Matthew 3
3
John-aaq Angllurcecista
1Tamatum nalliini John-aaq Angllurcecista tekituq, Judea-m-llu yuilqurtaani qaneryariurluni, qanerluni, 2“Umyualinqigci, qiliim angayuqauvia ukaqsigian.” 3Wani-wa tauna qanrutkumauq Isaiah-kun prophet-aakun waten, “Yuilqumi qayagalriim erinii; Ataneq tumkaanek upyuciu, pekcararkai-llu elluaqcarciki nalqigcarluki.” 4John-aaq una aturangqertuq ungungssim qulugtellriim melqurrinek naqugutengqerrluni-llu amimek, ner'aqluni-llu petgertayulirpagnek, evegtaat-llu neqkautaitnek. 5Yugugaat-llu ullagaat, Jerusalem-aarmiut, Judea-m-llu tamarmi yuin, Jordan-aam-llu tamarmi yuin. 6Angllurcetevkartut-llu elliinun Jordan-aami assiilnguteng apervikuatekluki.
7Tau͡gaam Pharisee-aat amllellriit Sadducee-aat-llu tangrramiki anglluryulriit qalarutai, “Elpeci ciissirpiit piyagaitni, kia apertuutaci Agayutem eq'ukutii qimaasqelluku? 8Taumek yuucirpeciuggun umyualinqigtellerci nasvagciu. 9Umyuarpeciuggun-llu qankunavkenaci: ‘Abraham-aam kinguveqaakut.’ Waniwa qanrutamci Agayun makunek teggalqunek kinguverkiuryugngauq Abraham-aamun. 10Cali-llu napat aciat ellivikumauq piqertuutarmek, napat atsangenrilnguut assilrianek, kepumaarkauluteng kenermun-llu muriulluki. 11Wiinga merkun angllurcetamci umyualinqigtellerkarpecen̄un, tau͡gaam cimirkaqa tauna, tukninrulria wangni, aluilitagkenek tegumiallerkaqa tunriukutnarquq; elliin angllurceciiqaaci Anernerkun Tanqilriakun, kenerkun-llu. 12Aqlayutminek avalingqertuq, mukaarkat-llu kaimvviat imairciqaa, mukaarkat-llu quyurrluki qemaggviminun, tau͡gaam carangllugkuat ekuavkararkaugai kenermek nipsuilngurmek.”
Jesus-aam Angllullra
13Taum nalliini Jesus-aaq Jordan-aamun tekituq Galilee-amek, John-aamun-llu angllurcesqumaluni. 14John-aam pisqumanricaaqaa qanrulluku, “Elpet tau͡gaam angllurcetnaqsaaqerpenga, amta-llu-qaa wangnun pisqumaluten?” 15Jesus-aam kiugaa, “Watua tuaten pivkarnga, tuaten pinaqngakuk elluam pisqutii aturluku.” Tua-i tuaten pivkaraa. 16Anglluumariami-llu Jesus-aaq egmian tag'uq mermek; taguciatun-llu qilak ikirtuq, Agayutem-llu Anernera tangrraa atralria yaqulegtun, elliinun-llu mill'uni. 17Erinatanguq-llu qilagmek qanerluni, “Wani-wa una Qetunraqa kenkek'ngaqa, ilukegcitkaqa.”
Currently Selected:
Matthew 3: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.