Korɛntə veelɛ 5

1Mąąhɔlɔɓo, ku kili kaa ɉu kuɔ, bɛlɛ́i ŋɛ̨i ku kaa mu ɓɛ yɛnɛ̨ɛ̨, gaa lɔ a ɓuwu, a pa kalai, pɛlɛ́ kpɔ-kpɔɔ kaa ku yəi, yai Yálá kpinįi ə dɔɔ, yələkɔlɔn ɉu pɛlɛ́ li, nu yee hvə dɔɔ li; 2Yiihu, kwa kɛ ɲįŋɛ̨i, kuɔ ku lii pɔ wɔlɔ, kuɔ kɛ ku kɛ mu, yai a ku wɔɔ ɲələi pələ pɛlɛ́i; 3Ŋį́ mo kɛ, ku kaa kɛa kɛ mui, ku hvo li kɛ a ku kpuwulu. 4Ɓɛlɔwai gu kaa ni la ɲɛ̨nɛ̨ɛ̨ pɛlɛ́i ŋɛ̨i mui, gu kaa ɲiŋɛ̨i yɛ tiɛ̨ kɛnɛ̨ a kɛ gu nwuɔ̨, tɛ̨ą li, hvo kɛli gu kulɔ nu kɔ́lɔ hu, kɛlaa, ku kaa bɔ ku yələkɔlɔn ɉu nwɛi tɛ mą, ə gɛ, yɛnɛ̨ɛ̨ kpɛɛ hvo mą, ə hɛn haa kaa mą mąą hvalin. 5Nui gu pɛli tínąą tii mąą mɛ̨nį ɓa, Yálá kpinįi ɓə. Yaa ɓə gu kɔ a ŋą Kilii yəi mɛ̨inɛ̨ɛ̨ dɔlɔɔ.

6Yili ɓa tii, ku hvaŋąlɔi lɔ a yələ kəlee, bələi mąn ku ɉukɔlɔn na kuɔ kɛ, yii kpɔ ni ku kaa gɔlɔi ŋɛ̨i hu, ku hvo ku wɔɔ pɛlɛ́i mu, ku mąą kwɛai ni gu Nąmu ɓa. 7Hvo gaai, ku kaa ku wɔɔ yɛnɛ̨ɛ̨ kɛi laa na laa hu, ku ɲɛ̨i hvo tɔɔ li hɛn da ɓa. 8A tɛ̨ą, ku hvaŋąlɔɔi lɔ a yələ kəlee, ɛlɛɛ, ku kaa kɛa bɔ ku kulɔ gɔlɔi ŋɛ̨i hu, gwəli ku hee gu Ną́mu kwɛlɛ. 9Yili ɓa, ku kɔlɔi ŋɛ̨i, ɲɛ̨i mąą ə hvaliŋ-o, ku kulɔ ɉu-o, yii ku gwɛlii ya ɓaa, kwa Yálá lii hon nɔ. 10Mąąhɔlɔɓo, hvo kɛli gu kəlee gu tɔɔ Kristə ŋą kitii lííla, ə gɛ, mɛ̨nįi nu tɛitɛi ə gɛ nwɔ yɛnɛ̨ɛ̨ yee mu, yɛ ə kɛ a nɛlɛɛ, yɛ ə kɛ a ɲɔ̨nwɔ̨ɔ̨, yɛ mąą hvɛla hɔlɔɓo.

Kristə aa nu kanŋaa da Yálá ni di lɔwai ponnaa kulɔ

11Yii kani, bələi mąąnɛ̨ɛ̨ gu ɲɔw la gu Nąmu ɓa, nu kəlee ə gɔlɔn, kwa tɔɔ a ku nwąnąi, kuɔ nuą kilaa pono, ɛlɛɛ, Yálá ɲɛ̨i ɓa, ku mąą mɛ̨nį hu ponoɔi. Nwɔ́ɔ́ kwəi pələ, mą́ą́ mɛ̨nį hu ponoɔi káá kpɛlimąn ká kili hu pələ. 12Ku hvo pənəi kuɔ ku kpɔwɔ mąą mɛ̨nį lɛ káá, kɛlaa ku kaa bɔ, ká ɲɛ̨i ə pono ku mąą mɛ̨nį hu, nuąi di nwun dɛ mɛ̨nį kaa a ɲɛ̨i həɠə mąą, hva həɠə di koo kpala,, káá pɛli di woo hu tooi. 13Akɛ ɓowo hvaa ɓə ku mo, ku mo Yálá ɓa. Kɛlaa, akɛ kilimąą woo ɓə, akɛtii, ká mąą mɛ̨nį ɓə. 14Kristə nwɔ wɛlikɛmąąlaa aa hee ku hu, ku kili kaa ɉu kuɔ, yii nu tɔ̨nɔ̨ ɓə nu kəlee pulu haa ɓo, akɛti kani, nu kəlee ka ti haa. 15Ɛlɛɛ, ə nu kəlee pulu haa ɓo, ə gɛ, nuąi di hvulú kɔwɔ ɲą, di hvo yɛnɛ̨ɛ̨ kɛ a di kpɔwɔ mąą mɛ̨nį, kɛlaa, di yɛnɛ̨ɛ̨ kɛ nui haa ə nwun, mąą mɛ̨nį ɓa.

16Yili ɓa, yiihu kɛa, gu hvo nu ta kɔlɔn nu kan gɔlɔ hu, akɛ gu Kristə kɔlɔn a nu kanŋaa di wɔ nu kɔlɔn bələ, bələ yili hvəə kɛa ku gɔlɔn na. 17Yili ɓa, nui gaa Kristə hu, gaa kɛa a gulaa-nįnɛ̨, ɲɛnɛ̨ɛ̨ pɔlɔ aa tɛɛ, mąą aa hvalin a nįnɛ̨. 18Yili kəlee ə həɠə Yálá pɔ, yai gwa diɛni gu lɔwai pɔnnaa kulɔ, a Kristə, ə gu yee lɔ geei; ɛlɛɛ, ə ɲee lɔ geei kólói tii lɛɛ gu yəi. 19Mąąhɔlɔɓo, ə kɛ a pələ lɔpee gəlee, Yálá ɓə, yaa kpinįi da nu kanŋaa di lɔwai ponnaa kulɔ a Kristə; hvo nu kanŋaa di wɔ nɛ̨ŋɛ̨nŋaa kwələ kulɔ diɛ; ɛlɛɛ, ə bonnaa kulɔ woo tii lɔ gu la.

20Yili ɓa, Kristə laa hu ɓə, ku kaa la ɓɛ lɔi mɛ̨i, a ɲɛ̨i kɔw, ɛlɛɛ, ku pɔ pələ ɓə Yálá a ká təli la. Kristə laa hu, ku kaa nɛ̨ɛ̨mąą hvəə káá, kuɔ, 'ká ká kpɔwɔ lɛɛ laa, di ká lɔwai ponnaa kulɔ, ká Yálá ni ká yee ə lɔ gee hu. 21Nɛŋɛ̨n nɔpee hvo Kristə ɓa, kɛlaa, Yálá ə gu wɔɔ nɛ̨ŋɛ̨n diɲɛ̨ɠaa hee nwuɔ̨. Yiihu kɛa, Kristə pɔ pələ, Yálá aa gu kɛ la a tələnmo nuą.

Currently Selected:

Korɛntə veelɛ 5: BKPDCG

Highlight

Copy

Compare