Mark 13

Iquklitlerkam Nallunailkutai

1Agayuvigmek-llu anngan, elitnaurain iliita qanrutaa, “Elitnauristaa, tangerrluku teggalqut 'laavkaat-llu taq'luaqaumaciat!” 2Jesus-aam-llu qanrutaa, “Tua-i-qaa tangrraten makut 'laavkaat angelriit? Teggalqumek qalliqelriartangqerrngairuciiquq wani, itumcimaarkaunrilngurmek.”

3Olive-aam-llu ingriani aqumgallrani agayuviim akiani, Peter-aam, James-aam, John-aam, Andrew-m-llu, allamek nayurtaunaku, aptaat, 4“Qanruskut, qaku makut tuaten ellirarkaugat? Cali-llu ca nallunailkutnguarkauga makut tamarmeng piqataqata?” 5Jesus-aam-llu qanrutai, “Tarikici, kia imum alarcecuaraaci. 6Amllelriit tekitarkaungata atqa aturluku, qanerluteng, ‘Christ-augua!’ amllelrianek-llu alarceciarkaugut. 7Anguyautellrianek-llu niiskuvci, anguyautellrianek-llu qanelrianek, tua-i alingallanrilkici, tamakut tuaten ellirarkaungata, tau͡gaam iquklitlerkaq tua-ingunrituq. 8Wani-wa nunam ataucim yui inglukuciiqut nunam allam yuinun, angayuqauvik-llu angayuqauvillgutminun; nuna-llu pektelarciquq tamaitni. Kaigyaraq-llu tekitelarciquq. Tamakut nanikuanarqelriim ayakarraarutkai.

9“Tau͡gaam elpeci tarikici; qaillukuarvignun pivkararkaungaceci, agayuvigni-llu piqertuarumaarkauguci, atanerruat-llu angayuqat-llu ciuqerritni nangengqalarciquci wii piteklua, taukut nallunriutekaatnek. 10Qaneryaraq-llu assilria ciumek qalarutkumaarkauguq yugnun tamaitnun. 11Tua-i-llu ayaulluci tunkaceci, ciungakun umyuarrlugcaryaqunaci qaillun qallatarkaucirpecen̄ek; tau͡gaam taum nalliini qaillun cikiumakuvci tuaten qallaskici. Elpeci qallatellriarunrilavci, imna tau͡gaam Anerneq Tanqilria qallatellriaruan. 12Anelgutiin anelgutni tuquceciiqaa, irniani-llu atiin, angayuqateng-llu irniarita nakukeciqait tuqutesqelluki-llu. 13Tamarmeng-llu uumikciqaiceci atqa pitekluku; tau͡gaam iquklitlerkamun pektayiilnguq anirtuumaciquq.

14“Tau͡gaam irranarqelria piunrirista enekaqenrilkem̄ini nangengqaluku tangerquvciu, (mat'umek naaqilria taringli) tua-i Judea-melnguut ingrinun qimaglit. 15Enem-llu qainganelnguq enemun atranrilkili, iterpek'nani-llu camek eneminek aqvatnaluni, 16naucetaarvigmi-llu uitalria utertenrilkili aturassaagluni. 17Tau͡gaam nakleng qingalriit aamarcilriit-llu ernerni taukuni! 18Piicagci qimallerkarci uksumi pisqevkenaku. 19Taukuni ernerni nangteqelriartangqerrarkaungan Agayutem piurtellrin piurcimaqerraallratnek man'a-llu tekilluku ayuqailngurmek, kinguakun-llu ayuqengarkaunrilngurmek. 20Taukut-llu erenret Atanrem nanilivkanrilkaki yugmek atauciungraan anirtuumalriartaicartuq; tau͡gaam cucukumalriit cucukellni pitekluki, taukut erenret nanilivkarai. 21Tua-i-llu waten qanruskaceci, ‘Atam, Christ-aq maantuq!’ wall'u waten, ‘Atam wantuq!’ tua-i ukveqenriciki. 22Wani-wa Christ-at piciunrilnguut prophet-aat-llu piciunrilnguut alairciqut, nallunailkuciluteng-llu irr'inarqelrialiciqut, cucukumalriit-llu, piyunarqekan, alarcetarkauluki. 23Tau͡gaam elpeci tarikici; wani-wa tamalkuitnek ciungakun qanrutellruamci.

24“Tau͡gaam ernerni taukuni, nangteqnarqelriim tamatum kinguani, akerta tan'gericiquq, iraluq-llu tanqigngaunani, 25agyat-llu qilagmek igciiqut, qiliim-llu pinii arulaciqut. 26Tua-i-llu nutaan Yuum Qetunraa tangerciqaat amirlutgun agiirrluni pinirtuumarmi ucurnartuumarmi-llu. 27Tua-i-llu an'gilani ayagceciiqai, cucukellni-llu quyurciiqai anuqnek taukunek cetamanek, nunam iquanek qiliim-llu engelii tekilluku.

28“Napa atsangqetuli ayuqestassiigun elisvikiciu; avayai uqungluteng cuyangaararqata, nallunrit'lararci kiagem ukaqsigicia. 29Tuaten-llu cali, elpeci tamakut tamarmeng piqatauciat tangerquvciu, tua-i nallunritarkauguci elliin canimelliucianek, amigmun-llu mallgucianek. 30Ilumun, qanrutamci, ukut tungelquqelriit nangengaitut tamakut tamalkuita qaqimavkenaki. 31Qilak nuna-llu nangciquk, tau͡gaam qaneryaranka nangengaitut. 32Tau͡gaam ernermek taumek wall'u sass'amek taumek nallunrilngurtaituq, an'gilat-llu qilagmelnguut nalluat, Qetunram-llu nallua; Aatam kiimi nallunritaa.

33“Elpeci tarikici, tupaumaluci-llu piicagci, nalluavciu qaku tuaten ellillerkaa. 34Tuarpiaq yuum nunamun allamun ayalriim, eneni unilluku, pisten̄i-llu atanruvkarluki, yuk tamalkuan caliarkangqertelluku, amiigem-llu tarikestii ellimerturluku tupaumasqelluku. 35Taumek tupaumaci, enem atanran tekitellerkaa nalluavciu, atakumi, wall'u unuum qukallrani, wall'u yaqulgem qalriallrani, wall'u unuakumi. 36Alqunaq tekilluni qavarluci nataqsuaraaci. 37Elpecen̄un-llu qanelqa tamalkuitnun qanrutkaqa: Tupaumaci.”

Currently Selected:

Mark 13: YPK

Highlight

Copy