Leviticus 20

Anucimirqecetaarutkait Niicunrilnguut

1 Atanrem qanrutaa Moses-aaq, 2“Qanruski Israel-aam yui: Israel-aam yuin iliit wall'u allanrulria tamaani, irniami iliitnek elliillrukan agayutnguamun Molech-aamun, nunalgutain tamarmeng teggalqunek miluquluku tuquskilitgu. 3Cikiqengelria irniami iliitnek agayutnguamun Molech-aamun, tuatnallra pitekluku wiinga qenruciiqaqa yumnun-llu ilaunrirtelluku. Tua-i-wa kencignarqelria Pelatekaqa menuurcaku tamaaggun qigcikevkenaku-llu tanqilria atqa. 4Nunat-llu taukut yuita nallunguaqatgu tauna tuaten pilleq tuqutevkenaku-llu, 5wiinga inglulirciqaqa tauna angun ilai-llu cali-llu tamalkuita ilalirtai piciunrirluteng pilriit wangnun, tau͡gaam agayulangluteng agayutnguamun Molech-aamun. Wiinga taukut yuk'enrirarkauganka.

6“Kina imna ikayungcaqan tuqullret tarnait piluki angalkilriamun ingluksaguciiqaqa yumnun-llu ilaugarkaunrirtelluku. 7Taumek menuircarci elpecen̄ek tanqilriarurrluci. Wiinga Atanruama elpeci Agayuteklua. 8Niisngaciki alerquutenka aturluki-llu; Atanruunga wiinga elpecen̄ek kencignarivkarilriaruunga.

9“Kia imum aniqlaakunikek angayuqaagni tuqucimaarkauguq, tuqucimallra-llu elliinun tusngaarkauluni.

10“Kina akusrarutekikan ilami nulirranek, tamarmek tuqucimaarkauguk. 11Angun akusrarutekilleq atami nulirranek caunrilkilriaruuq ataminek, tamarmek-llu arnaq akusrarutekilleq-llu tuqucimaarkaulutek, elkegnun-llu tuqucimallrak tusngaluni. 12Angun-llu akusrarutekikan ukurraminek, tamarmek tuqucimaarkauguk. Inerquun nakmiin ilaminek akusrarutekisqevkenaku aturaak, elkegnun-llu tuqucimallrak tusngaluni. 13Angun-llu angutngullgutminek akusrarutekikan arnamek pilaucirmitun, tamarmek pellernarqelrialiullruuk. Tuqucimaarkaulutek ellmegnek pinarqelriarurcamek. 14Angun nulirtuqan aanakellriignek tuqutarkaugaci ekualuki tamalkuita canganarqelria atuatgu. Tuaten elpeci piarkaunrituci. 15Angun-llu akusrarutekikan ungungssimek, tamarkenka angun ungungssiq-llu tuqutarkaugaci. 16Arnaq-llu akusrarutekevkangnaqkan ungungssimun, tuqutarkaugarci arnaq ungungssiq-llu; tuqucimallrak elkegnun tusngauq.

17“Angun nulirtuquni nayagarminek wall'u alqerminek wall'u atami panianek wall'u aanami panianek, taukuk kasngunarqellriaruuk yuut takuatni ancimaarkaulutek-llu nuniitnek. Tua-i-wa nakmiin alqerminek wall'u nayagarminek arniurami ellminek pinarqutkiurtuq. 18Angun akusrarutekikan agelrumalriamek, tamarmek akunlevcen̄ek ancimaarkauguk, inerquutngulria menuurrnarqelria atuagnegu.

19“Akusrarutekngaitan anaanan wall'u aciin, tuaten piluten inerquusngalria aturciqngavgu nakmiin ilavnun. Tuaten pilutek tamarmek pinarqut'ngelriaruuk. 20Angun akusrarutekilria anaanaminek wall'u acaminek caunrilkilriaruuq taumek angaminek wall'u ataataminek; angun tauna arnaq-llu assiilngurmek atullragcetun pimaciquk, tuquarkauguk-llu irniarunatek. 21Kia-llu anelgutni nulirriquniu, taukuk irniangyuunatek tuquciquk. Taum angutem menuurrnarqelria aturaa anelgutni-llu kasngunarqevkarluku.”

22 Ataneq qanertuq, “Niisngakiciki tamalkuita alerquutenka picirkiutenka-llu aturluki-llu, ayauskumci nunam tekitarkarpeci ancuaraaci. 23Tamakut-llu yuut ciunerpecen̄ek antarkama piciryarait maligtaquyaqunaciki; makut tamalkuita nunam tamatum yuin atularait taumek wangni umyualngunarqellriarulriit. 24Tau͡gaam wiinga qanrutellruamci: Nuniit paitarkaqerci, cikiutekciqaqa elpecen̄un piksagutesqelluku, nuna camek enuqitnailnguq naungignaqluni-llu. Wiinga Atanruunga elpeci Agayutkarpecia, wiinga-llu allakallruluci allanek atanruvignek. 25Taumek elpeci nallunritarkaukeci menuulriit wall'u menuilnguut ungungssit yaqulget-llu. Menuurrngaituci elpecen̄ek nerluci yaqulegnek ungungssinek-llu wiinga allakallemnek elpecen̄un menuulriaruciit nallunritesqelluku. 26Elpeci tanqigarkauguci wangnun kiima pikevkarluci, wiinga Ataneq tanqilriaruama. Allakallruamci-llu allanek yugnek wiinga piknaluci.

27“Angun wall'u arnaq tuqumalriit tarnaitnun angalkilria tuqucimaarkauguq teggalqunek miluquluku. Tuatnalriim tuqucimallra elliinun tusngaarkauguq.”

Currently Selected:

Leviticus 20: YPK

Highlight

Copy

Compare