Matthew 5
5
Ingrimi Qalarucillra
1Yugugaat tangrramiki ingrimun mayurtuq, aqumngan-llu elitnaurain ullagaat. 2Elicungcarai-llu qanerluni:
Atawaqautet
3“Atawaqertut ellmeggnek picalqukenrilnguut, pikngamegteggu qiliim angayuqauvia.
4“Atawaqertut angniilnguut, qarutaarumaarkaungameng.
5“Atawaqertut ellmikutuulriit, piutengqerrarkaungameng nunami.
6“Atawaqertut kailriit meqsulriit-llu elluamek, camirtarkaungameng.
7“Atawaqertut takumcukitulit, takumcukumaarkaungameng.
8“Atawaqertut ircaqumegteggun menuilnguut, tangrrarkaungamegteggu Agayun.
9“Atawaqertut uitanqegcivkarilriit, Agayutem yuinek aprumaarkaungameng.
10“Atawaqertut nangcimalriit elluangnaqucirteng pitekluku, qiliim angayuqauvia pikngamegteggu.
11“Atawaqertuci qumlikekaceci nanglluci-llu assiitellrianek-llu ayuqenrilngurnek piciliraqluci wii piteklua. 12Nunaniryugci angnirpagluci-llu, akiliutekarci angengan qilagmi. Tuaten nangtellruitki ciuvcen̄i qaneryariulriit.
Nunamun Taryuuciat
13“Nunamun taryuuguci. Tau͡gaam taryuq taryurninairuskan, ca taryirciqau? Catngunriciiquq tau͡gaam egcimaciquq yugnun tutmartelluku.
Tanqiuciat
14“Elpeci tanqiuguci ellamun, ingrim qainganelnguut nunat iirumangaitut. 15Tuaten-llu kenurraq kumalria puckam acianun ellimangaituq, tau͡gaam kenurrarvigmun, nutaan tanqigiarkauluki enemelnguut tamalkuita. 16Tuaten tanqigci yugnun tamaitnun, tangerrnaurait caliaci assilriit, nanrarnauraat-llu Atasi qilagmelnguq.
Alerquutet Prophet-aat-llu Igait
17“Umyuarteqenrici tekicuklua caunrirnaluki alerquutet, prophet-aat-llu igait. Tekitenritua caunrircarturluki, tau͡gaam qaqicarturluki. 18Ilumun qanrutamci, alerquutet iliit carraungermi qaqimarivailgan, piunrirngaituq qiliim nunam-llu iquklitlerkaagnun. 19Kina imna alerquutmek carraungraan narurcilria, ilaminek-llu iqlutmun eguaquriluni, Agayutem takuani catngunrituq. Tau͡gaam kia imum atuquniki ayuqucirtuutekluki-llu ang'arkauguq Agayutem angayuqauviani. 20Qanrutnaamci, Agayumacirci elluanrunrilkan igatulit Pharisee-aat-llu agayumaciatni, tua-i qiliim angayuqauvia iterngaitarci.
Qenqercaraq
21“Niitelararci ak'a tamaani inerquun: ‘Tuquciyaqunak, kina-llu imna tuqucilria, qanercetaarumaciquq.’ 22Wiinga tau͡gaam qanrutamci, kina imna ilaminun paggluirucunrilnguq qanercetaarumaarkauguq; kina-llu ilaminek caunrilkilria angtuamek qanercetaarumaarkauguq; kina-llu imna ilaminek aniqlaayulria kenermun nipsuilngurmun piarkauguq. 23Agayutmun cikiqengqatallerpeni ekuagarkanek neq'ak'ngangqerquvet assiilngillerpenek ilavnun, 24cikiutekan tuavet ekuavigmun unilluku, ilan ullagluku kenegyaguqaarlutek, nutaan cikiutekan cikiuteksarturru. 25Inglun-llu kenegyagutengnaqiu qanercetaarvigmun ullautellerpetegni, cuqcistem̄un tunyuaraaten ingluvet, cuqcistem-llu tunluten anguyagtem̄un, taum-llu itercivigmun iterrluten. 26Ilumun qanrutamken, tuaken anngaituten anucimirqecetaarutvet akilitlerkaan engeliinun.
