Korɛntə dɔlɔɔ 8

Hali kɔ huwɔ

1Yii hvilɛn na huwɔɠaai daa gulɔ a haláá hali ɓa, yɛ bələi gu gɔlɔn na mɛ̨nį tamąą kɔ́lɔn yɛ hvilɛn mą. Mɛ̨nį kɔlɔnŋąą a nu huɲąŋą kɛnɛ̨, kɛlaa, wɛlikɛmąąlaa a nu tɛ tɔwɔ. 2Kɛlaa nu a gbɔwɔ kaa yɛ mɛ̨nį kɔ́lɔn mun, a kɛ tii, hvo gɔlɔn yɛ bələi kɛ mąąnɛ̨ɛ̨ ə gɔlɔn na. 3Kɛlaa, nui Yálá wɛli kaa mą, mąą nu kɔ́lɔnŋąąi Yálá yəi.

4Akɛtii, huwɔi daa gulɔ a haláá hali ɓa, gwa pɛli da mįi? Gu gɔlɔn guɔ, hali lɔpee ta hvo yɛnɛ̨ɛ̨, ɛlɛɛ, yálá takpɛli hvo laa, ə kulɔ Yálá yaa tanɔ̨n gbən bulu. 5Mąąhɔlɔɓo, bələi mąn nuą da yálá tamąą mąą mɛ̨nį ɓo la, daɠaa diɛ ɓo yələi, da lɔi mɛ̨i, bələi mąn ɲáláɠaai tii tamąąi la, nąmuɠaa tamąą la; 6gu wɛi Yálá tanɔ̨n gbən mə gu yəi, a gu Nąn, yai hɛn gəlee a həɠə bɔ, bɔ pələ lɔ ɓə nwɔ̨nɔ̨ gu kaa lii la, ɛlɛɛ, gu Nąmu ə ɓo tanɔ̨n, yai a Jesus Kristə; yai hɛn gəlee kaa yɛnɛ̨ɛ̨ ɉaalai, guɔ ɓo ɲee kɔnma.

7Kɛlaa, nu kəlee hvə dɛ̨ą tii kɔ́lɔn. Nu taɠaa daa kulɔ hali yíi hu a nįnɛ̨, bɔɔ ə ɓo ni diɛ, da kɛi ɉuwɔɠaa tii mįi, da kɛ gaai yɛ hali kɔ́ hɛn gbɔ-kpɔ, di wɔɔ kiliŋąhiɛ hvįikpɛɛ pələ, diɛ kɛ gɔ̨nɔ̨n tii a kɛ di mąąliɓii. 8Yaan kɔ̨nɔ̨n və a gu mąą lɛɠɛ Yálá ɓa, gu mįi-o, gu hvo mįi-o, hva gu lɛɛ pulu, hva gu tɛ tɔwɔ.

9Kɛlaa, ka gɛ a nɛlɛɛ, nɛɛ gbɔwɔ ɓa laai tii ka yəi, yili hvo kɛ a ká ɓɛlaai di hvii kpɛɛ, di lan ɉɛn. 10Kɛlaa, yɛ́i mɛ̨nįi ti dɛ̨ą kɔlɔn, da ə́ kaa heeni hali kɔi, yɛ́ nąą hɛn mįi, yili hva kɛ a nuąi di hvįikpɛɛ di lan ɉɛn? 11A kɛ tii, ə́ wɔɔ mɛ̨nį kɔlɔn bələi tii kaa pai gɛi, nui ŋɛ̨i Kristə ə haa mąą mɛ̨nį ɓa, nwun na ə pili. 12Ka kɛi nɛ̨ŋɛ̨n ɉəɠə tii ka nąn nonnii diɛ, diɛi di wɔ kilitɔɔmąą laa hvo kɛnɛ̨ li, káá di hvįikpɛɛ tii, a kɛ tii, Kristə kpįnįi ka tii ka káá nɛ̨ŋɛ̨n ɉəɠəi mą. 13Yili ɓə gɛ, a kɛ ŋą́ kɔ̨nɔ̨n da mįi a kɛ a mɛ́lan lan ɉɛn,, vá kpɔ kɛa huwɔ mįi, ə gɛ, və́ pa mɛ́lan nan.

Currently Selected:

Korɛntə dɔlɔɔ 8: BKPDCG

Highlight

Copy

Compare