Efɛsə 4

Kɛ ɉu tanɔ̨n naa

1Gáá kani ká mąąnɛ̨ɛ̨i, gu Nąmu nwɛi hu, ɲą́ą́ ŋɛ̨i gaho ŋą, gɛ́, ká ká wɔɔ yɛnɛ̨ɛ̨ kɛ, a dəliɓo wooi too ká wəlii, mąą hon bələ; 2a ká kpɔwɔ mąą yɛɛ pələ, a liinɛ̨ɛ̨ gwəi laa, a liilaa, 'ká ká liikpələ ká keeni hɔn mu a wɛlikɛmąą laa; 3'Ká tɔɔ a ká nwąnąi, ka kɛ ɉu tanɔ̨n Kili-Mąąhəɠɛɛi gaa ká lɔwai, ká ká yee kanąn mą, yai, ɉɛ̨ą yili yɛli ɓaa a liilaa. 4Kɔlɔ kaa tanɔ̨n, Kili ə ɓo tanɔ̨n, bələi lɔ, 'ka təliɛ la hɛn dɔ̨nɔ̨ ɓa, ká ɲɛ̨i ə ɓo kilitɔɔlaa tanɔ̨n dɔwɔ; 5gu Nąmu kaa tanɔ̨n, laa na laa tanɔ̨n, mąąwaa kɛi tanɔ̨n; 6Yálá tanɔ̨n, a nu kəlee Nąn, ə ɓo nu kəlee mɛ̨i, yɛ gɛ mɛ̨nį kɛ nu kəlee hu, ɉeɛ nu kəlee hu.

7Nu tɛitɛi ə nwɔɔ hɔlɔɓo Yálá nwɔ nɛ̨ɛ̨laa hu, yɛ bələi di Kristə nwɔ mɛ̨inɛ̨ɛ̨ kɔɔn na mą. 8Yɛ bələi nwoo ŋɛ̨i kaa moi la, yɛ kɛ:

«Tɛi ə mo yələi,

ə gaho nąmįną lɛɠɛ mą,

ə mɛ̨inɛ̨ɛ̨ kɛ nuą diɛ.»

9«Ə tɛ yələi!» Yili mukulaa ɓaa: Ə gbɛa yɛɛ kpɔ ə həli lɔi mu. 10Nui ŋɛ̨i yɛɛ, ya lɔ ɓə nwɔ̨nɔ̨ tɛ, yɛ laŋįn yələkɔlɔn gəlee mɛ̨i, əgɛ, ə yələ kwəi kəlee hvɛɛ. 11Ɛlɛɛ, ə mɛ̨inɛ̨ɛ̨ɠaa kɛ, diɛ ɓaa: Gɛlaɠaa, Yálá kwəi mɛ̨nį hukulɔ nuą, Nwɛlɛɛ lɛlɛɛ laa həli nuą, gbɔn mɛ̨ikaa nuą, da mąąkwɛli kɛ nuą; 12bələ ɓə, ə Kristalɛaa heekpəlin na kɛ la, diɛ pɛli Kristə kɔlɔ ɲąąkɔn ɉii, 13ə lɛɛ ɉu, gu kəlee guɔ pɛli kɛi la ɉu tanɔ̨n, laa na laa hu, da Yálá lon gɔlɔnŋąą hu, gu kɛ a nu mąą pɔlɔɔɠaa, gu ɲąą ə pɛli yɛ bələi Kristə kaa la. 14A kɛ ti, gu hva kɛa kɛ yɛ lon ɲii gɛi homa, yɛ nui nuą di wɔ gbana lawoo a mowo, yɛ dɔɔ takpa-takpa, yɛ ɉəɠə tɛ̨ą pələ mɛ̨i. 15Kɛlaa, gwa kɛli tɛ̨ą ɓo wɛlikɛmąąlaa hu, gu kaa pai kɛi kɛnɛ̨i a pələ huwui lɔpee, guɔ li la Kristə pɔ pələ, yai a gu nwun nąmu. 16Ɉáálai ɓə gɔlɔ tɔɔ-tɔɔiɠaa kəlee yiliɛ la gee ɓa kpąą, ə lɛɛ gbulɔnaɠaa kəlee heɛi gee ɓa a nwalawalaa, yɛ kɛnɛ̨ la wɛlikɛmąąlaa háálai. Gólói di tɛitɛi da pɛli gɛi, ə ɓo a ɲąąkwɛlɛɛ di lɔwai a wɛlikɛmąąlaa.

