Timote dɔlɔɔ 2
2
Liɛwooi vilɛn ŋąą Yálá hvɛli mɛ̨nį ɓa
1Yii tɔlɔɔ gáá ká tíi la, ya ɓaa; nuą diɛ mɛ̨nįɠaa huhvɛli, diɛ hvɛli wooɠaa ɓo, diɛ mąąnɛ̨ɛ̨ wooɠaa ɓo, diɛ mąmąɓoɠaa kɛ, nu kəlee mąą mɛ̨nį ɓa, 2diɛ gɛ lɔ tii, tɔɔɓɛlaa da nuąi ɲąąwooɓolaa kaa di yəi di mąą mɛ̨nį ɓa, əgɛ, gu ɲɛnɛ̨ɛ̨ kɛ a gɔlɔ haamą, liilaa hu, kulɔ nwoo ɓa laa hu, a ɉaŋąą. 3Yili ɓə nɛlɛɛ, viɛlaɓoɔ Yálá ɲɛ̨i ɓa, yai a gu ɓalomun; 4yai niiɓa ɓaa, nu kəlee di ɓalo, di tɛ̨ą kɔ́lɔn. 5Mąąhɔlɔɓo, Yálá kaa tanɔ̨n gbən, ɛlɛɛ, Yálá da nu kanŋaa di lɔwai pɛlimun, ə ɓo lɔ tanɔ̨n gbən, a nu tanɔ̨n, ya ɓaa: Jesus Kristə; 6yaa ɓə gbɔwɔ kulɔ a haláá nu kanŋaa mąą mɛ̨nį ɓa. Gɛla hvaai di mo a guuii di ɉee, yaa li; 7ɛlɛɛ, yili mąą mɛ̨nį ɓə, di gɛ́ la, ɲą́ą́, a kúláá da kɛla; gáá tɛ̨ą ɓoi, və́ lɛɛ kɛi, gáá a huwu takpɛliɠaa mąąkwɛlimun, laa na laa hu da tɛ̨ą.
Hinąą da nɛ̨ąą da kɛ ɲąąkpɔn ɉu
8Yii kani gáá bɔ, ya ɓaa, ɓɛi lɔpee, hinąą da kɛi Yálá hvɛli laa, di di yee mąąhəɠɛɛ tɛ, lííholi hva kɛ diɛ, yəliháá hvo kɛ di lɔwai da nu ta.
9Yii ɓaa nɛ̨ąą di wɛi, di di mąąyili a bɛliɛ ɉu, a nɛlɛɛ, a di mąą hon bələ: di hvo di nwun nɛɠa ɲɛki-yəki hee mą, di hvo hɛnį kwɛli too, awala kɛ tii, wali-kwɛli, da hɛn ɲɛki-yəkiɠaa; 10kɛlaa yaamun, di di mąąyili, a túwɔ́ pələ lɛlɛɠaa, yɛ nɛ̨ąąi da di wɔɔ lɛɛ nwoo mu laa lɛ Yálá ɓa. 11Kalan gɛi lɔwai, nɛ̨ɛ̨nu mąąnɛ̨ɛ̨ ə naapilɛ, ə lɛɛ nwoo mu laa kɛ. 12Və́ bɔ nɛ̨ɛ̨nu hvo mąąkwɛli kɛ, hvo hee hinąą nwun na. Gɛ́ ə naapilɛ. 13Adamə ɓə di gbɛa bɛli tɔwɔ, yili pulu, Ɛvə ə lɛɛ nąą pulu. 14Ə lɛɛ, Adamə hvəə di ɲɛ̨i kwɛli, kɛlaa nɛ̨ɛ̨nu ɓə di ɲɛ̨i kwɛli, ɛlɛɛ, ə too dɔ́n galaa hu. 15Ə mą kɛ ti, gaa pai ɓaloi ŋą lon ɉɔlɔɓoɔ pɔ, a kɛ lɔ a kąnąn laa na laa ɓa, wɛlikɛmąą laa hu, da mąąhəɠə laa lɛlɛɛ.
Currently Selected:
Timote dɔlɔɔ 2: BKPDCG
Highlight
Copy
Compare
Share
Want to have your highlights saved across all your devices? Sign up or sign in