Aglumayaraq
27“Niitelararci ak'a tamaani inerquun: ‘Akusrarutekiyaqunak.’ 28Wiinga tau͡gaam qanrutamci, kia imum umyuamikun arnamek aglumakikuni, ak'a akusrarutekumaria ircaqumikun. 29Iivet tallirpian picurlagceskaten, ikugluku egesgu, atawaunruciquten iingqeng'e'rpet inglupiamek tamalkirrluni temen nangteqnamun egcimanrilkuni. 30Unatvet-llu tallirpian picurlagceskatgen, kepiki eggluki-llu, atawaunruciquten inglupiamek unatengqeng'e'rpet, tamalkirrluni temen nangteqnamun egcimanrilkuni.
Avvucaraq
31“Cali igausngauq: ‘Angutem nuliani unicukuniu kalikamek avvucaramek cikiisqelluku.’ 32Wiinga tau͡gaam qanertua: Kia imum nuliani avvuskuniu caruyallrunrilnguq akusrarutekevkaraa, kia-llu imum avvucimalria nuliqsaguskuniu cali akusrarutekaa.
Ukvernarcariyaraq
33“Cali ciuqvani qanrutkumalleq niitarci man'a, ‘Iqluluci ukvernarcarviksaqunaciu Agayun, tau͡gaam Agayun qigcikluku ukvernarcarillren aturarkaugan.’ 34Tau͡gaam qanrutamci, ukvernarcariyaqunaci watqapik, wall'u qilagmun, wani-wa Agayutem angayuqauvikngaku. 35Wall'u nunamun, wani-wa it'gain tusngavikngatgu, wall'u Jerusalem-aamun, wani-wa Atanerpiim nunakngaku. 36Tuaten-llu cali qamiquvgun ukvernarcarviksaqunaku, wani-wa elpenek nuyan atauciungraan qat'risciigatan tungurisciiganaku-llu. 37Tau͡gaam qanraqavci ‘angllerci’ wall'u ‘qangaallerci’ camek ilavkenaku, allamek qanquvci assiilnguuguq.
Akinauryaraq
38“Cali-llu niitelararci man'a, ‘Yuk iingirkengkan, iingircesqelluku, wall'u keggutairkengkan keggutairesqelluku.’ 39Tau͡gaam qanrutamci: akinauryaqunaci, tau͡gaam yuum qacareskaten tallirpiakun ulluvavet, inglua cali manikiu. 40Cali-llu yuum piksugiikaten paltuugpenek qaillukuarten̄un-llu ayaulluten, tua-i qallirraan-llu cali pikevkarru. 41Cali-llu yuum maliksukaten mile-aurtellranun, maligesgu malruurtellranun. 42Cikiisqellria-llu cikirru cikiisqutiinek, navraryulria-llu qunukutevkenaku.
Inglukestemten̄ek Kenkillerkarput
43“Cali niitelartuci mat'umek, ‘Ilan kenkarkaugan inglun-llu uumikluku.’ 44Tau͡gaam qanrutamci: Kenkiciki ingluci, piicauciki-llu tangerrnakesceci nangtesceci-llu. 45Atavci qilagmelnguum yuknauraaci. Wani-wa akerta pic'et'laraa assiilngurnun assilrianun-llu, cali-llu ellallircetaqluku ellualrianun elluanrilngurnun-llu. 46Wani-wa kenkesteci kiingan kenkekuvciki, camek akqutengqerceci? Tuaten-llu-qaa piksaitut akiliqurautnek quyurcistet? 47Cali-llu ilaci nallaitgun elluarrluki qalaruskuvciki, assinruuci-qaa allani? Tuaten-llu-qaa piksaitut agayumanrilnguut? 48Taumek, kitaki elpeci, ellualriarungnaqici, Atavcetun qilagmelngurmi ellualriaruciatun.”
Currently Selected:
Matthew 5: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.