Leviticus 27
27
Alerquutet Cikiutnun Atanermun
1 Atanrem qanrutaa Moses-aaq 2ukunek picirkiutnguarkanek Israel-aam yuinun: “Yuk akqillni aturluku cikiqengkuni yuullgutminek Atanermun, tauna ataam angicugngaciquq akilirtelluku makut iliitgun akikiurumalriit, 3-7aturluku picirkiuraq mat'umun taqumalria:
–angun allrakungelria yuinarmek ayagluni yuinaat pingayun (60) engelekluku: akikiurciqerci yuinaak malruk qulmek cipluku (50) akinek
–taqneq arnaq: yuinaq qulmek cipluku (30) akinek
–yun'erraq, allrakurluni tallimanek yuinaat allrakut tekilluki: yuinaat akit
–nasaurluq: qulen akit
–mikelnguq iralungelria ataucimek allrakut talliman tekilluki: angutngukan akikiurluki tallimanek akinek
–mikelnguq arnaukan: pingayun akit
–angun allrakungelria yuinaat pingayun cipluki (60): yuinaat akit
–arnaq allrakungelria yuinaat pingayun cipluki (60): qulen akit
8“Yuk-llu arrsaussiyaagluni akilirciigalkuniu akikiurallerci, angun tauna akqutkellni taiciiqaa agayulirtem̄un. Nutaan-llu agayulirtem taum akiliryugngakiinek tauna akikiurciqaa.
9“Ungungssiukan yuum elliitektukiitun Atanermun, tuaten ayuqellriit tamarmeng yuum cikiutai Atanermun kencignarqelriaruut. 10Allamek cimirngaitaa navrusngaunaku-llu assilria assiilngurmek, wall'u assiitellria assilriamun; navruskuniu tauna elliitellni allamun ungungssimun, tamarkenka Atanrem piksagutarkaugak. 11Ungungssiq-llu menuulriarukan, cikiutekumayuilnguq Atanermun, tua-i taum taitarkaugaa ungungssiq ciuqerranun agayulirtem. 12Agayulirtem-llu akikiurciqaa assillra wall'u assiitellra tangerrluku. Tuaten-llu akikiullruciatun akingqerrarkauluni. 13Taum-llu ataam kipucukaku akia ilaluku piarkauluku.
14“Angutem elliitekekaku eneni Atanermun, agayulirtem akikiurciqaa assiucia wall'u assinrilucia cuqluku, akikiuraa-llu cakanirngaunani. 15Taum-llu elliillrem eneni ataam kipucukaku akillra ilaluku piarkauluku, pikestellran-llu ataam piksagutarkauluku.
16“Angun-llu elliikan nunautmi iliinek paitaqluku piksagutellerminek, akikiurumaciquq nunam qaillun pitalrianek naugiyugngallra cuqekluku. 17Elliitekellrukuniu-llu nunautni egmianun agayunerpiim Jubilee-m allrakuan kinguani tamalkuan akikiuraa akilirciqaa. 18Tau͡gken elliitekellrukaku kinguani agayunerpiim Jubilee-m, tua-i agayulirtem akikiurciqaa allrakut cuqluki agayunerpanqigtellerkaanun. Ilangartarkauluku akia allrakut pellullret cuqekluki agayunerpiim Jubilee-m kinguani. 19Nunam-llu elliitekestellran ataam kipucukaku, akillra ilaluku piarkaugaa ataam-llu elliin piksagulluku. 20Tau͡gken ataam kipucuumiilkuniu wall'u tunkuniu allamun utermun kipuqaarpek'naku Atanermek, utermun kiputesciigaliciqaa; 21agayunerpanqigeskan Jubilee-ruluni nuna Atanrem taqluku piksagutarkaugaa; agayulirtet pikarkauluku.
22“Elliikan-llu nunamek kiputellerminek, paitami ilakenrilkiinek, 23agayulirtem akikiurciqaa allrakut cuqluki agayunerpanqigtellerkaanun Jubilee-ruluku, taum-llu akilirarkauluku egmianun tuani ernermi, akiliutii-llu Atanrem pikarkauluku. 24Allrakuani agayunerpiim Jubilee-m nuna utercecimaarkauluni nutem pikestellranun wall'u kinguvrinun.
25“Tamarmeng akikiurumaarkauluteng taum nalliini akiliuryaraicetun.
26“Ungungssim irniqarraarutii ak'a piksagutellrua Atanrem, taumek elliitekumangaituq kuluvayagaunge'rmi wall'u qusngiyagaunge'rmi, Atanrem pikngaki. 27Tau͡gaam ungungssiq menuulriarukan utermun kipuciiqaa akikiurumallra ilaluku. Tau͡gken utermun kipucimanrilkan iliitnun tunyugngaciquq akikiurumallrakun.
28“Tau͡gaam qaillukuarviirulluki allakaumalriit#27.28: Qaillukuarviirulluki allakaumalriit: Ca imna waten allakaumalria qaillukuarviinaku Atanrem pikaa, taumek yuum aturciigaciiqaa, tau͡gaam piunrirarkauluku. Atanermun, utermun kipucimasciigatut, yuungraan, ungungssiungraan wall'u nunaungraan. Tuaten elliitekumalriit taqluki Atanrem piksagutelarai. 29Yuunge'rmi tuaten qaillukuarviinani elliitekumalria utermun kipucimasciigatuq; tuqucimaarkauguq.
30“Nunam naugillrin qulngurutait mukaarkat wall'u atsat Atanrem pikai. 31Yuum ilait utermun kipucukuniki nutem akiketukiit ilaluku akilirarkauluki. 32Naaqumaaqata-llu qunguturat ungungssit, qulngurutait tamalkuita Atanrem pikciqai. Tamarmeng ungungssit qulngurutait Atanrem pikai. 33Avurluni-llu pingaunani assirrlainalrianek wall'u assiiterrlainalrianek, iliit-llu cimirngaunaku; cimirikan cimillra cimiutellra-llu tamarkenka Atanrem piksaguciiqak, utermun-llu kipucimasciiganatek.”
34Makut maa-i alerquutet Atanrem cikiutekellri Israel-aam yuinun Moses-aakun Ingrimi Sinai-ami.
Currently Selected:
Leviticus 27: YPK
Highlight
Copy
Compare
Share
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
