Piɛrə dɔlɔɔ 2
2
1'Ká ká yee kulɔ kani nwąnąlɔɔ mɛ̨nį kəlee hu, gbąną mɛ̨nį kəlee, lɛɛ mɛ̨nį kəlee, hɛn nwɛli laa da laa pələ ɓo. 2'Ká ɲįnįyá mąąhəɠɛɛ mąą wɔlɔ ɓo, yɛ lon gaa nįnɛ̨ɠaa, yai a Yálá laa woo, əgɛ, yaa ɉáálai, káá kɛnɛ̨ la ɓalo mɛ̨nį hu, 3yii kani, káá gu Nąmu mąą mɛ̨nį kɔɔn, káá nɛlɛi kaa.
Gbɔn gɔwɔ hvilɛn ɉii, da nwɔ mąątíi
4'Ká ká mąąlɛɠɛ mą, yai a gwɛnį hvulúmąą, ya ɓə nu kanŋaa di bili, kɛlaa, ya ɓə Yálá ə ɉəɠə ɉu, ɛlɛɛ, mąą mɛ̨nį nwąnąą ɲɛ̨i ɓa. 5Káá kpɛlimąn, yɛ kwɛnį hvulúmąąɠaa, 'ká lɔ kani bɛlɛ́ tɔɔ mɛ̨nį hu, yai a Kili hee pɛlɛ́, əgɛ, ká kɛ a haláá laa həli kpɔn mąąhəɠɛɛ, káá Yálá mąąwiɛ haláá laa həli, a háálai Yálá a ɲee hee mu, Jesus Kristə háálai.
6Mąąhɔlɔɓo, bɛ̨ɛ̨i ɉɛɓɛ́ hu, diɛ kɛ:
«Gáá pai pɛlɛ́ kɔ́wɔ hvilɛn gwɛni laai Siɔn,
a kwɛnii daa ɉəɠə ɉu, mąą mɛ̨nį nwąnąą,
ɛlɛɛ, nui a gilitɔɔmą, gwəi hva pili mą.»
7Káái ɓaa laa na nuą, ɓɛlɛlaa li káá, kɛlaa, kili walawala nuą di wɛi, gwɛnii bɛlɛ́ tɔɔ nuą di lənə ma, aa kɛ a bɛlɛ́ kɔ́wɔ hvilɛn gwɛni leelee, 8gaa nwɔ̨nɔ̨ a nu kɔwɔ tuwɔ kwɛnį, a kwɛni kpuwui a nu too. Da di kɔ́wɔ tuwɔi mą, mąąhɔlɔɓo, di hvo gɛ li di hvo laa Yálá laa woo la, ɛlɛɛ, yili ɓə kɛ naa di tɔwɔ.
9Kɛlaa, ká wɛi, ká káá a nu huwui ɉəɠɛɛ ɉu, a dɔɔ kwəlii haláá laa həli nuą, a nu huwu mąąhəɠɛɛ, a nuąi a Yálá kwɛlin, əgɛ, nui ŋɛ̨i ká təli, ə ká kulɔ kpinį hu, yɛ pa a káá, ŋą kɛɛ pono lɛlɛɛi ɓa, káá pɛli gɛ-mɛ̨nį kpɛa-kpɛaa nolo ɓoi, 10a káái tɔlɔɔ ká hvo kɛ kɛli kɛ a nwɔ nu huwu, kɛlaa yiihu kɛa, káá kɛ a Yálá nwɔ nu huwu; káái ká wɔɔ nąą hvo tɔlɔɔ kɛ ɲɛ̨imąąwɛli kaa hu, kɛlaa yiihu kɛa, aa ká ɲɛ̨imąąwɛli kaa.
Kristalon gɛ pələ hali pulu nuą lɔwai
11Nwɛ́likɛmąą nuą, gáá ká hvaŋąlɔ, káái yɛ tɛɛ nuą da nwɛ̨ąą, 'ka hvo ká ɲɛ̨i kulɔ yɛnɛ̨ɛ̨ hɛn da pɔ, yai a kɔ́ pɛlɛ nu nįį ɓa. 12Ká túwɔ́ pələ ə kɛ a nɛlɛɛ, hali pulu nuą lɔwai, ə mą kpɛli kɛ di kaa ká laamąą hiɛi yɛ tuwɔ pələ ɲɔ̨n gulɔ nuą, ká wɔ tuwɔ pələ lɛlɛɠaa ə di kilaa pono, ɛlɛɛ, diɛ Yálá mąąwiɛ a yələi gaa pai di nąą kaai la.
