Numbers 17
17
Aaron-aam Ayarua
1 Atanrem qanrutaa Moses-aaq, 2“Qanruski Israel-aam yui taitesqelluki naumavillgutkelriit ciuliqagtaita ayaruitnek, igauqurluki atrit ayaruqestaita. 3Aaron-aam-llu atra igaulluku ayarumun Levi-am kinguvrinun tusngalriamun. Ataucimek ayarungqerrarkauluteng tamarmeng naumavillgutkelriit ciuliqagtait. 4Agutniaten Pelatekamun Atanrem alailarvigkaanun elliluki-llu Akqutem Yaassiigan ciuqerranun alairvik'lallma nuniinun. 5Tuani cucukellma ayarua naugiciquq. Waten piunga arulaircetnaluku qanemyuugautekiyulallrat Israel-aam yuin elpenek.”
6Moses-aam qanrucateng Israel-aam yui, ciuliqagtaita cikiraat ayarunek ataucitaarluteng allakarmeng naumavilget, qula malrugnek cipluku (12) amllertaluteng, Aaron-aam-llu ayarua ilaulluku taukunun. 7Moses-aam-llu ayarut itrulluki Pelatekamun ellii ciuqerranun Atanrem Akqutiin Yaassiigan.
8Unuaquani Moses-aaq Pelatekamun itlermini tangrraa Aaron-aam ayarua Levi-am kinguvrinun tusngalria naugillinilria. Naugaarangrraarluni naucetaangerraarluni-llu taqmigingalrianek almond-aanek naugillinilria. 9Moses-aam-llu ayarut taukut anutai nasvagluki-llu Israel-aam yuinun. Ellaita-llu tangrrait ayarut ayuquciat, nutaan-llu pikestaita ayarut teguluki. 10Atanrem Moses-aaq qanrutaa, “Aaron-aam ayarua ataam itrusgu elliluku-llu ciuqerranun Akqutem Yaassiigan. Avaliquralarniarci aarcirtuutnguvkarluku ingluliculrianun qanemyuuganermek taqsunrilkata tuquarkauniluki.” 11Moses-aaq tuaten piuq Atanrem alerquuciatun.
12Israel-aam yui qanertut Moses-aamun, “Nangluta tuquarkaulliniukut! 13Kina imna Pelatekam mallegtii tuquarkaureskan, tamamta tuqumalriatun ayuqliriukut.”
Currently Selected:
Numbers 17: YPK
Highlight
Copy
Compare
Share
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
