Laa nwɔ tɔɔlaai, kpəla pələi hvo mą.
19Eziptə tɔɔmun nwɔ hooɠaai, nwɔ wotoloɠaai, da nwɔ hoo mɛ̨i nuą, di lɔ gboloyá hu, Yɛ́ ɓə ɲá hiɛ di mɛ̨i. Kɛlaa, Israɛlə lonnii di wɛi, di ɲá teen a di kɔ́wɔ mąą kpalaa. 20Yálá kwəi mɛ̨nį hukulɔ nɛ̨ɛ̨nu Miriamə, yai a Aarɔn mąąhala, ə nwɔ hvɛli kɛ hɛn həɠə, Israɛlə nɛ̨ąą kəlee di di wɔ hvɛli kɛ hɛnŋąąi həɠə, di hvilɛn bulu, diɛ mąną, diɛ vɛli kɛ. 21Miriamə yɛ nwələ pili mą, mɛlaa diɛ hvaa mu; yɛ kɛ mą:
Ka Yai-Laa mąą wələ too.
Aa yeetɛɛmąą kɛ,
Aa gbɔwɔ ɲɛ̨i pɔ̨nɔ̨.
Ɉoo da mɛ̨i nuą,
Aa di pili gboloyá hu.
Nɔi pun ɉu hiɛ
Mara yá
22Moisə ə mo Israɛlə lonnii diɛ, di həɠə veegbɔ̨nɔ̨ gboloyá kwɛlɛ, diɛ li Surə nɔi pun ɉu pələ. Di hvóló haaɓa hiɛ kɛ nɔi pun ɉu, di hvo yá kaa. 23Di həli Mara; kɛlaa ɲái ti kɛ Mara, di hvo pɛli da kpələi, mąąhɔlɔɓo nwąnąąi kɛ, yili ɓə gɛ, diɛ naa ɓa a Mara, mukulaa ɓa: nwąnąą. 24Nuą di kɛi hvaa di nwun ɉu, Moisə ɓa, diɛ kɛ diɛ: «Ku kpələ yá wɔɔ?» 25Moisə ə nwoo tɛ Yai-Laa pɔ pələ, Yai-Laa ə wulu huwu ta lɛ mą, ə gbuwɔ ta too ɲái; ɲá ə nɛ̨ɛ̨.
Nąą ɓə ə tɔ́n naa laa diɛ, da di hiɛ pələ. Nąą ɓə ə di hukɔɔn naa. 26Yɛ diɛ: «Akɛ ka ka wəli tɔɔ kpɔ a nɛlɛɛ, Yai-Laa ka wɔ Yálái woo ɓa; ka túwɔ́ a ɉaŋąą ɲɛ̨i ɓa, ka ka wəli tɔɔ nwɔ tiɓoɠaa diɛ, ka nwɔ tɔ́nŋąą kəlee pɔ mɛ̨nį kɛ, mɛ̨nį nwąnąąɠaa ti kpɔ ŋį́ naa Eziptə ɓa, vá da laa kaa. Mąąhɔlɔɓo, ɲą́ą́ Yai-Laa, ɲą́ą́ ɓə ŋą́ ka kɔ́lɔi pɔ̨nɔ̨.»
27Di həli Elimə, yá nwun gukɔi pow kɔ́w hveelɛ ə kɛ laa, da tow wulu pow mɛ̨ihveelɛ. Di muwu pɛlɛ laa ɲá kwɛlɛ.
Currently Selected:
Lɛɛ gbɔwɔ ɓa 15: BKPDCG
Highlight
Share
Compare
Copy
Want to have your highlights saved across all your devices? Sign up or sign in