Kristalɛa di wɔɔ mąątíi
13'Ká lɛɛ nwun nąmįną kəlee woo mu, gu Nąmu mąą mɛ̨nį ɓa, yɛ ə kɛ a tɔɔmun yai heeɓo laa kaa ɲəi, 14yɛ ə kɛ a gbahalanąmą, yai ə ɉee ká nwun na, mɛ̨nį ɲɔ̨n ɉutɔɔ mɛ̨nį ɓa, yɛ mɛ̨nį lɛlɛɛ kɛ nuą mąątɛ̨nɛ̨. 15Mąąhɔlɔɓo, Yálá liiɓa ɓaa, ká kɛli mɛ̨nį lɛlɛɛ kɛ, ɓowo nuąi di tɛɠii, káá di kilaa pono. 16'Ká tuwɔ́ yɛ nuąi di kaa di gbɔwɔ ɓa, 'ká hvo nɛɛ gbɔwɔ ɓa laai tii kaa a mɛ̨nįi ká laa ɉu, káá nwąnąlɔɔ túwɔ́ ɓo la, kɛlaa, 'ká túwɔ́ yɛ Yálá ŋą tínuą. 17'Ká nu kəlee ɓɛlɛ kɛ mą, 'ká ká nąn nonnii wɛlilakɛ. 'Ká ɲɔw Yálá ɓa, 'ká tɔɔmun mɛlɛ kɛ mą.
Luwɔɠaa di wɔɔ mąątíi da di nąmįną di lɔwai
18Luwɔɠaa, 'ká lɛɛ ká luwɔ nąmįną woo mu, 'ká ɲɔw diɛ, di mą kɛ, yiiɠaa di wɔɔ mɛ̨nį lɛlɛɛ, yiiɠaai di yíila nɛ̨ɛ̨, ə mą nwɔ̨nɔ̨ kɛ, yiiɠaai di yíila walaa. 19Mąąhɔlɔɓo, mɛ̨nį lɛlɛɛ ɓaa, nu ə niikpələ hvulu mɔ̨nɔ̨ mu Yálá mąą mɛ̨nį ɓa. 20Mąąwiɛ laa ləi kpɔ ɓə nu ya ɉɔlɔɓo, akɛ daa kɛli gɛlɛ ɉɔn ɉu? Kɛlaa nu a mɛ̨nį lɛlɛɛ kɛ, diɛ mɔ̨nɔ̨ɓo yɛ niikpələ yili mąą mɛ̨nį ɓa, mɛ̨nį lɛlɛɛ li Yálá ɲɛ̨i ɓa. 21Yaan, yili ɓə di ká təli mą, mąąhɔlɔɓo, Kristə yaa kpɛlimąn, ə mɔ̨nɔ̨ mįi ká mąą mɛ̨nį ɓa, ə kɛ, a ká wɔ yɛnɛ̨ɛ̨ kɛ pələ gɔɔnmąą, káá hvilɛn na bɔɔ ɲą: 22Yaa tii hvo nɛ̨ŋɛ̨n ɉəɠə li, nu ɓowo woo hvo kulɔ li na, 23yai di nalan, hvo gwələ kulɔ li a lalan, mɔ̨nɔ̨i di naa mą, hvo woo ɲɔ̨n mo, kɛlaa, ə gbɔwɔ lɛɛ giti haŋąą tee mun ɲəi; 24yaa tii ɓə gu wɔɔ nɛ̨ŋɛ̨nŋaa həɠə gbɔwɔ kɔlɔ hu, ə haa la wulu ɓa, əgɛ, gu haai gu mo wɔɔ nɛ̨ŋɛ̨nŋaa diɛ, gu yɛnɛ̨ɛ̨ kɛ tələnmolaa yee kɔnma; yaa tii, mąą nwąnąi di mo, yili ɓə a gu ɓalo. 25Mąąhɔlɔɓo, ká kəlee ká lanŋąąi kɛ yɛ ɓɛlaaɠaa, kɛlaa yiihu kɛa, káá ká ɲɛ̨i tínɛ̨n ká mɛ̨ikaamun bɔ pələ, yai a ɲɛ̨i kɛ ká nįiɠaa diɛ.
Currently Selected:
Piɛrə dɔlɔɔ 2: BKPDCG
Highlight
Copy
Compare
Share
Want to have your highlights saved across all your devices? Sign up or sign in
