Tɛsalonikə dɔlɔɔ 2
2
Gɛla kólói Polə yəi
1Ną́n nonnii, káá kpinįi ká gbaɠala kɔlɔn, káá, ká hvo kɛ ká yee hee li ku mu ká pɔɔli kpɛli-kpɛli. 2Kɛlaa, ya ka, di ku mɔ̨nɔ̨ ɓo, diɛ ku lalan Filipə, yɛ bələi ká gbaɠala kɔlɔn na, ku kilitɔɔmąą laa hɔlɔɓo gu wɔ Yálá yəi, yaan, hvo kɛli kɛ, ku nwɛlɛɛ lɛlɛɛ laa həli, ká mąą mɛ̨nį ɓa, kɔ tamąą hu. 3Ku wɔ kalan nwoo kɔwɔ hvo pa hvilɛn ni lɛɛ mɛ̨nį mɛ̨i, hvo kulɔ li kili ɲɔ̨nwɔ̨ɔ̨ hu, hvo nwɔ̨nɔ̨ a gbąnąlaa woo. 4Kɛlaa, Yálá ə ku mąąkpɛɛ, yili ɓə gɛ, ə nwɛlɛɛ lɛlɛɛ kalihvaɓo kuɔ; yili mɛ̨nį ɓə ku kaa naa həlii la, ku hvo ku nɛ̨ɛ̨i kwɛlii nu kanŋaa hu, kɛlaa, Yálái ku kwəi kili mąąkpɛɛ, ya ɓə ku kaa niiɓa kwɛlii. 5Yili ɓə gɛ, ku hvo gɛ li a gbąnąlaa woo, káá kpinįi ká kili kaa tii ɉu, tɔlɔ kwɛli kili hvo kɛli kuɔ, Yálá kpinįi kaa a gɛla. 6Ɛlɛɛ, ku hvo ku mąątɛ̨nɛ̨i kwɛlii, ə kɛ ká yəi, ə kɛ a nu takpɛli yəi. 7Ya pa, kwa pɛli kɛ ku laa ká nwuɔ̨ a tįɛ̨, yɛ bələi Kristə ŋą kɛlaɠaa da gɛ la. Kɛlaa yaamun, ku ká hon a liinɛ̨ɛ̨ gwəi laa, yɛ bələi nɛ̨ɛ̨nu a nonnii pɛlɛ la gəŋəla, yɛ di kɔ̨nɔ̨n gɛ. 8Ká wɛli kɛ bələi tii kuɔ ɓə gɛ, ku hɛ̨ąyiliɛ kpɔ kɛ, ku Yálá nwɔ nwɛlɛɛ lɛlɛɛ laa həli káá, ə mą nwɔ̨nɔ̨ kɛ, ku wɔ yɛnɛ̨ɛ̨ ɓə, ku dɛɛ, gbala ə tɔɔ ká mąą mɛ̨nį nwąnąąi kuɔ kpɔ tii kɛnɛ̨. 9Ną́n nonnii, bələi ku kólo kɛ la, ku hvįi yɛ kpɛɛ, ka kili kaa yili hu; ku kɛli kóló kɛ a kpinį da hvóló, ə gɛ, ku hvo pa kɛ ká ta nwuɔ̨ a tįɛ̨, ɓɛlɔwai ku Yálá ŋą wɛlɛɛ lɛlɛɛ laa həli la káá. 10Ká káá a yili mąą kɛla, ə mą kɛ, Yálá yaa kpɛli yaa kpinįi, káái a laa na nuą, ku túwɔ́ ká ɲɛ̨i mu, mąąhəɠə laa hu, tələnmo laa hu, mąąkulɔi hvo kɛ mą. 11Ká gili kɔlɔn, ku ká tɛitɛi ká hon yɛ bələi, lon gaamun a nonnii hon na. 12Ku ká hvaŋąlɔ, ku ká liikpələ, ku ká liɛwoo ɓo, kuɔ: 'ká túwɔ́ pələ ə Yállá lii hon, yai ka təli, ŋą tɔɔlaai ɓa da ŋą mąąwiɛlaa.
Tesalonikə nuą di wɔ laa na laa mąątɛ̨nɛ̨ woo nįnɛ̨
13Yili ɓə gɛ, ku wɛi, ku pɔ pələ, kwa hva kpɛla Yálá mąmąɓo a yələ kəlee; ɓɛlɔwai ká Yálá laa woo hɔlɔɓo la, a yai kwa kɛ ká wəli tɔɔi mą, ká ká yee hee mu, ká hvo gɛli yɛ nu kan vaa woo, kɛlaa, yɛ bələi lɔ tii gaa la, a Yálá laa woo, yai gɛ-mɛ̨nį kɛi ká hu, káái a laa na nuą. 14Yili ɓa tii, ną́n nonnii, Yálá ŋą kpɔnŋaai di kaa Ɉude, Jesus Kristə hu, káá di pɔɔ kɔɔn; hva gaai, káá kpɛlimąn, káá mɔ̨nɔ̨ mįi ká kaayɔwɔɠaa yəi, yɛ bələi diɛi tii di mįi la Ɉuifəɠaa yəi; 15a diɛi tii gu Nąmu Jesus paa, da Yálá kwəi mɛ̨nį hukulɔ nuą; diɛ lɔ ɓə nwɔ̨nɔ̨ ku mɔ̨nɔ̨ɓo, di wɛli hvo Yálá ɓa, di kaa a nu kəlee ɲowo, 16diɛ ɓə da kpɛ̨ąn ku tɔwɔ, diɛ ku hvo ɓalo woo laa həli huwu takpɛliɠaa diɛ, ɛlɛɛ, yələ kəlee, diɛ di wɔ nɛŋɛ̨nŋaai laa kulɔ la tii. Kɛlaa, lííholi aa too di mɛ̨i a gbəlamąą.
Polə ə kɛ bɔ ə pənə ə li Tɛsalonikə
17Yii ɓaa ku wɛi, nąn nonnii, gu mąą kwɛai lɔ gu kee ɓa lɔ tíikpə, gu ɲɛ̨i hvo hee li gu kee ɓa, kɛlaa gu nąą kili kaa gu kee ɲą. Kwaa tɔɔ kpɔ a ku nwąnąi, kuɔ ku pa, ku ku ɲɛ̨i tɔɔ káá, mąąhɔlɔɓo, yili nąą wɛli kaa kuɔ kpɔ kɛnɛ̨. 18Yili kpɔ ɓə gɛ, kuɔ kɛ ku paa la ká pɔɔli. Gəlee ə mą gɛ, ɲą́ą́ Polə, ŋą́ą́ ɉu kɔɔn gbɔ geemɛ̨i tamąą, ɛlɛɛ, ɓilihi yɛ kpɛ̨ąn ku tɔwɔ. 19Yili ɓa, ku wɔɔ kilitɔɔmąą laa ɓaa a lə? Lə ɓə a ku wɔɔ kwəinɛ̨ɛ̨? Ku kpɔwɔ ɲąą kɛnɛ̨ mɛ̨nįi a ku nwuɔ̨ ɓɔlɔ, gu Nąmu Jesus ɲɛ̨i ɓa, a ba yələ, ya ɓaa a lə? Kɛlɛi káá ɓə! 20A tɛ̨ą, káá ɓə a ku wɔɔ ɲɛ̨i pono da ku wɔɔ kwəinɛ̨ɛ̨.
Currently Selected:
Tɛsalonikə dɔlɔɔ 2: BKPDCG
Highlight
Copy
Compare
Share
Want to have your highlights saved across all your devices? Sign up or sign in
