Lɛɛ gbɔwɔ ɓa 13
13
Tɔ́n vilɛn ŋąą lon dɔlɔɔɠaa mąą mɛ̨nį ɓa
1Yai-Laa yɛ Moisə ɓa: 2«Lon ɉinąą dɔlɔɔɠaa kpɔ Israɛlə nuą kaa pai ɉɔlɔɓoi, da di yəi taatɛlɛɛ non dɔlɔɔɠaa kəlee, ka bili gee mɛ̨i, di kɛ a nwɔ́ɔ́.»
3Moisə ə mo nuą diɛ, yɛ diɛ: «Volói ŋɛ̨i Yai-Laa ə ka kulɔ la Eziptə lɔi hu, luwɔlaa hu, ka ka kili lɛɛ ɉu, mąąhɔlɔɓo, nwɔ huwalawala yee ɓə ə ka kulɔ la laa. Mąą hvólói ti a həli, lɛɠɛ yii dɛ hɛn gaa ɉu, nu ta hvo mįi. 4Mɔ̨nun dee ɲąnin ŋɛ̨i a Abibə, ɉu ɓə ka kulɔ la a háákələi yələ.
5«Ɓɛlɔwai Yai-Laa kaa pai ka lɔi la Kanaan lɔi hu; ɓɛi Hɛtə nuą, Amɔrə nuą, Hivi nuą da Ɉebusə nuą di kaa laa. Nɔi tii ɓə wɔlɔ ə naakwɛlanmo ka kalaɓɔlɔni diɛ, yɛ gaa dɛɛi di pɔ. Ɓɛi hɛn gəlee da lɛlɛ laa. Ɉɛlii ti ɓə ka bu a ɲąnin ti da volói ti. 6Hvóló mɛ̨ihveelɛ yee mu, lɛɠɛ yii dɛ hɛn və ɉu, ya ɓə ka kɛ mįi. Voló mɛ̨ihveelɛ yələ, ka yili pu a hɛli Yai-Laa laa hu. 7Volóɠaai ti hu ka wɔ lɔi nąą kəlee piliɛ gee mɛ̨i, mąą hvo nɛ̨ɛ̨li lɛɠɛ yii dɛ hɛn gaa ɉu hvo kɛ ka yəi, ə mą kɛ, lɛɠɛ tɛ hɛn.
8«Ka kɛi ɉɛlii ti pu, mąąnɛ̨ɛ̨ ka ɉukulɔ ka lonnii diɛ, kaa diɛ: ‹Ku kulɔi ŋɛ̨i Yai-Laa ə mo luwɔlaa hu Eziptə, mąą hɛlii ka ŋɛ̨i ku kaa bui.› 9Ɉɛlii ti pu mɛ̨nį ka yəi, gaa a kili lɛɛ ɉu, ka doo ka yee ɓa, ka da yili ka ɲɛ̨i mɛ̨i; əgɛ, Yai-Laa nwɔ tɔ́n nąą kili hvo pa kpɛɛ ka ɲą. Mąąhɔlɔɓo, ya ɓə ka kulɔ luwɔlaa hu a nwɔ huwalawalai hɛn da hva tɔɔ na.
10«Kwɛlan nwoo kwɛlan ka ɉɛlii ti pu a voló leelee. 11Ɓɛlɔwai Yai-Laa a lɔ la a kaa Kanaan lɔi hu, yɛ bələi ə naakwɛlanmo la ka kalaɓɔlɔni diɛ, a nąą tɛɛ ka pɔi; 12Ka lon ɉinąą dɔlɔɔɠaa kəlee tɛɛ Yai-Laa pɔ, ə mą kɛ a ka yəi taatɛlɛɛ lon dɔlɔɔɠaai a ɉilɛ, nwɔɔ li. 13Akɛ a hoohvaalən non dɔlɔɔ, ya nwun mąąɓo a ɓɛlaa lon, awala kɛ tii, ya gbowola kalan nwolo. Yii ɓaa nu kanŋaa di wɛi, ka pɛli ka di nwun mąąɓo.
14«Ka lonnii da ka mąnįn kɛ tinąą tɔwɔ pələ, diɛ kɛ mą: ‹Lə mɛ̨nį ɓa ka káá gɛi ti?› Ka kɛ diɛ: ‹Yai-Laa nwɔ huwalawalai hɛn da hva tɔɔ na, ɉaalai hu ɓə ə ku kulɔ la luwɔlaahu Eziptə. 15Eziptə tɔɔmun ə ganąn bili ku mɛ̨i, hvo kɛi gɛ ku hvo kulɔ nwɔ lɔi hu. Nąąlɔwai, Yai-Laa ə Eziptə nuą lon dɔlɔɔɠaa kəlee paa, ə mą kɛ di yəi taatɛlɛɛ lon dɔlɔɔɠaa kəlee. Mɛ̨nįi gɛi kuɔ huwɔ lon dɔlɔɔɠaa tɛɛ Yai-Laa pɔ, kuɔ lon ɉinąą dɔlɔɔɠaa nwun mąąɓo yaa li.›
16«Yili kaa pai kɛi a bɛ̨ɛ̨ huwɔ kɔ́lɔ palaa hu, ɲiliɛ ə́ nwun ma da ə́ ɓonwon ma, ə kɛ a kili lɛɛ ɉu hɛn, yii a nɛ yɛ Yai-Laa, nwɔ huwalawalai hɛn da hva tɔɔ na, ɉaalai hu ɓə ə gu kulɔ la Eziptə.»
Israɛlə lonnii kulɔ mɛ̨nį Eziptə
17Ɓɛlɔwai Eziptə tɔɔmun ə ɓo la Israɛlə lonnii diɛ, diɛ li, Yálá hvo hvaa mą, di hvo tɛɛ Filisti lɔi hu pələ; bələi mąn bələ yili kpuai kɛ la. Mąąhɔlɔɓo, ə gaa yɛ, da tɛɛ laa pələ, kɔ́ kaa lii heei diɛ, di ɲɔw, di pənə di pulu diɛ li Eziptə lɔi hu. 18Yili ɓə gɛ, Yálá ə di ɲɛ̨i tinɛ̨n, di tɛɛ a nɔi pun ɉu pələ, veegbɔnɔ̨ gboloyá pɔ pələ. Israɛlə lonnii kpulu hu kɛnɛ̨i kpɔ kɛ diɛ həɠə Eziptə.
19Moisə ə mo, di Ɉosɛfə kɔ́wɠaa həɠə, diɛ li la. Mąąhɔlɔɓo, Ɉosɛfə ə wɔlɔ kɛ niɛni diɛ, ka ka kwɛla, kaa diɛ: «Yálá a pa ka kulɔi ɓɛ, ka gɔ́wɠaa həɠə, ə lɛɛ ka yəi, ka li la!»
20Israɛlə lonnii di həɠə Sukotə daai, di li di di wɔ taai pu Etamə nɔi pun gwɛlɛ. 21Hvóló a kulɔ, Yai-Laa, a kɛ hvilɛn ni di tɔwɔ a tulɔ kpinįn, yɛ di tənən dɔɔ, kpinį a pɛlɛ yɛ ɓo a nwɔ̨n nən yɛ di mąąpono gbinį hiɛ kɛɛ hu. 22Dulɔ kpinįn da nwɔ̨n nən, di mąą hvo kɛi kwɛa diɛ, a kpinį da hvóló.
Currently Selected:
Lɛɛ gbɔwɔ ɓa 13: BKPDCG
Highlight
Share
Compare
Copy
Want to have your highlights saved across all your devices? Sign up or sign in
