Tɛsalonikə veelɛ 3
3
Liɛwooi vilɛnŋąąi Yálá hvɛli mɛ̨nį ɓa da kóló kɛ mɛ̨nį
1Yii kɛa aa lɛɛ ną́n nonnii, ya ɓaa, ká Yálá hvɛli kuɔ, ə gɛ, Yálá laa woo ə taɠa-taɠa kɛɛnąą kəlee, mąą ə wiɛ yɛ bələi gaa la ká pɔɔli, 2ɛlɛɛ, kuɔ pɛli kulɔi, nwąnąlɔ nuą, da mɛ̨nį ɲɔ̨n gɛ nuą yee mu, mąąhɔlɔɓo, nu kəlee hvəə laa na laa kaa ɲəi.
3Gu Ną́mu a kulɔ nwoo ɓa, ya ɓə pai ká hvaŋąlɔi, yɛ ká mąąkɔ̨nwɔ̨ mɛ̨nį ɲɔ̨n ɲəi. 4Yii hvilɛn na ká mąą mɛ̨nį ɓa, ku laai na, gu Ną́mu nwɛi hu, kuɔ, mɛ̨nįi kwa ká tí a gɛ mɛ̨nį, ká gɛ, ɛlɛɛ, ká káá pai kɛi lɔ gɛi a yələ kəlee. 5Gu Ną́mu ə ka lii tənən dɔɔ Yálá nwɔ wɛlikɛmąąlaa ɓa, ɛlɛɛ, káá tɔɔ a ká nwąnąi Kristə mąą mɛ̨nį hu.
6Ną́n nonnii, ku kaa ká tíi gu Nąmu Jesus Kristə laa hu, kuɔ, kristalɛai di hvo di wɔɔ yɛnɛ̨ɛ̨ laa honmoi, di túwɔ́ pələ hvo yɛ bələi ku ká liɛwoo kɛ la, 'ká ká mąąkwɛa diɛ. 7Ká wɛi, bələi mąąnɛ̨ɛ̨ ká ku pɔɔ kɔɔn na, káá kpinįi ká gɔlɔn. Ku hvo kɛ ku wɔɔ yɛnɛ̨ɛ̨ kɛ li yɔhɔ-yɔhɔ ká lɔwai; 8ku hvo kɛ ku kɔnɔ̨n vɛli li nu ta ɓa, kɛlaa, ku tɔɔ a ku nwąnąi, mɔ̨nɔ̨ hu, hvįikpɛɛ laa hu, a kpinį da hvóló, kuɔ kóló kɛ, əgɛ, ku hvo pa kɛ ká ta nwuɔ̨ a tíɛ̨. 9Yili mąą laa kaa ku yəi, kɛlaa, ku kɛ bɔ, ku kɛ ká lɔwai, a nuąi ká di pɔɔ kɔɔn. 10Yaan, ɓɛlɔwai ku kɛ la ká pɔɔli, ku díɓoi ŋɛ̨i tɛɛ ká pɔ, kuɔ káá: «Nui hvo bɔ hvo kóló kɛ, hvo kpɛli kɔ̨nɔ̨n mįi.»
11Ya ka, kwaa bələ mɛ̨n, diɛ kɛ: nu taɠaa kaa ká lɔwai, diɛ di wɔɔ yɛnɛ̨ɛ̨ hon yɔhɔ-yɔhɔ, diɛ di kpɔwɔ ɲəi wələən mɛ̨nį kpɛli-kpɛliɠaa hu. 12Yili mąą nuąi tii, mɛ̨nįi ku kaa moi diɛ, kuɔ di liɛwoo kɛ la, gu Nąmu Jesus Kristə hu, ya ɓaa: di kóló kɛ a di kpɔwɔ yee, di di kɔ̨nɔ̨n ɉɔlɔɓo, diɛ mįi.
13Yii ɓaa ká wɛi ną́n nonnii, ká hvįi hvo kpɛɛ mɛ̨nį lɛlɛɛ kɛi. 14Akɛ mɛ̨nįi ku kaa moi ɉɛɓɛ́i ŋɛ̨i hu, nui awala lɛɛ nwoo mu, ká ká kili ɲą laa mą, ɛlɛɛ, ká diɛni ká hvo bɛlɛ gee ɓa mɛ̨nį kɛ, ə gɛ, ə nwumɛ̨; 15kɛlaa, ká hvo gaa yɛ, ká yowo, ká niɛwoo kɛ, yɛ ká nąn non da.
Lúwɔ́ da yələ wala too woo
16Gu Ną́mui a liilaa nąmu, yaa kpinįilee, ə ká kɔ a liilaa, a yələ kəlee, a pələ huwui lɔpee. Gu Nąmu ə kɛ ká kəlee ká pɔ.
17Ɲą́ą́ gbínįilee ɓə dúwɔ́ wɛlɛɛ ŋɛ̨i pɛ̨ɛ̨i a ɲéé, ɲą́ą́ Polə. Bələ ɓə ŋą́ ŋą́ hɛɓɛ́ɠaa laa kulɔ la; ɲą́ą́ gbį́nįi ɲéé pɔɔ li.
18Gu Ną́mu Jesus Kristə nwɔ mɛ̨inɛ̨ɛ̨i ə kɛ ka kəlee ká pɔ! Yálá ə kɛ tii!
Currently Selected:
Tɛsalonikə veelɛ 3: BKPDCG
Highlight
Copy
Compare
Share
Want to have your highlights saved across all your devices? Sign up or sign in
