aan dɔlɔɔ 4
4
Mɛ̨nį kəlee mąąkpɛɛ mɛ̨nį a laa na laa Jesus Kristə hu
1Nwɛ́likɛmąą nuą,
'ká hvo laa mąąkwɛli kɛ nuą kəlee woo la,
kɛlaa, 'ká di mąąkpɛɛ,
ə gɛ, ká gaa, akɛ ə həɠə Yálá pɔ;
mąąhɔlɔɓo, lɛɛ nuą tamąą daa di kpɔwɔ kɛ a Yálá kwəi mɛ̨nį hukulɔ nuą
daa taɠa-taɠa yɛnɛ̨ɛ̨ nąą kəlee.
2Bələi ká pɛli Yálá nwɔ Kilii kɔlɔn ɉii la, bələ ka:
nui lɔpee a kɛ diɛ, Jesus Kristə ə gbɔwɔ kɛ a nu,
gaa a Yálá nwɛi ta,
3ɛlɛɛ, nuą mąąkwɛli kilii a Jesus ɓɛlaɓo Yálá nwɛi hvə li,
Kristə ɲowo li, yai ká bələ mɛ̨n, diɛ kɛ, gaa pai,
ɛlɛɛ, gaamun hɔlɔɔ kɛa yɛnɛ̨ɛ̨.
4Ká wɛi, nónnii pɛlɛɛɠaa, ká káá a Yálá nwɛiɠaa,
káá yeetɛɛmąą laa kɛ nɛɛ-nuą tii mɛ̨i,
mąąhɔlɔɓo, nui gaa ká lɔwai,
gɛnɛ̨i dɛɛ yii gaa yɛnɛ̨ɛ̨ hu mą.
5Di wɛi, di kaa a yɛnɛ̨ɛ̨ nwɔɔ,
bələ lɔ ɓə da yɛnɛ̨ɛ̨ woo ɓo la,
ɛlɛɛ, yɛnɛ̨ɛ̨ yɛ nwəli tɔɔ di woo ɓa.
6Gu wɛi, gu kaa a Yálá nwɔɔ.
Nui Yálá kɔlɔn gili kaa mą, a nwəli tɔɔ guɔ.
Nui hvo a Yálá nwɔɔ, hva nwəli tɔɔ guɔ.
Yili pɔ pələ ɓə gwa pɛli tɛ̨ą Kili da lɛɛ kili di kulɔ ɉu kɛi la.
Wɛlikɛmąą laa a həɠə Yálá pɔ, yɛ ɉamu pili laa na laa hu
7Nwɛ́likɛmąą nuą,
'ká gu gu keeni wɛlilakɛ,
mąąhɔlɔɓo, wɛlikɛmąąlaa a həɠə Yálá pɔ,
nui wɛlikɛmąąlaa kaa ɉu,
Yálá lon ni, ɛlɛɛ, a pɛli həlii Yálá kɔlɔnŋąą ɓa.
8Nui wɛlikɛmąąlaa hvo ɉu, hvo ni Yálá kɔlɔn,
mąąhɔlɔɓo, Yálá kaa a wɛlikɛmąą.
9Bələi Yálá ə ŋą wɛlikɛmąąlaa too la pono ɲą gu lɔwai bələ ka:
Yálá ə non gɔw tanɔ̨n gbən dɛɛ yɛnɛ̨ɛ̨,
əgɛ, gu yɛnɛ̨ɛ̨ hɔlɔɓo, ɉáálai.
10Nwɛlikɛmąą laa tii ka:
Guɔ hvəə Yálá wɛlila kɛ,
Yaa tii ɓə gu wɛlila kɛ,
ɛlɛɛ, ə Non dɛɛ a gu wɔ nɛ̨ŋɛ̨nŋaa waa halaa hɛn.
11Nwɛ́likɛmąą nuą,
akɛ Yálá aa gu wɛlila kɛ pələ kɛ ti,
guɔ kpɛlimąn, mąąnɛ̨ɛ̨ gu gu keeni wɛlila kɛ.
12Nui lɔpee ta hvo ta Yálá kaa li.
Akɛ gwa gu keeni wɛlila kɛi,
akɛ tii Yálá kaa gu hu,
ɛlɛɛ, nwɔ wɛlikɛmąąlaai gu hu, naa kulaai.
13Yili pɔ pələ ɓə, gwa gbaɠala kɔlɔn na guɔ,
gu kaa yaa tii ɉu, ɛlɛɛ, yɛ ɓo gu hu:
aa nwɔ Kilii tɛɛ gu pɔ.
14Ku wɛi, kwa mąą kɛla hvaa ɓo, kuɔ, ku gaa,
ɛlɛɛ, kuɔ, Nąn ə Non dɔɔ, ə kɛ a yɛnɛ̨ɛ̨ ɓalomun.
15Nui lɔpee a mo yɛ kɛ: Jesus kaa a Yálá Lon,
Yálá kaa mąą nu hu, ɛlɛɛ, yɛ ɓo Yálá hu.
16Ɛlɛɛ, ku wɛi, ku gaa, ku laai na,
nwɛlikɛmąąlaai Yálá ə nɛ gu lɔwai yaa li.
Yálá kaa a wɛlikɛmąą,
nui gaa wɛlikɛmąą laa hu,
gaa Yálá hu, ɛlɛɛ, Yálá yɛ ɓo ɉu.
17Yili hu ɓə, nwɛlikɛmąąlaai gu lɔwai, naa aa kulɔ la,
guɔ, kilitɔɔmąą laa walawala kaa gu yəi, giti tee hvoló mąą mɛ̨nį ɓa,
Mąąhɔlɔɓo, bələi lɔ Yaa tii gaa la,
bələ lɔ ɓə guɔ kpɛlimąn gu kaa la ɲɛnɛ̨ɛ̨ ŋɛ̨i hu.
18Ɲɔw hvo wɛlikɛmąą laa hu.
Kɛlaa wɛlikɛmąą laa kpɔ-kpɔɔ a ɲɔw pili bulu,
mąąhɔlɔɓo hutɔɔ mɛ̨nį ɓə ɲɔw a kulɔ ɉu,
ɛlɛɛ, nui a ɲɔw, mąą mɛ̨nį laa hvo kulɔ li wɛlikɛmąą laa hu.
19Gu wɛi, gwa nwɛlila kɛ
gbala ə tɔɔ, Yaa ɓə gbɛa gu wɛlila kɛ tɔlɔɔ.
20Nu a kɛ diɛ: «Yálá wɛli kaa mą́ą́», ɛlɛɛ, nąn non nwɛli hvo mą,
lɛɛmun ni.
Yaan, ə́ nąn non ŋɛ̨i ə́ ɲɛ̨i kaa mą, yá wala nwɛli la kɛi,
hva pɛli, Yálái ə́ ɲɛ̨i hvo gaai, nwɛlila kɛi!
21Ɛlɛɛ, díɓoi ku ɉɔlɔɓo ɲəi, ya ka:
Nui Yálá wɛli kaa mą,
'ə nąn non nwɛlila kɛ.
Currently Selected:
aan dɔlɔɔ 4: BKPDCG
Highlight
Copy
Compare
Share
Want to have your highlights saved across all your devices? Sign up or sign in