Ɲɛnɛ̨ɛ̨ pɔlɔ da ɲɛnɛ̨ɛ̨ nįnɛ̨

17Yii kani gáá moi káá, gɛ́ wiɛ mą gu Nąmu laa hu, ya ka: 'Ká hvo kɛa yɛnɛ̨ɛ̨ kɛ, yɛ bələi nuąi di hvo Yálá kɔ́lɔn da yɛnɛ̨ɛ̨ kɛ la, a diɛi di wɔɔ kiliŋąhiɛ a di lɔ kpɛli-kpɛli mɛ̨nį hu. 18Di wɔ kiliŋąhiɛ kaa a kpinį ŋą hon, diɛ ɓo a nwɛ̨ąą, Yálá nwɔ yɛnɛ̨ɛ̨ kɛ pələ hu, tɛɠii-yɛnɛ̨ɛ̨i tii di kaa ɉui, aa di kili walawala. 19Kiliŋąhiɛi tii hvo diɛ, daa di kpɔwɔ kpɛlɛ wɛli mɛ̨nį ɓa, di yee ə ɓo la tii mąąliɓi mɛ̨nį lɔpee gəlee hu, a kɛɛ kala pələ.

20Kɛlaa ka wɛi, bələ hvə ká Kristə mąą mɛ̨nį mąąkwɛli la. 21Akɛ kpɔ Kristə ɓə ká mąą mɛ̨nį mɛ̨n, akɛ kpɔ yaa ɓə ká mąą mɛ̨nį mąąkwɛlii, yɛ bələi gaa la a tɛ̨ą Jesus hui: 22Hvo kɛli, ká ká yee kulɔ ká yíi pələ pɔlɔ-pɔlɔ hu, ɲíi pɔlɔ-pɔlɔ kɔlɔi tii kɛ káá, 'ká gulɔ káá, a yai ɉu a kala; a ɓowo ɲɛ̨i kulɔ bɔ, laa pɔɔ; 23Mąąnɛ̨ɛ̨ ká kɛ pələ mąą ə hvalin a nįnɛ̨ ká lii hu pələ, da ká wɔɔ kiliŋąhiɛ hu. 24'Ká lɔ nu nįnɛ̨ kɔlɔ hu, yai Yálá ə bɛli tələnmolaa hu, da mąąhəɠəlaai a kulɔ tɛ̨ą hu.

25Káá kulɔ kɛa lɛɛ yee kɔnma; 'ká tɛ̨ą ɓo kɛa ká kee ɓa, gbala ə tɔɔ, gu kaa a gu keeni tɔɔ-tɔɔnŋaa. 26Ká líí a holi, 'ká hvo nɛ̨ŋɛ̨n ɉəɠə; hvóló hvo laa kpɔlɔ ɲą, ká wɔ lííholi ə ɓo ni ɉu. 27'Ká hvo pələ tɛɛ nąnį pɔ. 28Nui kɛli nwuɔ̨ kɛ, ə kpəla nwuɔ̨ ɓa; yaamun ə tɔɔ a nwąnąi, ə kóló kɛ a tələnmolaa a gbɔwɔ yee, ə hɛn ɉɔlɔɓo, nui kanąn ɉu, ə gulɔ ganąn ɉu. 29Woo ɲɔ̨n nɔpee ta hvo kulɔ ká la, kɛlaa yaamun, ká hvaa woo ə kɛ a nɛ̨ɛ̨, yɛ pɛli nu tənən dɔɔi, yɛ mɛ̨nį lɛlɛɛ kɛ mɛ̨n nuą diɛ. 30'Ká hvo Kili-Mąąhəɠɛɛ liikələn gwəi, yai Yálá ə gɔlɔn ɉii kɛ la káá, káá ká nwun mąąɓo yələ mąąkpɔn na. 31Woo ɲɔ̨n, liikələn gwəi, lííholi, lii ɲąnwąną, háŋąmąą da lalan, mɛ̨nįɠaa tii di mąą hvo nɛ̨ɛ̨li ká lɔwai, da nwąnąlɔɔ huwui lɔpee gəlee. 32'Ká kɛ a ká liinɛ̨ɛ̨ ká kwəi, ká keeni pɔ, 'ká ká keeni mąąwɛli kaa, 'ká ká keeni mąąhvaalɛɛ, yɛ bələi Yálá ə ká mąąhvaalɛɛ la Kristə hu.

Currently Selected:

Efɛsə 4: BKPDCG

Highlight

Copy

Compare